SOLEKI fa a sori, dan sensi owruten, umasma lobi moi densrefi. Fositen prenki na tapu grebi, skotu, nanga prenki di meki fu pisipisi grasi, e sori taki sma na ala sei fu owruten Mesopotamia nanga Egepte ben e gebroiki sani fu moi densrefi. Furu sma ben lobi a fasi fa den Egeptesma ben e ferfi den ai kon gersi amandra, soleki fa wi kan si dati na tapu prenki.

Ma fa a ben de nanga den Israelsma? Den umasma fu owruten Israel ben e gebroiki sani fu moi densrefi? Efu dati de so, dan sortu sani den ben e gebroiki? Owruten prenki na tapu grebi noso skotu no de di kan sori wi san den sma na ini Israel ben e gebroiki. Ma wan tu tori na ini Bijbel, nanga owruten sani di sabiman feni na ini kondre fu Bijbel ten, kan meki wi kon sabi pikinso sortu sani den sma fu a ten dati ben e gebroiki fu moi densrefi.

Na ini a heri kontren fu Israel, sabiman fu owruten sani, feni sani ondro gron di e sori taki sma ben e gebroiki sani fu moi densrefi. Den ben feni plata stonkomki fu masi èn fu moksi den sortu sani dati. Den feni sosrefi fini switismeri batra, albaster kroiki fu poti salfu na ini, nanga pikin kopro spikri. Na tapu wan ivoor spun di den feni, palmbon kerfu na a wan sei èn na a tra sei yu e si doifi lontu na ede fu wan uma.

Gudu sma ben lobi fu gebroiki moimoi skropu fu poti sani na ini di den ben e gebroiki fu moi densrefi. Na ini Egepte èn na presi na ini Kanan, sma feni pikinpikin spun tu fu ivoor noso udu. Sonwan fu den spun disi ben kerfu leki meisje di e swen èn leki furu tra moimoi sani. Ala den sani disi e sori taki furu uma fu a ten dati ben e moi densrefi.

Na ini Bijbel, wan fu den umapikin fu Yob, nen „Keren-Hapuk”. Na ini Hebrewtongo, a kan taki a nen disi wani taki „Tutu gi blaka (ai) ferfi”. A sani dati na wan kisi noso wan tra sani pe sma ben e poti sani na ini fu ferfi den ai (Yob 42:14). A kan taki a nen ben de fu sori taki na umapikin disi ben moi, ma a kan sori tu taki sma fu a ten dati ben gwenti gebroiki sani fu moi densrefi.

A moi fu sabi taki te Bijbel e taki fu sma di ben e ferfi den ai, dan ala ten dati abi fu du nanga umasma di no ben abi wan bun nen. Wan fu den sma dati na a umakownu Iseibel, èn sosrefi Yerusalem di ben trangayesi èn di den  profeiti Yeremia nanga Esekièl e prenki leki wan huru-uma (2 Kownu 9:30; Yeremia 4:30; Esekièl 23:40). Sabiman feni bun furu owruten grasi sani noso ston sani makandra nanga pikin toti spun di ben de fu poti blaka ferfi gi ai. Te wi e luku ala den sani disi, dan a de krin taki furu umasma na ini Israel di ben drai baka gi Gado, ben kon abi a gwenti fu gebroiki bun furu ferfi fu moi den ai, èn sosrefi tra sortu sani. Spesrutu den umasma fu a kownu famiri nanga den guduwan ben abi a gwenti disi.

Na ini owruten Israel, sma ben gwenti langa ten kaba fu meki switismeri sani fu olèif-oli èn den ben gwenti gebroiki den tu. A Bijbel buku Eksodes e sori fa den ben e meki a santa switismeri-oli di den priester ben e gebroiki fu du diniwroko na ini a tempel. Na oli disi ben meki fu kaneri, mirre, nanga tra switismeri prani (Eksodes 30:22-25). Na ini Yerusalem, sabiman feni wan wrokopresi pe sma ben e meki switismeri sani nanga wierook fu gebroiki na ini a tempel. Den sabiman e bribi taki a wrokopresi disi de fu a fosi yarihondro B.K. Bijbel e taki furu leisi fu switismeri-oli di sma ben e gebroiki na ini na anbegi fu den èn na ini na  aladei libi.​—2 Kroniki 16:14; Lukas 7:37-46; 23:56.

