Mi gebore na ini 1948, na ini wan pkin dorpu na a zuid-westsei fu Nigeria. Na a ten dati, mi omu Moustapha di ben de wan pkin brada fu mi papa, teki dopu. Baka dati, Wahabi, a moro owru brada fu mi, teki dopu. Di mi ben abi neigi yari, mi papa kon dede. Mi ben e sari srefsrefi. Wahabi taigi mi taki wi ben o man si papa baka na ini na opobaka. A sani dati trowstu mi èn a meki taki mi bigin studeri Bijbel. Mi dopu na ini 1963. Den dri tra brada fu mi teki dopu tu.

Na ini 1965, mi go tan nanga mi bigi brada Wilson na ini Lagos èn drape mi moksi furu nanga tra pionier fu a Igbobi Gemeente. A ben gi mi dek’ati fu si fa den ben de nanga prisiri, èn na ini yanuari 1968, mi srefi tron wan pionier.

Albert Olugbebi, wan brada di ben e dini na Betel, orga wan spesrutu konmakandra gi wi leki yongu brada. A ben wani taki nanga wi fu a nowtu di ben de na ini Nigeria. Moro spesrutu pionier ben de fanowdu drape. Mi sabi ete fa Brada Olugbebi ben gi wi dek’ati. A ben taki: „Un yongu, èn un kan gebroiki un ten nanga un krakti gi Yehovah. Bun furu wroko de fu du dyaso!” Mi ben wani de leki Yesaya di ben de klarklari fu go na iniwan presi pe Yehovah ben e seni en. Dati meki  mi vul a formulier in fu tron wan spesrutu pionier.​—Yes. 6:8.

Na ini mei 1968, mi go dini leki spesrutu pionier na ini a foto Kano na a noordsei fu Nigeria. Dati ben de na a ten fu a Biafra Feti (di ben de fu 1967 te go miti 1970). A feti dati tyari furu pori kon na ini a kontren drape èn te fu kba feti broko tu na a owstusei fu Nigeria. Wan brada di no ben wani taki ogri miti mi, pruberi fu meki mi frustan taki mi no ben musu go na a noordsei fu Nigeria. Ma mi taigi en: „Mi e warderi en taki yu e broko yu ede nanga mi. Ma efu Yehovah wani taki mi go pionier drape, dan mi de seiker taki a o de nanga mi.”

A situwâsi na ini Kano ben takru srefsrefi. A borgufeti ben pori a heri bigi foto disi. Te mi ben de na ini a preikiwroko, dan son leisi mi ben e si den dedeskin fu den sma di den ben kiri na ini a feti. Aladi difrenti gemeente ben de na ini Kano, toku furu fu den brada nanga sisa ben lowe gwe libi a foto. A nomru fu preikiman drape no ben doro 15 ete. Boiti dati, den ben frede èn den ben las’ati tu. Den brada nanga sisa dati ben breiti srefsrefi di siksi spesrutu pionier doro drape. Wi gi den dek’ati èn den ben e firi moro bun. Wi yepi den fu orga den konmakandra, fu bigin preiki baka, fu seni den preikiwroko raportu go baka na a bijkantoro, èn fu seni aksi den brada drape fu kisi buku nanga tra sani.

Wi leki spesrutu pionier bigin leri Hausatongo. Di den sma yere a Kownukondre boskopu na ini den eigi tongo, dan furu fu den arki san wi ben abi fu taki. Ma den sma fu wan prenspari kerki drape no ben lobi a preikiwroko fu wi èn dati meki wi ben musu luku bun. Wan leisi, wan man di ben abi wan nefi lon baka mi nanga mi preikiwroko patna. Koloku taki wi ben man lon moro tranga leki en èn a no ben man kisi wi! Aladi den sortu sani disi ben e miti wi, toku Yehovah ben e „kibri” wi èn moro sma bigin tron preikiman (Ps. 4:8). Tide na a dei, moro leki 500 preikiman e dini na ini den 11 gemeente di de na ini Kano.

Moro lati na ini augustus 1968, baka di mi ben de na ini Kano wan tu mun kba, mi nanga wan tu  tra pionier ben musu go dini na ini Niamey, a mamafoto fu a Republiek Niger. Heri esi wi ondrofeni taki Niger na wan fu den presi na grontapu pe a weer faya srefsrefi. Boiti taki wi ben musu leri fu preiki na ini a faya weer disi, wi ben musu leri Fransitongo tu, a moro prenspari tongo di sma e taki drape. Aladi den problema disi miti wi, toku wi poti wi fertrow tapu Yehovah èn makandra nanga wan tu preikiman di ben e libi drape, wi bigin preiki na ini a mamafoto. Fosi yu denki, bijna ala sma na ini Niamey di ben kan leisi ben kisi wan kopi fu a Bijbelstudie buku De waarheid die tot eeuwig leven leidt. Sma ben e kon suku wi srefi fu kisi wan fu den buku disi.

