Kuhlanganisani Kwati Kahle Nkulunkulu?

LINAYO yini inchazelo libito lakho? Kuletinye tindzawo emhlabeni libito lichaza lokutsite. Kuyenteka kutsi batali bakhetse libito lelitsite kute bavete tifiso tabo kuloyo mntfwana. Ngaphandle kwetifiso labanato kanye nesimilo labafisa abe naso, liphindze livete labafisa akwente nasekamdzala loyo mntfwana.

Lomkhuba lomuhle wekwetsa umuntfu libito lelinenchazelo awucali. Ngesikhatsi kusabhalwa liBhayibheli, bantfu bebetsiwa emabito ngesizatfu saloko lokuchazwa ngulelobito. Emabito bekavame kuchaza loko lokugadvwe kutsi loyo muntfu akwente. Nasi sibonelo: Ngesikhatsi Jehova atjela Davide indzima lebeyitawentiwa yindvodzana yakhe lenguSolomoni, watsi: “Libito lakhe kuyawuba nguSolomoni [lelisho “Kuthula”]. Ngiyawunika ema-Israyeli kuthula nenhlalakahle ekubuseni kwakhe.”—1 Tikhronike 22:9.

Ngalesinye sikhatsi Jehova wanika lotsite libito lelisha ngobe bekufanele abe nendzima lensha latayenta. Umfati wa-Abrahama loyinyumba watfola libito lelisha lelitsi Sara, lelisho kutsi “iNkhosatana.” Kungani enta njalo? Jehova wachaza: “Ngiyawumbusisa, ngikunike indvodzana ngaye. Ngiyawumbusisa, abe ngunina wetive. Kuyawuvela kuye emakhosi etive.” (Genesisi 17:16) Kuyacaca kutsi nangabe ucondza kutsi kungani Sara atfola libito lelisha, loko kutawufaka ekhatsi kucondza indzima yakhe lensha.

Kodvwa kutsiwani ngelibito lelibaluleke kuwendlula onkhe lelitsi Jehova? Lisho kutsini? Ngalesikhatsi Mosi acela Nkulunkulu kutsi enabe ngenchazelo yelibito lakhe, Jehova waphendvula: “Nginguye Lenginguye.” (Eksodusi 3:14) Lihumusho laRotherham liyichaza kanjena lendzaba: “Ngitawuba ngunobe yini lengiyitsandzako.” Libito laJehova liveta kutsi Nkulunkulu angafeza tindzima letinyenti. Asesente umfanekiso lolula kulendzaba: Make kungadzingeka kutsi ente imisebenti leminyenti kute anakekele bantfwana bakhe—angaba ngumnakekeli, ngumlungiseleli wekudla kanye nemfundzisi—kuye ngekutsi yini ledzingekako ngaleso sikhatsi. Kufanana nse naloko lokwentiwa nguJehova, nanobe nje yena akwenta ngelizinga leliphakeme. Kute afeze tinjongo takhe ngebantfu, angaba ngunobe ngabe yini layifunako, ente nobe ngabe ngumuphi umsebenti lodzingekako. Ngako-ke, kwati Jehova ngelibito lakhe kufaka ekhatsi kucondza kanye nekuhlonipha imisebenti yakhe leminyenti.

Kuvisa buhlungu kwati kutsi labo labangamati ngelibito lakhe Nkulunkulu, abamati nekutsi ungumuntfu lonjani. Ngekufundza liBhayibheli, ungajabulela indzima yaJehova yekuba nguMeluleki lohlakaniphile, uMsindzisi lonemandla kanye Nemkhululi lonemusa uma nje sibala letimbalwa kuphela. Nembala inchazelo yelibito laJehova imangalisa kakhulu.

Kodvwa kwati Nkulunkulu ngelibito akusimelula ngaso sonkhe sikhatsi. Sihloko lesilandzelako sitawukhombisa kutsi kungani sisho njalo.