Ua Fesili Mai le ʻAufaitau

Po o Molimau a Ieova o se Lotu Porotesano?

E lē manatu Molimau a Ieova o i latou o se lotu Porotesano. Aiseā?

Na tulaʻi mai talitonuga faa-Porotesano i le senituri lona 16 i Europa i se taumafaiga e toe fuataʻi le Lotu Katoliko Roma. O le upu “Porotesano” sa muaʻi faatatau atu i tagata na mulimuli atu iā Matini Luteru, i le Fono Aoao i le Aai o Sepaea i le 1529. Talu mai lenā taimi, e tele lava ina taʻua le faaupuga e faamatala ai i latou uma e tausisi i aʻoaʻoga ma sini o le Toefuataʻiga. Ua faamatalaina e le Merriam-Webster’s Collegiate Dictionary, Lomiga lona 11, se Porotesano “o se sui o se lotu e tetee i le pule aoao a le Pope, ma faamautū aʻoaʻoga a le Toefuataʻiga e pei o le taʻutonuina e ala i le faatuatua, o tagata talitonu uma o ositaulaga, ma o le Tusi Paia e na o le pau lea o le puna mo le upu moni.”

E ui lava e teena e Molimau a Ieova le pule aoao a le pope ma lagolagoina atoatoa le tāua o le Tusi Paia, ae e ese i latou mai i lotu Porotesano i le tele o auala. O le mea moni, o loo faasino atu le tusi, The Encyclopedia of Religion i Molimau a Ieova, “e matuā ese lava.” Seʻi manatu i auala e tolu e ese ai i latou.

Muamua, e ui lava e teena e le faatuatuaga Porotesano nisi o vala o le tapuaʻiga a le lotu Katoliko, ae na faaaogā e taʻitaʻi o le Toefuataʻiga nisi o aʻoaʻoga faa-Katoliko, e pei o le talitonu i le Tasitolu, le afi i seoli, ma le ola pea o le agaga o le tagata pe a oti. Ae peitaʻi, e talitonu Molimau a Ieova, o na aʻoaʻoga e lē gata e feteenaʻi ma le Tusi Paia, ae e lagolagoina ai foʻi le vaaiga sesē e faatatau i le Atua.—Tagaʻi i le itulau e 4-7 o lenei mekasini.

Lua, o Molimau a Ieova e lē o tetee faasaga i se lotu, ae e latou te taʻuina atu aʻoaʻoga moni. O loo latou faatāuaina le fautuaga a le Tusi Paia e faapea: “E lē manaʻomia ona faamisa se pologa a le Alii, ae e tatau ona agamalu i tagata uma, ia agavaa e aʻoaʻo atu, ia pulea lelei o ia lava i tulaga leaga, ia faatonu atu ma le agamalu iā i latou o ē e tetee.” (2 Timoteo 2:24, 25) O Molimau a Ieova e latou te faailoaina le eseesega o mea o loo fai mai ai le Tusi Paia, ma mea o loo aʻoaʻoina e le tele o lotu. Ae o lo latou sini i le faia faapea, e lē ina ia toe fuataʻi ai nisi faalapotopotoga faalotu. Nai lo lea, o lo latou sini ia fesoasoani i tagata lotofaamaoni ia maua le poto saʻo e uiga i le Atua ma lana Afioga, le Tusi Paia. (Kolose 1:9, 10) Pe a faaauau ona tetee tagata o isi lotu iā i latou, e ʻalofia e Molimau a Ieova le faia o ni finauga e leai se uiga.—2 Timoteo 2:23.

Tolu, i le lē pei o le lotu Porotesano lea ua tupuga mai ai le faitau selau o isi lotu, o Molimau a Ieova, e faatumauina lo latou autasi faaleuso i le lalolagi aoao. I mataupu tau aʻoaʻoga a le Tusi Paia, e mulimuli Molimau a Ieova o loo i le silia i le 230 atunuu, i le fautuaga a le aposetolo o Paulo ia “autasi i a outou upu.” E leai ni fevaevaeaʻiga iā i latou. Nai lo lea, e latou te ‘autasi i manatu ma mafaufauga.’ (1 Korinito 1:10) E taumafai lo latou ʻauuso “e tausia le autasi o le agaga i le fusi o le filemu.”—Efeso 4:3.