Heri esi wi kon si taki lanti no ben lobi Yehovah Kotoigi. Na ini yuli 1969, wi ben kon makandra gi a fosi kring konmakandra di oiti ben hori na ini a kondre. Sowan 20 sma ben de na a konmakandra disi. Wi ben breiti taki wi ben abi tu nyun preikiman di ben o dopu. Ma na a fosi dei fu a konmakandra, skowtu doro drape èn den stop a programa. Den teki den spesrutu pionier nanga a kring-owruman tyari go na a skowtu-post. Baka di den poti aksi gi wi, den taigi wi fu kon baka a tra dei. Wi ben e frustan taki lanti ben kan meki sani muilek gi wi, èn dati meki wi hori wan dopulezing na wan sma oso. Sondro taki sma ben sabi, wi dopu den tu nyun preikiman na ini wan liba.

Wan tu wiki baka dati, a Minister fu Binnenlandse Zaken taigi mi nanga feifi tra spesrutu pionier taki wi musu gwe libi a kondre. Den gi wi 48 yuru fu komoto na ini a kondre, èn wi srefi ben musu pai gi den kostu dati. Wi gi yesi èn wi go langalanga na a bijkantoro na ini Nigeria. Drape wi kisi nyun toewijzing.

Mi ben musu go dini na ini Orisunbare, wan dorpu na ini Nigeria. Mi ben e prisiri fu preiki èn fu hori Bijbelstudie makandra nanga a pkin grupu preikiman di ben e libi drape. Ma baka siksi mun, a bijkantoro kari mi fu drai go baka na Niger mi wawan. Na a bigin mi ben e ferwondru èn mi ben e senwe. Ma te fu kba mi no ben man wakti fu miti den brada na ini Niger baka.

Mi drai go baka na Niamey. A dei baka di mi doro drape, wan bisnisman fu Niger si taki mi ben de wan Kotoigi èn a bigin aksi mi sani fu Bijbel. Mi studeri nanga en èn di a tapu fu smoko èn fu dringi tumsi furu sopi, dan a dopu. Baka dati, mi ben breiti taki mi ben man preiki makandra nanga den brada nanga sisa na difrenti kontren fu Niger èn fu si fa safrisafri sma drape ben e kon na ini a tru anbegi. Di mi doro drape a fosi leisi, dan 31 Kotoigi ben de na ini a kondre. Ma di mi gwe, 69 Kotoigi ben de drape.

Na a kba fu 1977, mi drai go baka na Nigeria fu kisi skoro. Na a kba fu a skoro di ben teki dri wiki, a fesiman fu a Bijkantoro Komte, Malcom Vigo, meki mi leisi wan brifi fu a bijkantoro fu Sièra  Leon. Den brada drape ben e suku wan gosontu pionier brada di no ben trow èn di ben man taki Ingrisitongo nanga Fransitongo. Den ben abi a brada disi fanowdu fu dini leki kring-owruman na ini Ginea. Brada Vigo taigi taki mi ben de na a skoro fu go du a wroko dati. A taigi mi krin taki a wroko disi no ben makelek. A gi mi a rai disi: „Denki bun fosi yu teki a toewijzing disi.” Ma mi piki en wantewante: „Fu di na Yehovah e seni mi, meki mi o go.”

Mi teki opolani go na Sièra Leon èn mi miti nanga den brada na a bijkantoro. Wan fu den brada fu a Bijkantoro Komte taigi mi: „Wi no sabi fa a e go nanga a Kownukondre wroko na ini Ginea.” Aladi den brada na ini Sièra Leon ben kisi a frantwortu fu sorgu gi a preikiwroko na ini Ginea, toku a politiek situwâsi drape ben e meki en muilek fu abi kontakti nanga den preikiman. Difrenti leisi den ben pruberi fu seni wan brada go na ini a kondre, ma den no ben abi bun bakapisi. Dati meki den aksi mi fu go na Conakry, a mamafoto fu Ginea, fu pruberi fu kisi primisi fu lanti fu tan na ini a kondre.

