Metala: Mālō Sofia. Ua ou fiafia lava ua maua mai oe i le fale.

Sofia: Ua ou fiafia foʻi ua e sau.

Metala: I le vaiaso talu ai na ta talanoa ai e faatatau i faalogona o le Atua i o tatou mafatiaga. * Na e taʻua ai o se mataupu ua leva ona e mafaufau i ai, aemaise lava le taimi na lavea ai si ou tinā i le faalavelave tau taavale. O ā mai la si ou tinā?

Sofia: O nisi aso ua lelei ae o nisi foʻi aso ua faalēlelei. Ae o lea ua manuia faafetai i lenei taimi.

Metala: Taʻi lelei la o lenā ua manuia si ou tinā. E mautinoa e faigatā tele le tulaga ua e oo i ai.

Sofia: Ioe, o nisi taimi ou te mafaufau ai po o le ā le umi o le a feagai ai si oʻu tinā ma nei mafatiaga.

Metala: O faalogona masani lava na. Atonu e te manatua le vaiaso talu ai, ae ou te leʻi tuua oe na ou faatū ai se fesili, pe aiseā ua lē taofia ai e le Atua mafatiaga pe afai o loo iai iā te ia le mana e aveesea ai.

Sofia: Ioe, o lea ou te manatua.

Metala: A o leʻi iloiloina le tali o lenā fesili mai le Tusi Paia, seʻi toe autalu nisi o manatu tāua mai le ta talanoaga na seʻi mavae atu nei.

Sofia: Manaia foʻi.

Metala: O se tasi o manatu tāua na ta aʻoaʻoina, e oo lava i se tasi o tane faamaoni i taimi o le Tusi Paia na tuufesili foʻi pe aiseā ua lē taofia ai e le Atua mafatiaga. Peitaʻi, e leʻi otegia o ia e le Atua ina ua ia faia na fesili, e leʻi fetalai atu foʻi e tau lava o le faaalia o le faatuatua.

Sofia: O se manatu fou lenā sa ou maua mai i le ta talanoaga talu ai.

Metala: Na ta aʻoaʻoina foʻi e lē fiafia Ieova le Atua e silasila mai o loo tatou mafatia. O se faataʻitaʻiga, ua faapea mai le Tusi Paia, ʻna mafatia le Atua ina ua mafatia ona tagata.’ * Pe e lē faamāfanafanaina ea i taʻua i le iloaina o loo tigā alofa mai le Atua pe a oo mafatiaga iā i tatou?

Sofia: Ae saʻo a.

Metala: E lē gata i lea, na ta aʻoaʻoina ai foʻi le tele o le mana o Lē na foafoaina mea uma, ma e mautinoa e mafai ona ia faalaa mai ma taofia mafatiaga.

Sofia: O le mea tonu a lenā ou te lē o malamalama ai. Aiseā ua lē taofia ai e le Atua nei mea leaga o loo tutupu, pe afai o loo iai iā te ia le mana e faia ai faapea?

Metala: Ina ia maua le tali o lau fesili, e lelei pe a ta suʻe i le tusi o Kenese. E te masani foʻi i le tala iā Atamu, Eva, ma le fua o le laau faasāina?

Sofia: Ioe, e masani ona faamatalaina i le aʻoga  Aso Sā. Na fetalai le Atua iā i laʻua e aua le ʻai i le fua o le laau, ae e la te leʻi usiusitaʻi i ai.

Metala: Saʻo lelei lou manatu. Seʻi vaai la pe aiseā na faia ai e Atamu ma Eva le agasala. Auā o le mea na tupu i le amataga, e iloa ai le māfuaaga ua tatou mafatia ai. E mafai faamolemole ona e faitauina mai le Kenese 3:1-5?

Sofia: “Ua sili ona faaeteete o le gata i manu ʻaivao uma o le fanua na faia e Ieova le Atua. Ua fai mai o ia i le fafine: ʻE moni ea na fetalai mai le Atua, e aua neʻi lua aai mai i fua o laau uma o le faatoʻaga?’ Ona tali atu lea o le fafine i le gata: ʻO fua o laau o le faatoʻaga, e mafai ona ma aai ai. A o le fua o le laau o loo i le ogatotonu o le faatoʻaga, na fetalai mai le Atua, “Aua lava neʻi oulua aai ai, aua foʻi neʻi oulua papaʻi i ai, ina neʻi oulua feoti. “’ Ona fai mai lea o le gata i le fafine: ʻE lua te lē oti lava. Auā ua silafia e le Atua, o le aso lava lua te aai ai e pupula ai o oulua mata, ona pei ai lea o oulua o le Atua, e iloa le lelei ma le leaga.’”

Metala: Malo lava mo le faitau. Mātau le manatu e pei ona taʻua i le mau, o loo talanoa atu le gata i le fafine, po o Eva. O loo taʻua manino mai i isi vaega o le Tusi Paia, o Satani le Tiapolo lea na talanoa atu iā Eva e ala i se gata. * Na fesiligia e Satani Eva e uiga i le tulafono a le Atua i le laau na faasāina. O e mātauina fetalaiga a le Atua i le mea e tupu iā Atamu ma Eva pe a la aai i le fua o le laau?

Sofia: O le a la feoti.

Metala: Saʻo lelei. Na faia foʻi e Satani se tuuaʻiga matuiā e faasaga i le Atua. Mātau ana upu na fai: “E lua te lē oti lava.” Na taʻua e Satani e pepelo le Atua!

Sofia: Ou te leʻi iloa muamua lenā mea.

Metala: Ina ua faapea mai Satani e pepelo le Atua, na ia lāgā ai se mataupu e umi se taimi e foʻia ai. E te iloa le māfuaaga?

