YEHOVAH GADO e broko en ede trutru nanga wi èn a wani taki wi kisi wini fu a yepi di a e gi wi na wan lobi-ati fasi. Efu wi anbegi en na a yoisti fasi, dan wi sa de koloku èn wi sa man wai pasi gi furu problema na ini a libi. A sa blesi wi tu, èn a o yepi wi (Yesaya 48:17). Ma hondrohondro difrenti kerki de, èn den alamala e taki dati den e leri sma tru tori fu Gado. Toku den sani di den e leri sma fu a fasi fa Gado de èn fu san a e fruwakti fu wi, e difrenti furu fu makandra.

² Fa yu kan kon sabi san na a yoisti fasi fu anbegi Yehovah? Yu no abi fu go studeri ala den someni kerkileri fu kan agersi den nanga makandra. Yu musu kon sabi nomo san Bijbel e leri trutru fu a tru anbegi. Fu eksempre: Furu kondre abi a problema taki sma e meki falsi moni. Efu yu ben kisi a wroko fu luku sortu moni falsi, dan fa yu ben o du dati? Yu ben o suku fu memre fa ala den difrenti sortu falsi moni tan? Nôno. A ben o moro bun fu ondrosuku fa trutru moni tan. Baka te yu kon sabi fa trutru moni tan, dan yu kan si sortu moni na falsi moni. Na so a de tu taki te wi e kon sabi a tru anbegi, dan wi kan si sortu anbegi na falsi anbegi.

³ A de prenspari taki wi e anbegi Yehovah na a fasi di en feni bun. Furu sma e bribi taki ala fasi fu anbegi e plisi Gado, ma dati a no san Bijbel e leri wi. A no nofo te wan sma e taki nomo dati en na wan Kresten. Yesus ben taki: "A no ala sma di e taigi mi: ’Masra, Masra’, sa go na ini a kownukondre fu hemel, ma na a sma di e du a wani fu mi Tata na hemel, sa go na ini.” Fu dati ede, efu wi wani taki Gado feni wi bun, dan wi musu kon sabi san a e aksi fu wi èn wi musu du dati tu. Yesus ben taki dati den wan di no e du a wani fu Gado, na "sma di e du kruktudu” (Mateyus 7:21-23). Falsi anbegi no warti noti, neleki fa falsi moni no warti noti. San moro ogri srefi, na taki den sortu fasi dati fu anbegi kan tyari takru bakapisi kon gi wi.

⁴ Yehovah e gi ala sma na grontapu na okasi fu kisi têgo libi. Ma efu wi wani libi fu têgo na ini Paradijs, dan wi musu anbegi Gado na a yoisti fasi, èn nownow kaba wi musu libi na wan fasi di en feni bun. A de wan sari sani taki furu sma no wani du dati. Dati meki Yesus ben taki: "Pasa go na ini a smara doro; bika a pasi di e tyari sma go dede, bradi èn a bigi, èn furu sma e waka a pasi dati; ma a doro di e tyari sma go na libi, pikin èn a pasi fu en smara, èn wan tu sma nomo e feni en” (Mateyus 7:13, 14). A tru anbegi e meki taki sma kan kisi têgo libi. Falsi anbegi o meki sma kisi pori te fu kaba. Yehovah no wani taki nowan sma kisi pori, èn fu dati ede a e gi sma na ala sei na okasi fu kon leri sabi en (2 Petrus 3:9). Fu dati ede, a fasi fa wi e anbegi Gado, kan meki taki wi kisi libi, noso a kan meki taki wi kisi pori.

FA WI KAN KON SABI A TRU ANBEGI

⁵ Fa wi kan feni ’a pasi di e tyari sma go na libi’? Yesus ben taki dati a tru anbegi ben o de fu si na ini a fasi fa den sma fu na anbegi dati ben o tyari densrefi. "Na den froktu fu den, unu sa si suma na den”, na so a ben taki. "Ibri bun bon e meki bun froktu” (Mateyus 7:16, 17). Sobun, wi ben o man si suma abi a tru anbegi, te wi ben o luku san den e bribi, èn fa den e tyari densrefi. Aladi den tru anbegiman na sondu sma di e meki fowtu, toku leki grupu, den e suku fu du a wani fu Gado. Meki wi go luku siksi sani di e yepi wi fu kon sabi suma abi a tru anbegi.

