Nawungaba senkingeni, bewungatsandza yini kutsi umngani wakho akusite? Bacabanga ngaloko, labanye batsi Nkulunkulu akusuye umngani ngobe kute labentela kona. Liciniso likutsi Nkulunkulu sewuvele usentele tintfo letisisitako futsi masinyane utawutsatsa tinyatselo kute acedze kuhlupheka netinkinga lesinato lamuhla. Ngutiphi letintfo latasentela tona?

Nkulunkulu utawucedza bonkhe bubi ngekutsi asuse umsuka wabo. LiBhayibheli liyawuveta lomsuka webubi nalitsi: “Lonkhe live lisemandleni alomubi.” (1 Johane 5:19) Jesu watsi lolomubi nguSathane Develi ‘umbusi walelive.’ (Johane 12:31) Umoya waSathane losebenta kubantfu nguwo lobangela bubi lobusihluphako. Yini Nkulunkulu latawuyenta ngalesimo?

Madvutane Nkulunkulu Jehova utawusebentisa iNdvodzana yakhe, Jesu Khristu, kute “amente lite” Develi lobangela kufa. (Hebheru 2:14; 1 Johane 3:8) Ecinisweni, liBhayibheli litsi naSathane uyati “kutsi unesikhatsi lesincane” ngaphambi kwekutsi abhujiswe. (Sembulo 12:12) Nkulunkulu utawuphindze abhubhise bonkhe bantfu labenta lokubi.—Tihlabelelo 37:9; Taga 2:22.

Nasekacedzile kususa bonkhe bubi emhlabeni, uMdali wetfu utawubese wenta loko lebekakuhlosile ekucaleni mayelana nemhlaba nangebantfu. Yini lesilangatelela kuyibona kulomhlaba lomusha?

Kuthula nekulondzeka lokungapheli. “Labamnene bayawulidla lifa lemhlaba, bahlale kahle, batijabulise ngekuthula lokukhulu.”—Tihlabelelo 37:11.

Inala yekudla lokunemphilo. “Shangatsi kungaba nenala emasimini, lenala isibekele ticongo tetintsaba, kube tiphihli.”—Tihlabelelo 72:16.

Emakhaya lamahle nemsebenti lojabulisako. “Bantfu bayakwakha tindlu, bahlale kuto, bayawuhlanyela tivini, badle titselo tato. . . . Labakhetsiwe bami bayawutijabulisa sikhatsi lesidze ngemisebenti yetandla tabo.”—Isaya 65:21, 22.

Ungatsandza yini kuphila endzaweni lenjalo? Madvutane-nje loko kutawujatjulelwa ngibo bonkhe bantfu.

Lamuhla bonkhe bantfu bahlaselwa kugula nekufa, kodvwa madvutane loko kutawuphela. Nkulunkulu utawusebentisa inhlawulo yaJesu kute ‘wonkhe umuntfu lokholwa nguye angabhubhi, kodvwa atfole kuphila lokuphakadze.’ (Johane 3:16) Loko kutawuba namuphi umphumela?

Angeke kuphindze kube khona kugula. “Kute lohlala eSiyoni loyakutsi: “Ngiyagula,” netono talabo labahlala khona tiyawutsetselelwa.”—Isaya 33:24.

Kufa angeke kuphindze kuhlasele bantfu. “Amite kufa phakadze naphakadze. Somandla longuSimakadze uyawukwesula tinyembeti kubo bonkhe buso; uyawususa lihlazo lesive sakhe emhlabeni wonkhe.”—Isaya 25:8.

Bantfu batawuphila phakadze. “Sipho Nkulunkulu lasinika sona, kuphila lokuphakadze ngaKhristu Jesu iNkhosi yetfu.”—Roma 6:23.

Labafile batawuvuswa. “Kutawuba neluvuko lwalabalungile nalabangakalungi.” (Imisebenti 24:15) Loku Nkulunkulu utakwenta asebentisa sipho senhlawulo yaJesu.

Nkulunkulu utakwenta njani konkhe loku lesesicoce ngako?

Nkulunkulu utawufeza injongo yakhe ngemhlaba nangebantfu asebentisa hulumende wakhe, ngaJesu Khristu iNkhosi layibekile. (Tihlabelelo 110:1, 2) Lona ngulohulumende noma nguloMbuso Jesu lafundzisa balandzeli bakhe kutsi bawuthandazele batsi: “Babe wetfu losezulwini, . . . UMbuso wakho awute.”—Matewu 6:9, 10.

UMbuso waNkulunkulu uyawubusa umhlaba wonkhe ucedze konkhe kuhlupheka nebuhlungu. LoMbuso unguhulumende loyendlula yonkhe imibuso leke yabakhona! Kungaleso sizatfu Jesu Khristu asebenta kamatima kute amemetele “tindzaba letimnandzi teMbuso” futsi watjela bafundzi bakhe kutsi nabo bente lokufanako.—Matewu 4:23; 24:14.

Ngesizatfu sekutsi Nkulunkulu ubatsandza kakhulu bantfu, ubatsembise tonkhe letintfo letinhle. Loku akukwenti yini ufune kusondzela kuye futsi ufune nekumati? Nangabe usondzela kuye, utawusitakala kanjani? Sihloko lesilandzelako sitawucoca ngaloko.