Ua faapea mai le Faalapotopotoga o le Soifua Mālōlōina i le Lalolagi (WHO), afai e lē faaitiitia le toʻatele o tagata ulaula, e oo ane i le 2030 ua silia ma le 8,000,000 tagata e maliliu i tausaga taʻitasi. Pe afai e faatupulaʻia pea, e oo ane i le faaiʻuga o le senituri 21 ua fasiotia le 1,000,000,000 o tagata ona o le tapaa.

E lē na o tagata ulaula e aafia i le tapaa, e aafia ai foʻi isi sui o le aiga i tulaga tau tupe ma i faalogona. I tausaga taʻitasi, e tusa ma le 600,000 tagata e lē ulaula e maliliu ona o le mānavaina o le asu mai i le tapaa. O lea, e aafia tagata uma ona o le taugatā o togafitiga o maʻi e māfua mai i le tapaa.

E ese mai i isi faamaʻi pipisi lea e taumafai malosi fomaʻi e suʻe ni vaifofō, o le faamaʻi lenei o le ulaula tapaa e iai le vaifofō ma ua leva ona iloa e tagata. Na faapea mai le faatonu sili o le WHO o Dr. Margaret Chan: “O le ulaula tapaa e māfua mai lava i tagata, ma e mafai ona foʻia i taumafaiga maumauaʻi a malo ma faalapotopotoga.”

E tele atunuu ua lagolagoina taumafaiga ina ia foʻia le ulaula tapaa. Iā Aokuso i le 2012, e 175 atunuu na malilie e fai ni taumafaiga e faaitiitia ai le faaaogāina o le tapaa. * Peitaʻi, e iai foʻi nisi o loo uunaʻia pea le ulaula tapaa. I tausaga taʻitasi, e faaaluina ai e falegaosi tapaa le faitau piliona o tupe i faasalalauga, ina ia faatosina ai tagata e ulaula aemaise lava i tamaʻitaʻi ma talavou i atunuu tauatiaʻe. O le a faatupulaʻia pea i latou e maliliu mai i le tasi piliona o ē ua ulaula pe afai e faaauau ona pulea pea e le tapaa. O lea pe afai e lē tuua e tagata le ulaula, o le a vave faatupulaʻia le aofaʻiga o tagata e maliliu i le isi 40 tausaga.

E ui i le mananaʻo o le toʻatele e tuu lea masaniga, ae ua maileia pea i latou ona o faasalalauga ma le manaʻo e fia ulaula pea. E faapena le tulaga o Naoko. Na amata ona ulaula a o talavou ona na maileia i faasalalauga e faapea e aloaʻia o ia e isi pe a ulaula. E ui sa ia iloa na maliliu ona mātua i le kanesa o le māmā ona o le tapaa, ae na faaauau pea ona ulaula a o tausia aʻe lana fanau e toʻalua. Na faapea mai o ia: “Na ou popole neʻi oʻu aafia i le kanesa o le māmā ma aafia ai foʻi ola o si aʻu fanau, ae e leʻi mafai ona ou tuua. Na ou manatu o le a lē mafai ona tuu laʻu tapaa.”

Peitaʻi, na mafai ona tuu le ulaula a Naoko. Na iai se māfuaaga na mafai ai ona ia tuua lenā masaniga, ma o le māfuaaga foʻi lenā ua mafai ai e le faitau miliona o tagata ona saʻoloto mai i le pologa i le tapaa. Na faapefea ona saʻoloto Naoko mai i le tapaa? Seʻi faaauau pea lau faitau faamolemole.