TAN NA AI!
Fu san ede libisma no man tyari freide kon?—San Bijbel e taki?
Bigi tiriman nanga internationaal organisâsi no ben tyari freide kon. Now moro bigi feti de leki na a ten baka a Di Fu Tu Grontapufeti. Sowan tu milyard sma e libi na presi pe den feti disi de.
Fu san ede libisma no man tyari freide kon? San Bijbel e taki?
Dri reide fu san ede libisma no man tyari freide kon
1. A fasi fa libisma de now, e meki taki den no e pruberi srefi fu tyari freide kon. Bijbel e taki dati na ini a ten disi „sma o lobi densrefi nomo. Den o lobi moni. Den o lobi dyaf. Den o abi heimemre. . . Den no o tai hori na trawan. . . Den no o wani meki kruderi. . . Den no o man dwengi densrefi. Den o du ogri-ati san. . . Den o du san densrefi wani. Den o abi bigimemre.”—2 Timoteyus 3:2-4.
2. Awinsi na wán libisma, noso wan heri grupu, den no man lusu den problema fu wi efu wi Mekiman, Yehovah a Gado no yepi den. Bijbel e taki krin dati „a no de na wan libisma fu taki sortu pasi a o teki. A no de na wan libisma di e waka fu taki srefi pe a o poti en futu.”—Yeremia 10:23.
3. Satan Didibri e tiri grontapu èn a abi furu makti. Na en „e kori sma na heri grontapu” (Openbaring 12:9). Solanga „heri grontapu de na ini a makti fu na ogriwan”, feti o de.—1 Yohanes 5:19.
Suma kan tyari freide kon?
Bijbel e sori taki wi kan de seiker taki freide o kon. Ma a no libisma o tyari freide kon. Na Gado o tyari freide kon.
„Yehovah taki: ’Mi sabi heri bun fa mi e prakseri fu unu. Mi no wani taki rampu miti unu, ma mi wani taki un musu abi wan bun libi. Mi wani taki sani waka bun gi unu na ini a ten di e kon èn mi wani taki un musu abi howpu.”—Yeremia 29:11.
Fa Gado o du dati? „A Gado di e gi freide o . . . masi Satan” (Romesma 16:20). Gado o gebroiki wan regering na hemel fu tyari freide kon na heri grontapu. Bijbel e kari a regering disi „Gado Kownukondre” (Lukas 4:43). Yesus Krestes na a Kownu fu a Kownukondre dati. Te a o tiri grontapu, dan sma o leri fa fu libi na ini freide.—Yesaya 9:6, 7.
Efu yu wani kon sabi moro, dan yu kan leisi na artikel di nen „San Gado Kownukondre o du?”
a Yehovah na a nen fu Gado.—Psalm 83:18.