1, 2. Kubaluleke ngani kucabangisisa ngesifiso sakho sekutsetselela?

LIVI laJehova lisisita sifundze ngembono wakhe ngesono nangendlela lativa ngayo nasenta sono. LiVi lakhe liphindze lisifundzise lokunyenti mayelana nekutsetselela. Esihlokweni lesendlulile, besinake kakhulu kutsi simo saDavide naManase sakutsintsa njani kutsetselela kwaJehova. Kutisola kwabo, nebuhlungu lobusuka enhlitiyweni ngaloko lebebakwentile kwabenta bativuma tono tabo, batishiya tento tabo letimbi futsi baphendvuka ngebucotfo. Ngekwenta kwabo njalo, Jehova wabemukela ngemusa wakhe.

² Asesihlole indzaba yekutsetselela kulesinye simo. Ucabanga kutsi bewungativa njani kube labanye bebantfu labaphatfwa kabi nguManase bebatihlobo takho? Bewutawukhona yini kumtsetselela Manase? Lowo ngumbuto lobalulekile lamuhla ngobe siphila eveni lelephula umtsetfo, lelinebudlova nalelinebugovu. Ngako-ke, yini leyenta kudzingeke kutsi umKhristu abe nesimo sekutsetselela? Nangabe uphatfwa kabi, yini lengakusita kutsi ukhone kutibamba, wente ngendlela Jehova lafuna ngayo futsi utsetselele?

3-5. (a) Ngumuphi umfanekiso Jesu lawusebentisa kute asite tilaleli takhe ticabange ngesidzingo sekutsetselela? (b) Nguliphi liphuzu lelivetwa ngumfanekiso waJesu lobhalwe kuMatewu 18:21-35?

³ Sifiso sekutsetselela labo labasonako—kungaba ngemalunga elibandla lebuKhristu nobe labanye—sibalulekile kute silondvolote budlelwane lobunekuthula nemalunga emndeni, bangani, nalabanye bantfu naJehova. ImiBhalo ikhombisa kutsi emaKhristu kufanele abe nesifiso sekutsetselela labanye ngisho nobe babona kangakanani. Jesu wasebentisa umfanekiso lomayelana nesisebenti lesasikweleda kute akhombise kutsi kubaluleke ngani loko.

 ⁴ Lesisebenti besikweleda inkhosi yaso imali lelingana umholo wesisebenti wemalanga langu-60 000 000. Nobe kunjalo, inkhosi yaso yasesula lesikwelede. Ngemuva kwaloko, lesisebenti saphuma futsi sahlangana nalesinye sisebenti lebesikanye naso lebesisikweleda imali lelingana umholo wemalanga langu-100 kuphela. Lesisebenti sancenga kutsi asibeketelele, kodvwa lesisebenti lebesitsetselelwe sikweledi saso sasifaka ejele. Leso simo sayitfukutselisa inkhosi yato, yatsi: “Wena awukasihawukeli ngani lesisebenti lesikanye nawe, njengobe nami ngikuhawukele? Inkhosi yaso yatfukutsela yabila yasinikela kubaphatsi belijele [lesisebenti lesingatsetseleli], size sikhokhe sonkhe sikwelede.”—Mat. 18:21-34.

⁵ Nguliphi liphuzu Jesu laliveta ngalomfanekiso? Wawephetsa ngekutsi: “Kanjalo-ke naBabe wami wasezulwini uyawukwenta loko kini naningatsetseleli bazalwane benu ngetinhlitiyo letiphelele.” (Mat. 18:35) Liphuzu laJesu licacile. Tono lesitentile ekuphileni kwetfu njengobe sinesono, tiniketa bufakazi bekutsi angeke sifike ezingeni letimiso taJehova. Nobe kunjalo, utimisele kusitsetselela futsi awesule emaphutsa etfu. Ngako-ke, nobe ngubani lofisa kuba nebungani naJehova kufanele awatsetselele emaphutsa alabanye bantfu. Kunjengobe Jesu asho eNshumayelweni yaseNtsabeni: “Nangabe niyabatsetselela bantfu tono tabo, neYihlo losezulwini uyakunitsetselela. Kodvwa naningabatsetseleli bantfu tono tabo, neYihlo angeke anitsetselele tono tenu.”—Mat. 6:14, 15.

