„Te yu e begi, no taki den srefi sani ibri leisi baka.”​—Mateyus 6:7.

Yehovah no wani wi taki den srefi begi ibri tron baka noso taki wi e leisi den begi fu wi na ini wan buku. Na presi fu dati a wani taki wi begi nanga wi heri ati. Prakseri fa yu ben o feni en efu ala dei wan mati fu yu ben o taigi yu den srefi sani ibri leisi baka. Bun mati e taigi makandra fa den e firi èn den de eerlijk nanga makandra. Te wi e taigi wi hemel Tata san de na tapu wi ati, dan dati e sori taki wi e si en leki wi mati.

„Te unu e aksi, dan unu no e kisi noti, bika unu e aksi nanga takru prakseri.”​—Yakobus 4:3.

Wi e frustan taki Gado no o piki den begi fu wi efu wi sabi taki wi aksi en sani di a no feni bun. Fu eksempre, efu wan sma e dòbel èn a e begi Gado fu gi en koloku fu wini moni, dan Yehovah o piki a begi dati? Nôno, fu di Yehovah taigi wi krin taki wi no musu gridi èn taki wi no musu bribi na ini a gado fu Koloku (Yesaya 65:11; Lukas 12:15). Wi no kan fruwakti taki Yehovah piki den sortu begi dati! Efu wi wani taki Gado piki den begi fu wi, dan wi musu kon sabi san a taki na ini Bijbel. Na so wi o sabi efu a feni den sani bun di wi e aksi en.

 „Gado e tegu gi den begi fu wan sma di no wani gi yesi na a wèt.”​—Odo 28:9.

Na ini Bijbel ten, Gado no ben piki den begi fu den sma di no ben e gi yesi na den bun wet fu en (Yesaya 1:15, 16). Gado no kenki (Maleaki 3:6). Efu wi wani taki Gado piki den begi fu wi, dan wi musu du ala san wi man fu gi yesi na den wet fu en. Ma fa a de efu fosi wi ben du sani di no bun? Disi wani taki dati Yehovah no o arki wi noiti? Nôno! Efu wi drai wi libi èn wi e du ala san wi man fu gi yesi na Gado, dan a o gi wi pardon fu di a lobi wi.​—Tori fu den apostel 3:19.