Watra ben e mankeri na ini a kontren dati, èn fu dati ede sma ben lobi gebroiki switismeri-oli fu kan hori den skin krin. Boiti taki den ben e gebroiki oli fu sorgu taki a faya drei weer no ben e drei den skin, den ben e gebroiki en tu fu smeri switi (Rut 3:3; 2 Samuel 12:20). Fosi den ben tyari Ester, a yongu Dyu uma, go na Kownu Ahasferos, den hari en skin 12 mun langa gi en. Siksi mun langa den du dati nanga mirre-oli, èn baka dati ete siksi mun nanga balsem-oli.​—Ester 2:12.

Switismeri-oli, solfru, nanga gowtu, ben de warti sani gi sma na ini a ten dati. Di na umakownu fu Skeiba ben komoto fu wan farawe kondre fu go luku Kownu Salomo, dan wan tu fu den warti kado di a ben tyari gi en ben de gowtu, diri ston, nanga balsem-oli (1 Kownu 10:2, 10). Di Kownu Heskia sori den boskopuman fu Babilon den gudu na ini en oso, dan boiti a solfru, a gowtu, nanga ala den fetisani fu en, a sori den sosrefi ’a balsem-oli nanga a bun oli’.​—Yesaya 39:1, 2.

Den difrenti bromki, froktu, wiwiri, tara, noso bonbuba ben e gi pikinso switismeri noso oli nomo. Bijbel e taki fu wan tu fu den switismeri prani disi, soleki aluwe, balsem, bedelium-tara, kalmoes, kasia, kaneri, mirre, safraan, nanga tra sortu wiwiri di e smeri switi. Sonwan fu den ben e gro na ini a kondre srefi èn den ben e gro na ini Yordan-lagipresi. Sma ben e seni teki trawan fu den sortu sani disi na India, Zuid Arabia, nanga tra presi pe sma ben gwenti seri den sani disi.

Bijbel e taki fu Balsem-oli na ini den tori fu Kownu-uma Ester, a di fu na umakownu fu Skeiba, nanga a di fu Kownu Heskia, soleki fa wi ben taki kaba. Na ini 1988, sma feni wan pikin kroiki nanga oli na ini wan ston-olo krosibei fu Kumran, na a west-sei syoro fu a Dede Se. A sani disi meki taki sma bigin aksi densrefi ala sortu sani. A pikinso oli disi ben de a lasti warti balsem-oli di ben de fu feni ete? Ondrosukuman no sabi seiker. Te nanga a dei fu tide, gronman e pruberi fu prani gron nanga balsem-bon fu kan abi den bigi warti gron di ben de fositen.

Buweisi e sori taki a balsem-oli di Bijbel e taki fu en ben e meki na ini a kontren lontu En-Gedi. Sma feni onfu ondrogron, sosrefi batra, nanga difrenti sani di meki fu isri noso bonyo. Den sani disi di de fu a di fu siksi yarihondro F.K., na den srefi sortu sani di sma na ini tra kontren ben e gebroiki fu meki switismeri sani. Furu sabiman e bribi taki biginbigin a balsem-bon ben e komoto fu Arabia noso Afrika. Sma ben e meki a balsem-oli fu a watra fu en. Balsem-oli ben warti so te taki sma no ben e fruteri trawan fa den ben e kweki a prani èn fa den ben e meki a switismeri-oli disi.

Sma ben e gebroiki balsem-bon srefi fu seti politiek afersi. Soleki fa a historia skrifiman Josephus e taki, dan Marcus Antonius gi en lobiwan, Cleopatra, na Umakownu fu Egepte, wan heri gron fu den warti bon disi leki kado. Plinius, a historia skrifiman fu Rome, ben taki dati na a ten fu a Dyu Feti fu a fosi yarihondro B.K., Dyu fetiman pruberi fu pori ala den balsem-bon di den ben prani, so taki den Romesma di ben teki a kondre fu den abra no ben o man teki den.

Den sani di skrifi na ini Bijbel èn sosrefi owruten sani di sma feni, e yepi wi fu kon sabi pikinso sortu sani den sma fu Bijbel ten ben e gebroiki fu moi densrefi. Bijbel no e sori taki sma no musu gebroiki den sortu sani disi, ma na presi fu dati a e sori krin taki sma musu gebroiki den sani disi na wan lespeki fasi èn nanga krin frustan (1 Timoteyus 2:9). Na apostel Petrus ben sori taki a sani di „warti srefisrefi gi Gado”, na te sma abi „wan tiri èn safri fasi”. Te wi e luku fa a modo e kenki ibri tron baka, dan a no de fu taki dati disi na moi rai gi Kresten uma, awansi den yongu noso owru.​—1 Petrus 3:3, 4.