6. Yini lebangela kutsi kungabi melula ngaso sonkhe sikhatsi kutsetselela?

⁶ Kungenteka utsi ‘kumelula kukusho loko kunekukwenta.’ Loko kungabangelwa kutsi nangabe sikhubekile, kusuke kutsintseke imiva yetfu. Umuntfu angahle atfukutsele, ative alahliwe, afise kutsi kwentiwe kulunga nobe kutiphindziselela. Ecinisweni, labanye bacabanga kutsi angeke baze bakhone kuphindze bamtsetselele loyo muntfu. Nangabe utiva ngaleyondlela, ungaba naso njani simo Jehova lasifunako sekutsetselela?

7, 8. Yini lengakusita kutsi wente ngendlela lekhombisa kutsetselela nangabe uphatseke kabi ngesento salomunye sekungabi nemusa?

⁷ Nawuphatseke kabi nobe nawucabanga kutsi lomunye umuntfu ukukhubile, indlela lotiva ngayo ingaba nemandla kakhulu. Cabanga ngendlela lelinye lijaha lelativa ngayo, njengobe ichazwa lucwaningo lolwentiwa mayelana nekutfukutsela: “Ngalelinye lilanga . . . ngitfukutsele kakhulu, ngaphuma endlini futsi ngafunga kutsi angeke ngiphindze ngibuye. Belibalele kamnandzi ngalelolanga futsi kungusehlobo, ngahamba indlela lendze emgwacweni lomuhle kwate kwaba ngulapho loko kuthula nebuhle bungehlisa umoya. Ngemuva kwema-awa lambalwa ngabuyela emuva ngiphendvukile futsi ngitiva ngincono.” Njengobe lokulandzisa kukhombisa, kutinika sikhatsi sekwehlisa umoya nekusicabangisisa kahle simo lokuso, kungakusita kutsi ukubalekele kungatsetseleli longahle utisole ngako ngekuhamba kwesikhatsi.—Hla. 4:4; Taga 14:29; Jak. 1:19, 20.

⁸ Kutsiwani-ke nangabe ingapheli imiva lebuhlungu? Yetama kubona kutsi yini lekuvisa buhlungu. Kungenteka yini kubangelwa kutsi uphatseke kabi nobe awukacatjangelwa? Nobe kungenteka ucabanga kutsi lona lomunye umuntfu ukukhube ngenhloso? Indlela lente ngayo beyiyimbi kangako yini? Kuhlolisisa nekucondza indlela lotiva ngayo kutakusita ubone kutsi nguyiphi indlela lencono nalesekelwe emiBhalweni lokufanele wente ngayo. (Fundza Taga 15:28; 17:27.) Kucabanga lokunjalo kungakusita kutsi ube nembono lomuhle futsi ube nesifiso sekutsetselela. Ngekusebentisa lendlela, ngisho nobe kungaba matima ngaletinye tikhatsi, usuke uvumela livi laNkulunkulu kutsi lihlolisise “imicabango netifiso tenhlitiyo” yakho futsi likucondzise ekulingiseni simo sekutsetselela saJehova.—Heb. 4:12.

9, 10. (a) Yini longayenta nawucabanga kutsi lotsite ukuphetse kabi? (b) Kuba nembono lomuhle nemoya wekutsetselela kungayishintja njani indlela lobuka ngayo timo ekuphileni?

⁹ Timo letinyenti ekuphileni tingasibangela kutsi sitfukutsele. Nasi sibonelo: Asesitsi ushayela imoto yakho, bese lenye imoto icishe iyakushayisa. Ungenta njani? Kungenteka uke wafundza ngetimo lapho umuntfu atfukutsela engotini yemgwaco, aze amshaye lona lomunye umshayeli. Nobe kunjalo, njengobe ungumKhristu angeke uze uyente intfo lenjalo.

¹⁰ Kungaba ncono kakhulu kutinika sikhashana sekucabangisisa ngendzaba. Kungenteka kutsi nawe likhona liphutsa lolentile, ngobe uphatamiswe ngulokutsite. Nobe kungenteka kutsi lona lomunye umshayeli ube nenkinga ngemoto yakhe. Liphuzu lalesibonelo likutsi singakunciphisa kutfukutsela, kukhubeka naleminye imiva lemibi nasikhombisa kucondza, kuba nengcondvo levulekile nesifiso sekutsetselela. Umshumayeli 7:9 utsi: “Ungasheshi ucansuke emoyeni wakho, ngobe intfukutselo ihlala esifubeni sesilima.” Ungasheshi utfukutseliswe ngunobe yini leyentekako. Etikhatsini letinyenti loko lesisuke sicabanga kutsi kwentiwe ngenhloso kusuke kungesinjalo; kumane kungumphumela wekuba nesono nobe kungayicondzi indzaba. Yetama kuba nengcondvo levulekile mayelana netento nobe emavi langakhombisi umusa futsi ube nesifiso sekutsetselela ngelutsandvo. Nawuphumelela kukwenta loko utawujabula.—Fundza 1 Phetro 4:8.

