Na ini a yari 33, Yesus dede, a wiki baka, èn a opo go na hemel. Wan heri pisi ten baka dati, Yesus kisi a makti fu tiri leki Kownu (Danièl 7:13, 14). Na ini a ten di e kon, Yesus o gebroiki a makti di a abi leki Kownu fu tyari freide kon na grontapu èn fu tyari wan kaba kon na pina.—Leisi Psalm 72:7, 8, 13.

Yesus o du kefalek moi sani te a o tiri libisma. A o gebroiki a makti di en Tata gi en fu puru ala sondu fu libisma. Den o nyan bun fu a libi na grontapu sondro taki den e kon owru èn dede.—Leisi Yohanes 5:26-29; 1 Korentesma 15:25, 26.

Nownow Yesus e tiri a preikiwroko di den tru bakaman fu en e du na heri grontapu. Den e go na sma fu sori den san Bijbel e taki fu Gado Kownukondre. Yesus ben taki dati a ben o tan horibaka gi a wroko fu den disipel fu en teleki Gado Kownukondre pori den tirimakti fu libisma.—Leisi Mateyus 24:14; 28:19, 20.

Nanga yepi fu a tru Kresten gemeente, Yesus e yepi sma fu kon abi wan moro bun libi. A o tan yepi den teleki den pasa a pori fu a grontapu disi go na ini a nyun grontapu di Gado pramisi.—Leisi 2 Petrus 3:7, 13; Openbaring 7:17.