Ngalelinye lilanga kuliSontfo ntsambama, Kenneth naFilomena labahlala eCuraçao, baya ekhaya lalabanye lebebashadene, bayotadisha nabo liBhayibheli.

Kenneth utsi, “Nasifika umnyango bewuvaliwe futsi nemoto beyingekho ngephandle. Sisengakahambi, kunentfo leyatsi asishayele lowesifazane ecingweni lakhe.”

Lowesifazane waluphendvula lolucingo futsi wabatjela kutsi indvodza yakhe isemsebentini. Nobe kunjalo, ngesikhatsi lowesifazane ababona boKenneth naFilomena kutsi basemnyango, wabavulela futsi wabangenisa ngekhatsi.

Ngekushesha nje babona kutsi bekakhala. Ngesikhatsi Kenneth athantaza ngaphambi kwekucala sifundvo sabo seliBhayibheli, lowesifazane wacala kukhala. Ngako boKenneth naFilomena ngemusa bambuta kutsi beyiyini inkinga yakhe.

Lowesifazane wabachazela kutsi ngesikhatsi Kenneth ashaya lucingo, bekabhalela umyeni wakhe incwadzi yekumvalelisa njengobe bekahlela kutibulala kuleyo ntsambama. Wabatjela kutsi bekacindzeteleke kakhulu, ngako bamfundzela imiBhalo yekumdvudvuta. LeyomiBhalo yakusindzisa kuphila kwakhe.

Kenneth utsi, “Sibonga Jehova * ngekusivumela kutsi sisite lowesifazane lobekakhatsatekile futsi ikakhulukati ngekutsintsa tinhlitiyo tetfu​—mhlawumbe ngengilosi nobe ngemoya waKhe longcwele—​kutsi simshayele lucingo!”

Bacinisile yini boKenneth naFilomena nabatsi nguNkulunkulu lowabacondzisa kulowesifazane mhlawumbe asebentisa ingilosi, umoya wakho longcwele nobe emandla lamakhulu? Kungenteka yini kushaya kwaKenneth lolocingo kwamane nje kwacondzana naleso simo?

Site timphendvulo talemibuto. Nobe kunjalo, siyati kutsi Nkulunkulu uyatisebentisa tingilosi takhe kuze asite bantfu babe nebuhlobo lobuhle naye. Sibonelo saloku, liBhayibheli litsi Nkulunkulu watfumela ingilosi yakhe kutsi icondzise umKhristu lebekangumvangeli, Filiphu, kutsi ayosita indvuna yesigodlo lengumTopiya lebeyifuna kucondza loko lokushiwo liBhayibheli.​—Imis. 8:26-31.

Tinkholo letehlukahlukene tikhutsata bantfu kutsi bakhonte letidalwa temoya letinemandla lamakhulu, labatichaza ngekutsi tidalwa letilungile letenta intsandvo yaNkulunkulu nobe tigadze umuntfu ngamunye. Bantfu labanyenti abakholelwa nje kuphela kutsi tingilosi tikhona, kodvwa baphindze bakholelwe nekutsi tiyabasita kute baphumelele. Nobe kunjalo, kunalabanye labanyenti labangakholelwa kwasanhlobo etingilosini.

Tikhona mbamba yini tingilosi? Nangabe tikhona, tivelaphi? Ngukuphi lokuliciniso ngetingilosi? Tiyakutsintsa yini kuphila kwetfu? Asesicoce ngemaciniso laseBhayibhelini mayelana netingilosi.