11. Indlela bantfu labawulalela ngayo umlayeto wetindzaba letimnandzi kufanele isitsintse njani njengebashumayeli beMbuso?

¹¹ Ungakukhombisa njani kutibamba nangabe lotsite akuphendvula kabi nawenta umsebenti wekushumayela? Ngesikhatsi  Jesu atfuma bashumayeli labangu-70, wabatjela kutsi bayifisele kuthula yonkhe indlu labangena kuyo. Jesu watsi: ‘Nangabe lapho kuhlala umuntfu wekuthula, kuthula kwenu kutawuhlala kuye; nangabe akunjalo, loko kuthula kwenu kutawubuyela kini.’ (Luk. 10:1, 5, 6) Siyajabula nangabe bantfu bawulalela umlayeto lesiwushumayelako, ngobe loko kungabazuzisa. Nobe kunjalo, etikhatsini letinyenti abakukhombisi kuba nekuthula. Yini-ke lokufanele siyente? Jesu watsi kuthula lebesikufisela leyondlu kufanele kubuyele kitsi. Kunobe ngusiphi simo, kufanele sikwati kushiya leyondlu sinekuthula etinhlitiyweni tetfu, ngisho nobe bantfu bangasiphatsa njani. Nangabe siva buhlungu ngendlela bantfu labenta ngayo, angeke sikhone kulondvolota kuthula kwetfu.

12. Ngekusho kwemavi aPawula laku-Efesu 4:31, 32, yini lokufanele siyente?

¹² Yetama kulondvolota kuthula kwakho kuto tonkhe timo, hhayi nje emsebentini wekushumayela. Kuliciniso kutsi sifiso sekubatsetselela labanye asisho kutsi kufanele uvumele nekutiphatsa lokungakalungi nobe wente shengatsi kute lokwentekile. Kutsetselela kusho kukwendlulisa kutfukutselela kuphatfwa kabi nekulondvolota kuthula kwakho. Labanye bantfu bavumela kutiphatsa kwalabanye kubanciphisele injabulo, ngekutsi bahlale bacabanga ngetintfo letimbi nangekutsi baphatseke kabi kangakanani. Ungayivumeli imicabango lenjalo ikulawule. Khumbula kutsi angeke ujabule nangabe uhlala utfukutsele. Ngako-ke, batsetselele labanye.—Fundza Efesu 4:31, 32.

13. (a) UmKhristu ‘angamtsela njani ngemahloni ekutisola’ umuntfu lositsa? (b) Ungaba yini umphumela wemphendvulo lenemusa nangabe uphatseke kabi?

¹³ Kungenteka ngaletinye tikhatsi ucabange kutsi ungamsita umuntfu lobekakuphetse kabi kutsi emukele timiso tebuKhristu. Umphostoli Pawula wabhala kutsi: “Nangabe sitsa sakho silambile, siphe kudla, nangabe somile, sinatsise; ngobe ngekwenta njalo utawube umtsela ngemahloni ekutisola. Ningehlulwa ngulokubi, kodvwa yehlulani lokubi ngalokuhle.” (Rom. 12:20, 21) Ngekuba nemusa nawuphetfwe kabi ungenta nesimo lesilukhuni sibe ncono futsi wente bantfu bavete buhle babo. Ngekukhombisa kucondza neluvelo—ngisho nesihe—kumuntfu lokonile, ungakhona kumsita kutsi afundze emaciniso eliBhayibheli. Kunobe ngusiphi simo, imphendvulo lenemusa iniketa lona lomunye umuntfu litfuba lekucabanga ngekutiphatsa kwakho lokuhle.—1 Phet. 2:12; 3:16.