DEN WAN DI E ANBEGI A TRU GADO

• e gi leri komoto fu Bijbel
• e anbegi Yehovah wawan èn e meki a nen fu en bekènti
• e sori trutru lobi gi makandra
• e bribi taki Yesus na a sma di Gado e gebroiki fu frulusu libisma
• no de wan pisi fu grontapu
• e preiki taki a Kownukondre fu Gado na a wan-enkri howpu gi libisma

⁶Den sani di den dinari fu Gado e leri sma, komoto fu Bijbel. Bijbel srefi e taki: "Na Gado srefi ben meki sma skrifi ala den sani di de na ini Gado Buku; den sani disi bun fu gi leri, fu frumane sma, fu poti sani kon reti, fu leri sma na wan regtfardiki fasi, so taki a sma di de fu Gado kan kon bun dorodoro èn de srekasreka fu du ibri bun wroko” (2 Timoteyus 3:16, 17). Na apostel Paulus ben skrifi gi den Kresten brada nanga sisa fu en, taki: "Di unu yere Gado wortu di wi preiki gi unu, dan unu no ben teki a wortu leki a wortu fu libisma, ma leki a wortu fu Gado, èn na dati a de trutru” (1 Tesalonikasma 2:13). Fu dati ede, den sani di tru anbegiman e leri èn sosrefi a fasi fa den e tyari densrefi, no de akruderi a fasi fa libisma e si sani noso akruderi gwenti fu libisma. Den sani di den e leri èn a fasi fa den e tyari densrefi de akruderi Bijbel, a Wortu fu Gado.

⁷ Yesus Krestes gi wi a yoisti eksempre, fu di a ben e leri sma san skrifi na ini Gado Wortu. Na ini begi a taigi en hemel Tata: "Yu wortu na waarheid” (Yohanes 17:17). Yesus ben e bribi na ini a Wortu fu Gado, èn ala san a ben e leri sma e kruderi nanga den Buku fu Bijbel. Furu tron Yesus ben taki: "Gado Buku taki” (Mateyus 4:4, 7, 10). Dan Yesus ben e kari wan pisi fu Bijbel. Na so a de tu na ini a ten disi, taki a pipel fu Gado no e leri sma den eigi prakseri. Den e bribi taki Bijbel na a Wortu fu Gado, èn den e leri sma soso san skrifi na ini Bijbel.

⁸Den wan di abi a tru anbegi e anbegi Yehovah wawan èn den e meki a nen fu en bekènti. Yesus ben fruklari: "Na Yehovah yu Gado, yu musu anbegi èn na en wawan yu musu dini” (Mateyus 4:10). Dati meki den futuboi fu Gado e anbegi Yehovah wawan. Disi wani taki tu dati den e fruteri sma san na a nen fu a tru Gado èn fa a Gado disi de. Psalm 83:18 e taki: "Yu, di nen na Yehovah, yu wawan na a Moro Heiwan fu heri grontapu.” Yesus ben gi wi na eksempre fa fu yepi trawan fu kon leri sabi Gado, di a ben taki na ini begi: "Mi meki yu nen bekènti na den sma di yu puru na ini grontapu èn di yu gi mi” (Yohanes 17:6). Na so a de tu na ini a ten disi, taki tru anbegiman e leri trawan fu a nen fu Gado, fu den sani di a abi na prakseri, èn fu a fasi fa Gado de.

⁹A pipel fu Gado e sori trutru lobi gi makandra, sondro fu prakseri densrefi nomo. Yesus ben taki: "Na a fasi disi ala sma o sabi taki unu na mi disipel, te unu lobi makandra” (Yohanes 13:35). Den fosi Kresten ben abi a sortu lobi dati gi makandra. A lobi disi di Gado wani taki wi musu abi, e tyari sma kon na wán èn a e meki den abi wan tranga banti leki trutru brada nanga sisa, awinsi den de fu wan tra ras, awinsi sortu posisi den abi, èn awinsi sortu kondre den komoto (Kolosesma 3:14). Sma fu falsi anbegi no abi so wan banti fu lobi. Fa wi du sabi dati? Den e kiri makandra fu di den de fu wan tra kondre, èn fu di den de fu difrenti ras. Tru Kresten no e teki fetisani fu kiri den Kresten brada nanga sisa fu den, èn den no e du dati nanga nowan tra sma tu. Bijbel e taki: "Na a fasi disi sma kan sabi suma na den pikin fu Gado èn suma na den pikin fu Didibri: Efu wan sma no abi a gwenti fu du regtfardiki sani, dan a sma dati no kon fu Gado; na so a de tu nanga a sma di no lobi en brada…. Wi musu lobi makandra. Wi no musu de leki Kain, di ben kon fu na ogriwan èn di ben kiri en brada.”—1 Yohanes 3:10-12; 4:20, 21.