Sofia: Leai.

Metala: Seʻi fai se faataʻitaʻiga. Seʻi faapea o lea ua ou fai atu e sili atu loʻu malosi iā te oe. E faapefea ona e faamaonia ou te sesē?

Sofia: E ala i le faia o ni gaoioiga e faamaonia ai.

Metala: O lenā tonu lava. Seʻi faapea o lea e ta te tauvā i le siiina o se mea mamafa, o le tagata lava e mafai ona ia siiina, o le tagata na e malosi.

Sofia: O lea ua ou maua atu lou manatu.

Metala: Ae ā pe ou fai atu e sili atu loʻu faamaoni nai lo o oe? O se tulaga e faigatā ona faamaonia, a ea?

Sofia: Ioe.

Metala: O le mea moni, o le faamaoni e lē mafai ona iloa i se faamaoniga o le malosi.

Sofia: Saʻo oe e lē mafai.

Metala: E pau le auala e faamaonia ai, o le faaalu lea o se taimi e mātauina ai i taʻua e nisi ina ia iloa ai po o ai o i taʻua e faamaoni.

Sofia: Ae saʻo.

Metala: Seʻi toe manatu la i le tala o loo i le Kenese. Pe na faapea mai Satani e malosi o ia nai lo le Atua?

Sofia: E leai.

Metala: Ana fesiligia e Satani lenā tulaga, e faigofie ona faamaonia e sili atu le malosi o le Atua. Nai lo o lea, na ia faapea mai e sili lona faamaoni nai lo le Atua. E faapefea? E ala i lona faapea atu iā Eva, ʻO loo pelogia oe e le Atua, ae o lea ou te taʻuina atu le mea moni.’

Sofia: Manaia foʻi si na manatu.

Metala: O le atamai o le Atua na ia silafia lelei ai, e pau le auala e tali ai lea tuuaʻiga, o le faaalu o se taimi e faamaonia ai. O le faia faapea, o le a manino mai ai po o ai o loo tautala i le mea moni, ma po o ai foʻi e pepelo.

Sofia: Pe e leʻi taliina ai i inā le tuuaʻiga ina ua maliu Eva?

Metala: Ioe, ae e na o se vaega o le tuuaʻiga na taliina. Pe a e tagaʻi i le fuaiupu e 5, e iai isi mea  na aafia i le luʻi a Satani. E te mātauina isi mea na taʻua e Satani iā Eva?

Sofia: Na faapea atu Satani iā Eva, pe afai e ʻai i le fua o le laau, o le a pupula ona mata.

Metala: Ioe, ma o le a avea ai o ia e pei “o le Atua, e iloa le lelei ma le leaga.” Na tuuaʻia e Satani le Atua e faapea, o loo ia taofia se mea lelei mai i tagata.

Sofia: O lea ua ou tau malamalama atu.

Metala: O se isi foʻi lenā o luʻi e sili ona matuiā.

Sofia: O le ā le uiga o lau tala?

Metala: Pe a fua i upu a Satani iā Eva, e tusa o lea ua ia faapea mai e mafai e le tagata ona ola e aunoa ma le taʻitaʻiga a le Atua. Na silafia lelei e Ieova, e pau le auala e tali ai lea tuuaʻiga o le tuu o le avanoa iā Satani e faamaonia ai, pe e saʻo lona manatu. O le māfuaaga lea ua faataga ai e le Atua Satani e na te puleaina lenei lalolagi mo sina taimi. Ua manino mai ai le pogai o le tele o mafatiaga o loo tatou fesagaʻia, ona o Satani o loo pulea lenei lalolagi, ae e lē o le Atua. * Peitaʻi, e iai se tala lelei.

Sofia: O le ā lenā tala?

Metala: E lua ni upu moni matagofie e faatatau i le Atua o loo taʻua i le Tusi Paia. Muamua, e manatu mamafa mai o ia i o tatou mafatiaga. O se faataʻitaʻiga, seʻi iloilo upu a le tupu o Tavita o loo faamauina i le Salamo 31:7. E tele mafatiaga na feagai ma Tavita i lona olaga, ae mātau upu o lana tatalo i le Atua. E mafai ona e faitauina mai le ta mau faamolemole?

Sofia: Fai mai le mau: “Ou te fiafia ma olioli i lou alofa faamaoni, ona ua e silasila mai i loʻu puapuaga; ua e silafia foʻi oʻu mafatiaga.”

Metala: E ui i le tele o mafatiaga na feagai ma Tavita, ae na faamāfanafanaina o ia i le iloaina o loo silafia e Ieova luʻi uma na ia fesagaʻia. Po o faamāfanafanaina oe i le manatu o loo silafia e Ieova mea uma, e oo foʻi i mafatiaga tau i faalogona lea e lē mafai ona malamalama atoatoa i ai isi tagata?

Sofia: Ioe.

Metala: O le upu moni lona lua, e lē faataga e le Atua o tatou mafatiaga ina ia faaauau ai pea. O loo taʻua i le Tusi Paia, ua toe o se aga ona ia faaiʻuina lea o le pulega amioleaga a Satani. O le a ia tafiesea atoatoa mea leaga uma o loo tutupu, e aofia ai ma mafatiaga o loo e fesagaʻia ma si ou tinā. E talafeagai ma oe pe a ou toe asiasi mai i le vaiaso fou ma faailoa atu le māfuaaga e ao ai ona tatou talitonu, ua toe o se aga ona faamuta lea e le Atua o mafatiaga uma? *

Sofia: Manaia foʻi lenā tonu.