WAN bun kerki e leri wi fa fu denki fu sani di bun èn a e sori wi fa fu tyari wisrefi moro bun. A e yepi wi tu te wi e du muiti fu du san bun, èn a meki wi tron moro bun sma. Fa wi du sabi taki wan bun kerki e du dati?

Luku san na apostel Paulus ben skrifi gi den fosi Kresten di ben e libi na ini Korente,  na Grikikondre. Sma fu na owruten foto dati ben e libi wan yayolibi. Paulus ben warskow: „Dem hoeroeman, efoe dem afgodrei soema, efoe dem soetadoe soema, efoe dem man disi lostoe tra man, efoe dem sodomiet soema, efoe dem foefoeroeman, efoe dem gridiman, efoe dem droengoeman, efoe dem spotoeman, efoe dem man di e soekoe moni ondro tafra, no sa kisi da kownoekondre fu Gado leki wan erfenis.” Baka dati Paulus e taki: „En som foe oen ben de dem sortoe soema disi, ma now oen ben wasi kaba, now oen ben kom santa; now oen ben kom regtvaardiki na ini da nem foe Masra Jezus en nanga da Jeje foe wi Gado” (1 Korentesma 6:9-11, Da Bijbel na ini Sranantongo). Prakseri fu a sani disi: A bun kerki ben yepi son sma di no ben tyari densrefi na wan bun fasi, fu tron reti-ati sma di krin èn di e dini Gado!

Ma tra fasi leki dati, Bijbel e warskow: „Wan ten o kon pe den sma no o wani arki a bun leri moro. Den o du san den wani, èn den o teki wan lo leriman di e leri den san den wani fu yere.”​—2 Timoteyus 4:3, Nyun Testamenti.

Fa a de nanga den kerki di yu sabi? Den e hori densrefi na den wet fu Bijbel di e sori fa sma musu tyari densrefi? Noso den no e teki den krin rai na ini Gado Wortu so seryusu, fu di den e taigi sma nomo „san den wani fu yere”?

Efu yu wani kon sabi sortu kerki bun, dan pruberi fu piki den aksi di e kon now.

SAN BIJBEL E LERI: „Ala sma mus lespeki a trowlibi, den no mus go nanga wan tra sma na bedi. Bika Gado o krutu den sma di e gi densrefi abra na takru lostu nanga den sma di e huru.”​—Hebrewsma 13:4, Nyun Testamenti.

NA AKSI: A kerki disi e taki dati efu wan man nanga wan uma e libi nanga makandra, den musu trow na lanti?

SAN BIJBEL E LERI: Di sma ben aksi Yesus o ten sma kan broko trow, dan a ben taki: „A man di broko trow sondro tak’ en frow huru gi en, e libi wan huru libi efu a trow baka.”​—Mateyus 19:9, Nyun Testamenti.

NA AKSI: A kerki disi e lespeki a rai fu Yesus èn den e gi pasi taki wan sma broko trow èn trow baka, soso te en patna du hurudu?

SAN BIJBEL E LERI: „Lowe go kibri gi hoeroedoe! Ibri sondoe dati wan soema de doe de na dorosei foe hem skin; ma da soema disi hoeroe doe sondoe agensi hem egi skin.”​—1 Korentesma 6:18, Da Bijbel na ini Sranantongo.

„Dat’ meki Gado libi den meki den du den syensyen sani di den lostu fu du. Den frow no e go na bedi nanga wan man, soleki fa Gado poti en, ma den e go na bedi nanga densrefi. A de a srefi nanga den mansma. Den no wani go nanga wan frow na bedi, ma den e lostu densrefi fayafaya. Mansma e go na bedi nanga mansma. Dan so den e kisi a strafu ini den skin di fiti a ogri san den e du.”​—Romesma 1:26, 27, Nyun Testamenti.

NA AKSI: A kerki disi e leri taki na wan sondu te wan man abi seks nanga wan uma di no de en trowpatna, noso te tu mansma noso tu umasma abi seks?

SAN BIJBEL E LERI: „Un no mus bemui nanga wan sma di e kari ensrefi wan bribisma, ma dan a e gi ensrefi abra na takru lostu, noso a gridi, a e dini kruktu gado, a e  taki takru fu trawan, a e dringi drungu noso a e bedrigi sma. Un no mus nyan srefi nanga sowan sma” (1 Korentesma 5:11, Nyun Testamenti). San musu pasa nanga den sma di e taki dati den na Kresten, ma di e du sondu sondro fu abi berow? „Un mus puru a sma di du a ogri na un mindri”, na so Gado Wortu e taki.​—1 Korentesma 5:13, Nyun Testamenti.

NA AKSI: A kerki disi e puru iniwan memre fu en, di no e hori ensrefi na den wet fu Bijbel èn di no e sori berow?