Ezra 1:1-11
1 Ngemnyaka wekucala wekubusa kwaKhuresi inkhosi+ yasePheresiya, Jehova watsintsa inhlitiyo yaKhuresi inkhosi yasePheresiya kutsi akhiphe simemetelo kuwo wonkhe umbuso wakhe futsi asibhale phansi,+ kute kugcwaliseke livi laJehova lelashiwo nguJeremiya.+ Lesimemetelo besitsi:
2 “Naku lokushiwo nguKhuresi iNkhosi yasePheresiya: ‘Jehova longuNkulunkulu wemazulu unginike yonkhe imibuso emhlabeni+ futsi ungitfume kutsi ngimakhele indlu eJerusalema+ lekaJuda.
3 Nobe ngubani lokhonta yena emkhatsini wenu nonkhe, akakhuphukele eJerusalema lekaJuda futsi shengatsi Nkulunkulu wakhe angaba naye. Abofike avusetele indlu yaJehova Nkulunkulu wema-Israyeli lebeyiseJerusalema.* Yena unguNkulunkulu weliciniso.
4 Nobe ngubani losihambi+ ngisho nobe ahlala kuphi, akasitwe bomakhelwane bakhe,* bamnike lisiliva neligolide, tipho nemfuyo, kanye nemnikelo wekutitsandzela wendlu yaNkulunkulu weliciniso+ lebeyiseJerusalema.’”
5 Ngemuva kwaloko, tinhloko tetindlu takaJuda netakaBhenjamini, baphristi kanye nemaLevi, nabo bonkhe labachutjwa ngumoya waNkulunkulu weliciniso, balungela kuhamba bayovusetela indlu yaJehova lebeyiseJerusalema.
6 Bonkhe bomakhelwane babo babasekela, babanika* titja telisiliva neteligolide, tipho, imfuyo kanye netintfo letiligugu, ngetulu kwayo yonkhe iminikelo yekutitsandzela lababanika yona.
7 INkhosi Khuresi yakhipha netitja tendlu yaJehova, leto Nebukhadnezari labetitsetse eJerusalema watifaka endlini yankulunkulu wakhe.+
8 Khuresi inkhosi yasePheresiya watfuma Mithredathi umphatsi timali kutsi akhiphe letintfo, futsi abhale luhla lwato walunika Sheshbasari*+ sikhulu sakaJuda.
9 Nalu luhla lwaletintfo: titja letingu-30 teligolide letimise kwabhasikidi, titja letingu-1 000 telisiliva letimise kwabhasikidi, titja letifanana nato letingu-29,
10 tindishi letincane teligolide letingu-30, tindishi letincane telisiliva letingu-410, naletinye titja letingu-1 000.
11 Setitonkhe letitja telisiliva neteligolide betingu-5 400. Sheshbasari wakhuphuka nato tonkhe ngesikhatsi labo lebebatfunjiwe+ baphuma eBhabhulona baya eJerusalema.
Imibhalo lengentansi
^ Kungaphindze kubekwe ngekutsi, “loseJerusalema.”
^ NgesiHebheru kutsi, “bantfu basendzaweni yakubo.”
^ NgesiHebheru kutsi, “bacinisa tandla tabo ngekubanika.”
^ Kungenteka nguZerubhabheli lokukhulunywa ngaye ku-Ezr 2:2; 3:8.