¹⁰ A no de fu taki, dati trutru lobi no wani taki nomo dati wi no musu kiri trawan. Fu di tru Kresten no e prakseri densrefi nomo, meki den e gebroiki a ten, a krakti, nanga den gudu fu den, fu yepi makandra èn fu gi makandra deki-ati (Hebrewsma 10:24, 25). Den e yepi makandra te den de na nowtu, èn den no e bedrigi sma. Fu taki en leti, na ini den libi den e fiti a Bijbel rai di e taki dati wi musu "du bun gi ala sma”.—Galasiasma 6:10.

¹¹Tru Kresten e bribi taki Yesus Krestes na a sma di Gado e gebroiki fu frulusu wi. Bijbel e taki: "Nowan tra sma kan gi wi frulusu, bika Gado no gi sma na grontapu nowan enkri tra nen di sa meki wi kisi frulusu” (Tori fu den Apostel 4:12). Soleki fa wi ben si na ini kapitel 5, dan Yesus gi en libi leki wan lusu-paiman gi libisma di e gi yesi na Gado (Mateyus 20:28). Boiti dati, Gado poti Yesus leki Kownu fu a hemel Kownukondre di sa tiri heri grontapu. Gado wani tu taki wi musu gi yesi na Yesus èn taki wi musu du san a leri wi, efu wi wani kisi têgo libi. Dati meki Bijbel e taki: "A sma di e bribi na ini a Manpikin, e kisi têgo libi. A sma di no e gi yesi na a Manpikin, no sa kisi libi.”—Yohanes 3:36.

¹²Tru anbegiman no de wan pisi fu grontapu. Di Yesus ben de na krutu na fesi Pilatus, a tiriman fu Rome, dan a ben taki: "Mi kownukondre no de fu a grontapu disi” (Yohanes 18:36). Awinsi na ini sortu kondre den tru bakaman fu Yesus e libi, den e saka densrefi na ondro en hemel Kownukondre èn fu dati ede den no e moksi densrefi kwetikweti nanga den politiek afersi fu grontapu. Den no e teki prati na den feti fu grontapu. Ma te sma bosroiti fu tron memre fu wan politiek partèi, te den e suku fu kisi wan posisi na ini a tirimakti fu a kondre, noso te den e go stem, dan anbegiman fu Yehovah no e suku fu tapu den sma disi. Èn aladi tru anbegiman fu Gado no e moksi densrefi nanga politiek afersi, toku den e hori densrefi na den wet fu a kondre. Fu san ede? Fu di Gado Wortu e gi den a komando fu ’saka densrefi na ondro den tiriman’ fu a kondre (Romesma 13:1). Te a politiek sistema wani taki tru anbegiman musu du wan sani di no e kruderi nanga a wani fu Gado, dan tru anbegiman e teki na eksempre fu den apostel di ben taki: "Fu di Gado na wi tiriman, meki wi musu gi yesi na en na presi fu libisma.”—Tori fu den Apostel 5:29; Markus 12:17.

¹³Den tru bakaman fu Yesus e preiki taki a Kownukondre fu Gado na a wan-enkri howpu gi a libisma famiri. Yesus ben taki na fesi: "A bun nyunsu disi fu a kownukondre o preiki gi sma na heri grontapu, so taki sma fu ala kondre kan yere dati, èn dan a kaba o kon” (Mateyus 24:14). Na presi taki den tru bakaman fu Yesus Krestes e gi sma deki-ati fu suku yepi na libisma tiriman fu lusu den problema fu den, den e meki bekènti taki a hemel Kownukondre fu Gado na a wan-enkri howpu gi a libisma famiri (Psalm 146:3). Yesus ben leri wi fu begi gi a volmaakti tirimakti dati, di a ben taki: "Meki yu kownukondre kon. Meki yu wani pasa na grontapu soleki fa a e pasa na hemel” (Mateyus 6:10). Gado Wortu ben taki na fesi dati a hemel Kownukondre disi "sa broko ala den kownukondre disi [di de now] na pisipisi èn tyari wan kaba kon na den, èn ensrefi sa tan te ten di no skotu”.—Danièl 2:44.

¹⁴ Te yu e prakseri san wi taki didyonsro, dan aksi yusrefi a sani disi: ’Sortu kerkigrupu e leri sma soso san skrifi na ini Bijbel èn e meki a nen fu Yehovah bekènti? Sortu grupu e sori lobi soleki fa Gado wani èn sortu grupu e sori bribi na ini Yesus? Sortu grupu no de wan pisi fu grontapu, èn e meki bekènti taki a Kownukondre fu Gado na a wan-enkri trutru howpu gi a libisma famiri? Sortuwan fu ala den kerkigrupu na grontapu, doro den markitiki disi?’ Den buweisi e sori krin taki na Yehovah Kotoigi doro den markitiki disi.—Yesaya 43:10-12.

