ʻO le a faatūina e le Atua o le lagi o le malo e lē faaumatia lava. O lea malo foʻi e lē tuuina atu i se isi nuu. O le a ia tuʻimomomoina ma faaumatia malo uma, ae e tumau lea malo e faavavau.’​—Tanielu 2:44.

O le Malo o le Atua o se faigāmalo i le lagi. O lona Tupu tofia o Iesu Keriso lea o le a aveesea uma pulega faaletagata, ma faamautinoa ua faia le finagalo o le Atua i le lalolagi e pei ona faia i le lagi. (Mataio 6:9, 10) E leai se malo faaletagata e suia lenei malo, auā o “le malo e faavavau o lo tatou Alii ma le Faaola o Iesu Keriso.” E mautinoa o le a maua le filemu moni.​—2 Peteru 1:11.

“E fai ma liua e Satani o ia lava e avea ma agelu o le malamalama. E lē o se mea tele la, pe afai e fai ma liua e ana auauna i latou lava e fai ma auauna o le amiotonu. Peitaʻi, o lo latou iʻuga e tusa lea ma a latou galuega.”​—2 Korinito 11:14, 15.

O le a faaalialia i lumāmea lotu sesē o galuega a le Tiapolo, ma o le a tafiesea mai le lalolagi. E lē toe iai le feitagaʻi i lotu faapea le faamasaatoto. O lea tulaga, o le a mafai ai e i latou uma e alolofa i “le Atua soifua ma lē e moni,” ona tapuaʻi atu iā te ia i le ʻfaatuatuaga e tasi’ ma “le agaga ma le upu moni.” E mautinoa o le a maua le filemu ma le autasi.​—1 Tesalonia 1:9; Efeso 4:5; Ioane 4:23.

“E faatasi foʻi le Atua ma i latou. E na te soloiesea foʻi loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā. Auā ua mavae atu mea muamua.”​—Faaaliga 21:3, 4.

E mafai e Ieova ona faataunuuina lenā mea e ala i lona Alo o Iesu, lea na maliu mo le fanau a tagata. (Ioane 3:16) I lalo o le taʻitaʻiga a Iesu, o le a toe faafoʻisia tagata i le tulaga lelei atoatoa. E lē toe iai ni mafatiaga auā o le a ʻfaatasi le Atua ma  i latou,’ ma o le a ia soloiesea “loimata uma i o latou mata.” O le a lē toe iai le tulaga lē lelei atoatoa ma mafatiaga, ma ʻe fai le lalolagi mo ē e amiotonu, e nonofo ai pea i latou e oo i le faavavau.’​—Salamo 37:29.

“Ua ia [Iesu Keriso] puʻeina le tarako, o le uluaʻi gata lea, o le Tiapolo ma Satani, ma saisai o ia mo le afe tausaga. Ua ia lafo o ia i le tō ma tapunia, ma faamauina, ina neʻi faasesēina e ia o atunuu.”​—Faaaliga 20:2, 3.

E lē toe iai lava ni aafiaga a Satani pe a saisai o ia ma temoni ma lafoina “i le tō,” o se tulaga e lē mafai ona latou toe faia ai so o se gaoioiga. E lē mafai ona latou toe pulea olaga o tagata. Maʻeu se mapusaga o le a iai i le ola ai i se lalolagi e aunoa ma taaʻiga a Satani ma agaga leaga!

O le a faaiʻuina “aso e gata ai” pe a māeʻa le “puapuaga tele” e pei ona taʻua e Iesu i le Mataio 24:21 e faapea: “O le a tupu le puapuaga tele, e leai sona tusa talu le amataga o le lalolagi, e oo mai lava i aso nei, ma o le a lē toe tupu foʻi se mea faapea.”

O le a mataʻutia le puapuaga tele auā o le a iai mea e leʻi faatalitalia o le a tutupu ai, ma o le a faaiʻuina “i le taua o le aso tele o le Atua o Lē e ona le malosi uma lava,” po o “Amaketo.”​—Faaaliga 16:14, 16.

O i latou uma e naunau i le mea e tonu, e latou te tulimataʻia le taimi e faaiʻuina ai lenei faiga amioleaga o mea. Seʻi mātau nisi o faamanuiaga o loo latou tulimataʻia i le Malo o le Atua.

O le a faasaoina atu i se lalolagi fou filemu “se motu o tagata e toʻatele”: Ua faapea mai le Afioga a le Atua, e iai “se motu o tagata e toʻatele” e lē mafaitaulia lo latou aofaʻi, o le a ʻsao mai le puapuaga tele’ ma faasaoina atu i se lalolagi fou amiotonu. (Faaaliga 7:9, 10, 14; 2 Peteru 3:13) E latou te faafetaia Iesu Keriso mo lo latou faaolataga, “o le Tamaʻi Mamoe a le Atua, o lē e na te aveeseina le agasala a le lalolagi!”​—Ioane 1:29.

E tele aogā e maua mai i aʻoaʻoga mai le Atua: “O le a tumu le lalolagi i le poto e uiga iā Ieova” i le lalolagi fou. (Isaia 11:9) O le a aofia i lenei aʻoaʻoga mai le Atua faatonuga i le auala e ola fealofani ai tagata uma. Ua folafola mai e le Atua: “O aʻu o Ieova, lou Atua, o Lē o loo aʻoaʻo oe i mea e aogā iā te oe, o Lē e taʻitaʻiina oe i le ala e ao ona e ui ai.”​—Isaia 48:17.

O le a toetutū mai ē pele ua feoti mai le tuugamau: A o iai Iesu i le lalolagi, na ia toe faatūina ai lana uō o Lasalo mai le oti. (Ioane 11:1, 5, 38-44) O lenā gaoioiga ua ia faaalia ai mea e sili atu o le a ia faia i lalo o le faatulagaga o le pulega o le Malo o le Atua.​—Ioane 5:28, 29.

O le a tumau e faavavau le filemu ma le amiotonu: I le pulega a Keriso, o le a lē toe iai se amioleaga. E faapefea ona tatou iloa? E silafia e Iesu o tatou loto. O lea, e na te faaaogāina lenā tomai e faamasino ai ē amiotonu ma ē amioleaga. O ē e lē mananaʻo e suia o latou ala leaga, e lē faatagaina e ola ai i le lalolagi fou a le Atua.​—Salamo 37:9, 10; Isaia 11:3, 4; 65:20; Mataio 9:4.

Ua na o nisi na o valoaga mai le tele o valoaga i le Tusi Paia e faatatau i le lumanaʻi matagofie ua toe o se aga ona oo atu lea i ai. O le a tumau e faavavau “le tele o le filemu,” pe a pule le Malo o le Atua i le lalolagi. (Salamo 37:11, 29) O le a aveesea pogai o mafatiaga uma o loo faapologaina ai le fanau a tagata. E tatou te mautinoa le taunuu o lenei mea auā ua faapea mai le Afioga a le Atua: “Faauta! Ou te faia ia fou mea uma lava. . . . Ia tusi, auā o upu nei e faamaoni ma moni.”​—Faaaliga 21:5.