14. Ngisho nobe umuntfu akuphetse kabi kangakanani, yini leyenta kungabi kuhle kutsi uhlale utfukutsele?

¹⁴ Kuletinye timo, angeke kufaneleke kutsi ube nebudlelwane nebantfu labatsite. Loku kungafaka ekhatsi labo labake baba yincenye yelibandla kodvwa base benta sono, bangaphendvuki futsi bayekeliswa kuba boFakazi. Nangabe umuntfu lonjalo akukhubile, kungaba matima kakhulu kumtsetselela, ngisho nobe angaphendvuka ngobe buhlungu benhlitiyo bungatsatsa sikhatsi kuphela. Etimeni letinjalo, ungachubeka ucela Jehova kutsi akusite ube nemoya wekutsetselela leso soni lesiphendvukile. Ungakwati njani loko lokusenhlitiyweni yalomunye umuntfu? NguJehova lokwatiko. Uhlolisisa tinhloso letingekhatsi kumuntfu futsi uyababeketelela bantfu labenta sono. (Hla. 7:9; Taga 17:3) Kungako imiBhalo itsi: “Ningabuyiseli kunobe ngubani lokubi ngalokubi, kodvwa yentani lokubonakala kukuhle emehlweni abo bonkhe bantfu. Nakunekwenteka, yentani konkhe lokusemandleni enu kutsi nihlalisane ngekuthula nebantfu bonkhe. Bazalwane bami, ningatiphindziseleli, kodvwa yekelelani konkhe elulakeni lwaNkulunkulu; ngobe kubhaliwe kutsi: ‘Kuphindzisela ngekwami, mine ngiyawubuyisela,  kusho iNkhosi [Jehova].’” (Rom. 12:17-19) Ungamehlulela kahle yini lomunye umuntfu? Angeke. (Mat. 7:1, 2) Longaciniseka ngako kutsi Nkulunkulu wehlulela kahle.

15. Yini lokufanele siyikhumbule ngalabo labasonako?

¹⁵ Nangabe ucabanga kutsi umuntfu lotsite ukuphetse kabi futsi ukubona kumatima kumtsetselela nakaphendvuka, kungaba kuhle kukhumbula kutsi naye loyo muntfu kukhona lokumhluphako. Naye ubhekene nemiphumela yekuba nesono. (Rom. 3:23) Jehova ukhombisa sihe kubo bonkhe bantfu labanesono. Ngako-ke, kuhle kumthantazela loyo lokonile. Angeke sichubeke simtfukutselele umuntfu lesesimthantazele. Emavi aJesu akuveta ngalokucacile kutsi akukafaneli sihlale sitfukutselele labo labasiphatsa kabi, Jesu watsi: “Tsandzani titsa tenu, nibakhulekele labanitingelela kunihlupha.”—Mat. 5:44.

16, 17. Kufanele wente njani nangabe labadzala labangemaKhristu babona kutsi soni siphendvukile, futsi yini lengakubangela wente njalo?

¹⁶ Ngekuvumelana nentsandvo yaJehova, labadzala labangemaKhristu baniketwe umsebenti wekwehlulela emacala alabatsite labente sono ebandleni. Labazalwane bete kucondza lokufana nekwaNkulunkulu, kodvwa betama kwenta tincumo letivumelana nesicondziso lesivela eVini laNkulunkulu baholwa ngumoya wakhe longcwele. Ngako-ke, tincumo labatentako ngemuva kwekucela lusito lwaJehova ngemthantazo tiveta umbono waNkulunkulu ngaleyondzaba.—Mat. 18:18.

¹⁷ Kwetsembeka kubalulekile kulendzaba. Utawubatsetselela yini futsi ubacinisekise ngelutsandvo lwakho labo labaphendvukile? (2 Khor. 2:5-8) Kungenteka kungabi melula kwenta njalo, ikakhulukati nangabe loyomuntfu abephetse wena nobe sihlobo sakho kabi. Nobe kunjalo, ngekwetsembela kuJehova nasendleleni yakhe yekulungisa tinkinga ebandleni, utawukhona kwenta ngekuhlakanipha. Utawukhombisa kutsi vele utsetselela ngekukhululeka.—Taga 3:5, 6.

18. Ngutiphi tinzuzo longatitfola ngekutsetselela ngekukhululeka?

¹⁸ Tati tetemphilo tiyaticaphela tinzuzo tekuba nesifiso sekutsetselela. Kutsetselela kwehlisa imiva lebuhlungu lokungenteka ingekhatsi kuwe futsi lengabangela kugula. Kutfutfukisa imphilo lenhle nebuhlobo lobujabulisako nalabanye. Ungacatsanisa loko nemiphumela yekungabi nesifiso sekutsetselela—tinkinga temphilo, kuphela kwebuhlobo lobuhle nalabanye, kukhatsateka nekungakhulumisani kahle. Sibusiso lesibaluleke kakhulu sekutsetselela kuba nebuhlobo lobuhle naBabe wetfu wasezulwini, Jehova.—Fundza Kholose 3:12-14.