SAN YU SA DU?

¹⁵ Wi no kan plisi Gado fu di wi e bribi nomo taki a de. Bika te yu luku en bun, Bijbel e taki dati srefi den ogri yeye e bribi taki Gado de (Yakobus 2:19). Ma a de krin fu si taki den no e du a wani fu Gado, èn taki Gado no feni den bun. Efu wi wani taki Gado feni wi bun, dan wi no musu bribi nomo taki a de, ma wi musu du a wani fu en tu. Wi musu komoto na ini falsi bribi sosrefi èn wi musu teki a tru anbegi.

¹⁶ Na apostel Paulus ben sori taki wi no musu teki prati na falsi anbegi. A ben skrifi: "’Komoto na den mindri, èn poti yusrefi aparti fu den,’ na so Yehovah e taki, ’èn no fasi den sani moro di no krin’; ’èn mi sa teki unu’” (2 Korentesma 6:17; Yesaya 52:11). Fu dati ede, tru Kresten e wai pasi gi iniwan sani di abi fu du nanga falsi anbegi.

¹⁷ Bijbel e sori taki ala den difrenti sortu falsi anbegi, de wan pisi fu "Babilon a Bigiwan” (Openbaring 17:5).* A nen dati e memre wi na a foto Babilon fu owruten, pe falsi anbegi bigin, baka a Frudu na ini den dei fu Noa. Furu fu den leri nanga den gwenti di de fu si na ini falsi anbegi na ini a ten disi, bigin na ini Babilon langa ten pasa. Fu eksempre, den Babilonsma ben e anbegi gado di ben de dri gado na ini wán skin. Na ini a ten disi, a moro prenspari leri fu someni kerki na a leri fu a Dri-wánfasi. Ma Bijbel e leri wi krin taki wán tru Gado nomo de, namku Yehovah, èn taki Yesus Krestes na a Manpikin fu en (Yohanes 17:3). Den Babilonsma ben e bribi tu taki libisma abi wan sili di no man dede èn di e libi go doro baka te a skin dede, èn taki a kan go na wan presi pe sma e kisi skin-ati. Na ini a ten disi, furu kerki e leri sma taki libisma abi wan sili, noso wan yeye di no man dede èn di kan kisi skin-ati na ini helfaya.

¹⁸ Fu di na anbegi di den Babilonsma fu owruten ben abi panya go na heri grontapu, meki a fiti fu kari a disiten Babilon a Bigiwan, a grontapumakti fu falsi bribi. Èn Gado ben taki na fesi dati a grontapumakti disi fu falsi bribi o kisi pori wantronso (Openbaring 18:8). Yu e si fu san ede a de prenspari fu puru yusrefi na iniwan sani di abi fu du nanga Babilon a Bigiwan? Yehovah Gado wani taki yu musu "komoto drape” esi-esi, now di ten de ete.—Openbaring 18:4.

¹⁹ Fu di yu teki a bosroiti fu komoto na ini falsi anbegi, meki son sma no sa wani bumui moro nanga yu. Ma te yu e dini Yehovah makandra nanga a pipel fu en, dan den wini di yu sa kisi, sa furu omeni tron moro leki den sani di yu ben sa kan lasi. Yu sa kisi someni brada nanga sisa na yeye fasi, neleki den fosi disipel fu Yesus di ben gowe libi ala tra sani fu tron bakaman fu en. Yu sa tron wan memre fu wan bigi famiri fu milyunmilyun tru Kresten di de na heri grontapu, èn di e sori yu trutru lobi. Èn yu sa abi a tumusi moi howpu fu libi fu têgo "na ini a grontapu sistema di e kon” (Markus 10:28-30). Kande baka wan pisi ten, den wan di gowe libi yu fu di yu teki a tru anbegi, sa poti prakseri na san Bijbel e leri èn tron anbegiman fu Yehovah.

²⁰ Bijbel e leri wi taki heri esi Gado sa tyari wan kaba kon na a ogri sistema disi, èn na presi fu dati a sa seti wan regtfardiki nyun grontapu, di a Kownukondre fu en sa tiri (2 Petrus 3:9, 13). Fu tru, dati sa de wan tumusi moi grontapu! Èn na ini a regtfardiki nyun sistema dati, wán bribi nomo sa de, wán tru fasi fu anbegi. Yu no denki taki a de wan koni sani fu du ala san de fanowdu fu abi demakandra nanga tru anbegiman nownow kaba?

*  Efu yu wani kon frustan moro fini fu san ede Babilon a Bigiwan e prenki a grontapumakti fu falsi bribi, dan luku a pisi tori di nen "Tra prenspari sani”.