E fua la matou vaaiga ma le auala e fai ai sauniga o maliu i aʻoaʻoga a le Tusi Paia, e aofia ai aʻoaʻoga o loo mulimuli mai:

•   O se lagona masani le faanoanoa i le maliu o sē e pele. Na faavauvau soo o Iesu ina ua maliliu ē e pele iā i latou. (Ioane 11:33-​35, 38; Galuega 8:2; 9:​39) O lea, e matou te lē vaai i taimi o maliu o se avanoa e faia ai ni patī lē taupulea. (Failauga 3:​1, 4; 7:​1-4) Nai lo o lenā, o le taimi lea e matou te faaalia ai le tigā alofa.​—Roma 12:15.

•   Ua lē toe iloa e le tagata ua maliu se mea. E tusa po o le ā le tupuaga po o le ituaiga aganuu e sau ai, e matou te ʻalofia tū ma gaoioiga e faavae i talitonuga e lē faale-Tusi Paia, e pei o le ola pea o le agaga pe a oti le tagata, ma e mafai ona latou taaʻina tagata o loo feola. (Failauga 9:​5, 6, 10) O na tū e aofia ai le leoleoina o le maliu, tausamiga ma fiafiaga pe a uma ona teu le maliu, talagā teu, taulaga mo ē ua oti, talanoa atu pe faia talosaga i lē ua oti, ma tū o le faanoanoa e faia e se fafine ua oti lana tane. E matou te ʻalofia na tū ma gaoioiga ina ia usitaʻia ai le faatonuga a le Tusi Paia: “Ia outou vavaeese, . . . ma aua tou te toe papaʻi atu i se mea e lē mamā.”​—2 Korinito 6:​17.

•   E iai le faamoemoe mo ē ua maliliu. O loo aʻoaʻo mai i le Tusi Paia, e iai le taimi o le a toetutū mai ai ē ua maliliu ma o le a lē toe iai se oti. (Galuega 24:15; Faaaliga 21:4) E fesoasoani lenā faamoemoe iā i matou e ʻalofia ai le soona faavauvau, e pei foʻi ona fesoasoani i uluaʻi Kerisiano.​—1 Tesalonia 4:​13.

•   Ua fautua mai le Tusi Paia ia faaalia le faamaulalo. (Faataoto 11:2) E matou te lē vaai i le sauniga o le maliu o se avanoa e “faalialiavale” ai le tulaga po o le tamaoaiga o se tasi. (1 Ioane 2:​16) E matou te lē faia foʻi ni sauniga o maliu taugatā, po o pusa maliu ma ofu taugatā, ina ia faaofo ai isi.

•   E matou te lē faamalosia isi e mulimuli i o matou talitonuga e faatatau i sauniga o maliu. E matou te mulimuli i le mataupu silisili lenei: ʻE taʻitasi i tatou uma ma tala atu lana amio i le Atua.’ (Roma 14:12) Peitaʻi, pe a fesiligia i matou, e matou te taumafai e faamatala atu o matou talitonuga i se auala “agamalu ma le matuā faaaloalo.”​—1 Peteru 3:​15.

 Nofoaga: Pe a filifili se aiga e fai se sauniga o le maliu, e mafai ona fai i so o se nofoaga e latou te filifilia e pei o le Maota mo Sauniga, fale maliu, o lo latou lava fale, nofoaga e faaliu efuefu ai, po o le tuugamau.

 Sauniga: E faia ai se lauga e faamatala ai le aʻoaʻoga a le Tusi Paia e faatatau i le oti ma le faamoemoe o le toetū, e faamāfanafanaina ai aiga ma uō a lē ua maliu. (Ioane 11:25; Roma 5:​12; 2 Peteru 3:​13) E ono taʻua i le taimi o le sauniga ni uiga lelei o lē ua maliu, atonu e faamatilatila ai ni lesona e aʻoaʻoina mai i lona faamaoni.—2 Samuelu 1:​17-​27.

 E mafai ona usu ai se pese e faavae mai i le Tusi Paia. (Kolose 3:​16) E faaiʻu le sauniga i se tatalo faalaeiau.​—Filipi 4:​6, 7.

 Totogi po o tupe e aoina: E lē totogia so o se sauniga e matou te faia, e aofia ai ma sauniga o maliu, ma e matou te lē aoina ni tupe i taimi o a matou sauniga.​—Mataio 10:8.

 Tagata e auai: E talia so o se tasi e lē o se Molimau a Ieova e auai i se sauniga o se maliu e faia i se Maota mo Sauniga. I le pei o isi a matou sauniga, e mafai foʻi ona auai so o se tasi i sauniga o maliu.

 E fai e se Molimau a Ieova lana lava filifiliga e fua i lona lotofuatiaifo ua uma ona toleniina i le Tusi Paia. (1 Timoteo 1:​19) Peitaʻi, e lē faia sa matou vaega i sauniga faalotu ia e matou te manatu e lē ōgatusa ma le Tusi Paia.​—2 Korinito 6:​14-​17.