Bijbel a no wan datrabuku. Ma a abi bun rai na ini di kan yepi sma. Den rai disi kan yepi wan sma di e feti nanga problema na frustan sei. Luku wan tu eksempre.

„Gosontu sma no abi datra fanowdu, ma na siki sma abi datra fanowdu.”​—MATEYUS 9:12.

Bijbel e sori taki a kan de fanowdu fu suku datrayepi. Furu sma di abi wan siki na frustan sei go leisi èn ondrosuku sani di abi fu du nanga a siki fu den èn den go na datra. Na so den kisi yepi.

„Te yu e oefen yu skin, dan dati bun gi yu.”​—1 TIMOTEYUS 4:8, Contemporary English Version.

Te yu e oefen yu skin èn yu e du tra sani di bun gi a gosontu fu yu, dan dati kan yepi yu fu firi moro bun. Disi wani taki tu dati yu musu oefen na wan fasti ten, taki yu musu nyan gosontu nyanyan èn taki yu musu sribi nofo.

„Wan ati di e prisiri, bun leki dresi, ma te wan sma e sari, dan dati e meki en bonyo kon drei.”​—ODO 17:22.

Te yu e leisi Bijbeltekst di e gi yu deki-ati èn te yu e poti marki di yu kan doro, dan dati kan yepi yu fu firi prisiri. Efu yu e poti prakseri  na den bun sani ini a libi èn yu abi a frutrow taki sani o go moro bun na ini a ten di e kon, dan dati o yepi yu fu horidoro awinsi yu depressief noso yu abi wan tra siki di abi krakti tapu yu frustan.

„Koni de nanga den sma di abi sakafasi.”​—ODO 11:2.

Kande yu o si taki yu no man du ala sani di yu wani. Dati meki yu musu aksi trawan fu yepi yu. A kan taki famiriman nanga mati wani yepi yu, ma kande den no sabi san den musu du. Taigi den nanga san den kan yepi yu, ma no aksi tumusi furu fu den.

„Mi ben firi taki wan sani no bun nanga mi èn dati meki mi go na datra. A datra taigi mi sortu siki mi ben abi. Disi yepi mi fu frustan san ben du mi èn fu go suku datrayepi so taki mi ben o man sorgu moro bun gi a gosontu fu mi.”​—Nicole. a A abi a siki di datra e kari bipolaire stoornis. Disi e meki taki a fasi fa a e firi èn e tyari ensrefi kan kenki wantronso.

„Mi kon si taki te mi e leisi Bijbel ibri dei nanga mi frow, dan dati e yepi mi fu bigin ibri dei nanga moi prakseri di e gi mi deki-ati. A e pasa furu leisi taki tapu den dei te mi no e firi bun, dan wan spesrutu tekst de di e trowstu mi.”​—Peter. A abi depressie.

„Mi no ben wani taki nanga trawan fu a siki di mi abi, fu di mi ben e firi syen. Ma wan bun mati fu mi ben arki bun di mi ben fruteri en san e du mi èn a pruberi fu frustan fa mi e firi. A yepi mi fu firi moro bun èn fu sabi taki a no mi wawan e feti nanga a siki disi.”​—Ji-yoo. A abi wan siki di e meki taki a no e wani nyan noti.

„Bijbel yepi mi fu frustan taki mi no man du ala sani, taki mi no musu wroko tumusi furu èn mi musu rostu nofo. Den bun rai fu Bijbel yepi mi fu horidoro aladi mi abi a problema disi.”​—Timothy, di abi obsessief-compulsieve stoornis.