JONATHAN gebore na ini Amerkankondre, ma en papa nanga mama na fu Korea. Di a ben pikin, sma ben e denki takru fu en fu di a ben de fu wan tra ras. Di a ben e gro kon, dan a ben wani go tan na wan presi pe sma no ben o denki takru fu en, soso fu di a no ben gersi den èn fu di a ben de fu wan tra ras. A tron wan datra na ini wan foto na a noordsei fu Alaska, na Amerkankondre. Drape, furu fu den sikisma di a ben e yepi, ben gersi en. A ben howpu taki kande drape na ini a kowru kontren, sma no ben o denki takru fu en moro, wan sani di no ben switi srefisrefi.

A lasi a howpu dati di a ben e yepi wan uma di ben abi 25 yari. Di na uma disi komoto na ini wan coma, dan a luku Jonathan en fesi èn a kosi wan dotitaki di sori fa a ben e teige Koreasma. A sani disi hati Jonathan èn a kon si taki ala a muiti di a ben meki fu froisi èn fu moksi nanga tra sma ben de fu soso, bika sma ben e denki takru fu en ete.

 A sani di miti Jonathan na wan sari tori, ma a tru. Na ala presi na grontapu sma e denki takru fu trawan. Soleki fa a sori, dan ala presi pe libisma de, yu abi sma di e denki takru fu trawan.

Aladi sma na ala sei e denki takru fu trawan, toku furu sma feni taki a sani dati no bun. A sani disi muilek fu frustan. Fa a kan taki wan sani di furu sma no feni bun panya so na ala sei? A de krin taki furu sma di e taki dati a no bun fu denki takru fu trawan, no e si taki den srefi e du dati. Na so a de tu nanga yu? Fa yu ben o piki na aksi dati?

Wi alamala musu agri taki a muilek fu kon sabi efu wi e denki takru fu trawan na ini wi ati. Bijbel e sori fu san ede dati de so. A e taki: „Na ati na a moro bedrigi sani di de” (Yeremia 17:9). Sobun, wi ben kan kori wisrefi te wi e bribi taki wi lobi ala sortu sma. Noso wi ben kan denki taki wi abi bun reide fu denki takru fu sma fu wan spesrutu grupu.

Kande yu feni taki yu no e denki takru fu trawan dipi na ini yu ati. Wi o poti prakseri na wan situwâsi fu kon si efu dati de so. Kon meki wi taki dati a sani disi e miti yu: Wan neti, yu wawan e waka na ini wan dungru strati. Tu yonkuman di yu no sabi e waka kon miti yu. Den na bigiskin man èn a gersi leki wan fu den abi wan sani na ini en anu.

Yu feni taki den tu man disi o wani du yu wan ogri? Kande den sani di yu ondrofeni na ini yu libi e gi yu a firi taki yu musu luku bun. Ma den sani dati e gi yu reide fu denki taki den tu man disi wani du yu wan ogri? Wan moro prenspari sani di wi ben musu aksi wisrefi na disi: ’Fu sortu ras noso kulturu yu denki taki den man disi de? A fasi fa yu o piki na aksi dati kan sori krin fa yu e denki fu sma. A kan sori kaba efu yu e denki takru fu trawan.

Efu wi no wani hori wisrefi na spotu, dan wi musu agri taki son leisi wi alamala abi wan fowtu denki fu trawan. Srefi Bijbel e sori fu san ede furu sma abi wan fowtu denki fu trawan. A e taki: „Libisma e si soso san na ai e si” (1 Samuel 16:7). Fu di wi alamala abi a gwenti dati di nofo tron e tyari bigi problema kon, meki wi e aksi wisrefi efu howpu de taki oiti wi no o desko trawan moro. Oiti wan ten o kon te nowan sma na grontapu o denki takru fu trawan?