GI YONGUWAN
12: Poti marki
SAN A WANI TAKI
Te yu poti wan marki, dan dati a no wan sani di yu e winsi noso dren fu en nomo. Na wan sani di yu e meki muiti fu du, yu o wroko tranga fu doro en.
Yu abi marki di yu kan doro na ini wan tu dei, wiki noso mun. Ma tra marki de di kan teki moro langa, kande wan yari noso moro langa srefi. Wi kan doro den marki disi te wi e poti tra pikinpikin wan di o yepi wi fu doro den.
FU SAN EDE A PRENSPARI
Te yu doro den marki fu yu, dan yu o de moro seiker fu yusrefi. Yu o de moro bun mati fu trawan, èn yu o de nanga moro prisiri tu.
Yu no o frede: Te yu poti pikin marki èn te yu doro den, dan disi e gi yu deki-ati fu poti moro bigi wan. Yu no o frede, srefi te tra yonguwan o suku fu dwengi yu fu du sani di no bun.
Mati: Furu sma wani de mati fu sma di sabi san den wani ini a libi, èn di de klariklari fu du san den abi na prakseri. Wan fu den moro bun fasi fu tron wan moro bun mati fu tra sma, na fu wroko makandra fu doro a srefi marki.
Koloku: Te yu poti marki èn yu doro den, dan yu e firi taki yu du wan bun sani.
„Mi lobi fu poti marki gi misrefi. Dati e yepi mi fu poti prakseri na wan sani di mi e angri fu kisi. Èn te yu doro a marki, dan yu kan taki,’iya mi du en, mi doro san mi ben wani.’”—Christopher.
BIJBELTEKST: „A sma di e luku a winti, no o sai siri. A sma di e luku den wolku, no o koti nyanyan.”—Preikiman 11:4.
SAN YU KAN DU
Den sani di e kon now kan yepi yu fu poti marki èn fu doro den.
Luku sortu marki yu wani doro. Skrifi den marki di yu wani doro, luku sortuwan moro prenspari, dan yu bigin nanga den wan dati.
Meki wan plan. Du disi gi ibri wan fu den marki di yu wani doro:
Skrifi o ten yu wani doro a marki.
Skrifi san yu musu du fu man doro en.
Hori na prakseri san kan meki en muilek gi yu fu no doro den marki disi èn prakseri san yu kan du fu no meki disi pasa.
Bigin. No wakti teleki yu skrifi ala sani finifini fosi yu o bigin. Aksi yusrefi: ’San na a fosi sani di mi musu du fu doro a marki fu mi?’ Du dati. Hari strepi na den sani di yu du kaba.
BIJBELTEKST: „Te wan sma e wroko tranga, dan den sani di a abi na prakseri fu du o tyari wini kon gi en.”—Odo 21:5.
Kande yu lobi den tori disi tu
SAN TRA YONGUWAN E TAKI
Cameron abi a moro bun libi di de
Yu wani wan bun libi? Arki te Cameron e fruteri san gi en prisiri di a go dini na wan tra kondre.