Di mi doro na ini Conakry, dan mi go na a Ambassade fu Nigeria èn mi miti nanga na ambassadeur. Mi taigi en taki mi ben wani preiki na ini Ginea. A gi mi a rai fu no tan na ini a kondre noso skowtu ben o grabu mi noso kande ogri ben o miti mi. A taigi mi: „Drai go baka na Nigeria èn go preiki drape.” Ne mi piki en: „Mi wani tan dyaso.” Sobun, a skrifi a Minister fu Binnenlandse Zaken fu Ginea fu aksi en efu a ben kan yepi mi èn na dati a minister du tu.

Syatu baka dati, mi drai go baka na a bijkantoro na ini Sièra Leon èn mi taigi den brada san a minister ben bosroiti. Den brada bari fu prisiri di den yere fa Yehovah ben meki mi abi bun bakapisi na ini Ginea. Mi ben kisi primisi fu lanti fu tan na ini Ginea.

Fu 1978 te go miti 1989, mi dini leki kring-owruman na ini Ginea, Sièra Leon, èn mi ben e go yepi tu fu du a kringwroko na ini Liberia. Na a bigin mi ben e siki furu. Disi ben e psa son leisi te mi ben de na farawe kontren. Ma den brada ben e du ala muiti fu tyari mi go na at’oso.

Ma wan leisi mi kon siki seryusu fu di mi kisi malaria èn mi ben kisi woron tu na ini mi bere. Di mi kon betre te fu kba, mi yere taki den brada ben e taki kba pe den ben o beri mi. Aladi den sortu sani disi ben miti mi, toku mi no prakseri noiti fu gwe libi mi toewijzing. Èn mi e bribi ete taki na Gado wawan kan meki taki sani waka bun nanga wi, bika awinsi wi dede, a kan gi wi libi baka.

Na ini 1988, mi miti Dorcas, wan pionier sisa di lobi Yehovah trutru èn di abi sakafasi. Wi trow èn a kon du a kringwroko makandra nanga mi. Dorcas wroko tranga makandra nanga mi èn a ben de klarklari fu du furu sani fu plisi Yehovah. Mi nanga en ben e waka sowan 25 kilometer fu go na den difrenti gemeente aladi wi ben e syow den bagasi fu wi. Te den gemeente ben de moro fara, dan wi ben e suku iniwan fasi fa wi ben kan doro drape. Den tokotoko pasi ben lai olo.

 Dorcas abi furu dek’ati. Wan leisi a ben musu abra wan liba di ben lai nanga kaiman. Wi ben de na pasi feifi dei èn den udu broki ben broko. Sobun, wi ben musu gebroiki wan pkin boto. Di Dorcas opo tnapu fu kmoto na ini a pkin boto, dan a fadon na ini a dipi watra. Mi nanga en no ben man swen èn kaiman ben de na ini a watra. Koloku taki wan tu yonguman dyompo go ini a watra fu go hari en puru. Wan heri pisi ten mi nanga en ben e kisi takru dren fu a sani dati, ma wi tan du a kringwroko.

Na a bigin fu 1992, wi ben ferwondru taki Dorcas kon de nanga bere. Disi ben wani taki dati wi no ben o man du furuten diniwroko moro? Wi prakseri: „Yehovah gi wi wan kado!” Dati meki wi bosroiti fu kari na umapkin fu wi Jahgift (Kado fu Yehovah). Fo yari baka di Jahgift gebore, wi kisi en brada Eric. Ala den tu pkin fu wi na trutru wan kado fu Yehovah. Jahgift ben e dini wan pisi ten na wan vertaal-kantoro na ini Conakry, èn Eric na wan dinari ini a diniwroko.

Aladi Dorcas ben abi fu stop nanga a spesrutu pionierwroko te fu kba, toku a tan pionier srefi di a ben e kweki den pkin fu wi. Fu di Yehovah yepi mi meki mi tan dini leki spesrutu pionier. Baka di den pkin fu wi kon bigi, Dorcas ben man dini baka leki spesrutu pionier. Now un ala tu e dini leki zendeling na ini Conakry.

Ala ten mi go na iniwan presi pe Yehovah seni mi go. Furu leisi mi nanga mi wefi firi fa a kibri wi èn fa a blesi wi. Fu di wi e fertrow tapu Yehovah na presi fu fertrow tapu gudu, meki wi ben man wai pasi gi furu problema nanga broko-ede. Mi nanga Dorcas srefi ondrofeni taki a sma di e meki taki sani waka bun nanga wi na Yehovah, ’a Gado di e frulusu wi’ (1 Kron. 16:35). Mi abi a fertrow taki a o kibri a libi fu ala den sma di e fertrow na en tapu „neleki fa wan sma e kibri wan gudu na ini wan saka”.​—1 Sam. 25:29.