Kulandzisa KwaJohane 17:1-26
17 Jesu wakhuluma letintfo, wase ubuka ezulwini, watsi: “Babe, sikhatsi sesifikile. Khatimulisa indvodzana yakho kuze nayo itokukhatimulisa,+
2 khona itobanika kuphila lokuphakadze+ bonkhe labo loyinike bona,+ njengobe uyibeke ngetulu kwabo bonkhe bantfu.+
3 Kukwati* wena lokuphela kwaNkulunkulu weliciniso+ nekwati loyo lowamtfuma, lokunguJesu Khristu,+ kuholela ekuphileni lokuphakadze.+
4 Ngikukhatimulisile emhlabeni+ futsi ngiwucedzile umsebenti longitfume kutsi ngiwente.+
5 Ngako Babe ngikhatimulise, ungente ngibe seceleni kwakho, futsi ngibe nenkhatimulo lebenginayo live lisengekho.+
6 “Ngilente latiwa libito lakho kulabo lowanginika bona eveni.+ Bebabakho, wanginika bona, futsi balilalele* livi lakho.
7 Nyalo sebayati kutsi tonkhe tintfo longinike tona tivela kuwe;
8 ngobe ngibatjelile emavi longinike wona,+ futsi bawemukele, babese bayati kutsi ngitele kutomelela wena,+ bakholwa nekutsi ungitfumile.+
9 Ngiyabacelela; angiceleli live, kodvwa ngicelela labo longinike bona ngobe bakho,
10 nako konkhe lenginako kwakho, nekwakho kwami,+ futsi ngikhatinyulisiwe emkhatsini wabo.
11 “Mine angisekho eveni ngobe ngita kuwe, kodvwa bona baseseveni.+ Babe Longcwele, bavikele+ ngenca yelibito lakho longiphatsise lona, kuze babe munye* njengobe natsi simunye.*+
12 Ngesikhatsi ngisenabo bengibavikela+ ngenca yelibito lakho longiphatsise lona; futsi ngibalondvolotile, kute namunye kubo lolahlekile+ ngaphandle kwendvodzana yekubhujiswa,+ kuze kugcwaliseke umbhalo.+
13 Kodvwa mine ngita kuwe, futsi ngikhuluma letintfo eveni kuze nabo bagcwale lenjabulo lenginayo.+
14 Ngibanike livi lakho, kodvwa live libatondzile ngobe abasiyo incenye yelive,+ njengobe nami ngingesiyo incenye yelive.
15 “Angikuceli kutsi ubasuse eveni, kodvwa ngicela kutsi ubavikele ngenca yalomubi.+
16 Abasiyo incenye yelive+ njengobe nje nami ngingasiyo incenye yalo.+
17 Bangcwelise* ngeliciniso;+ livi lakho liliciniso.+
18 Njengobe nje wangitfuma eveni, nami ngibatfume eveni.+
19 Ngitigcina ngingcwele ngenca yabo, kuze nabo bangcweliswe ngeliciniso.
20 “Angiceleli laba kuphela, kodvwa ngicelela nalabo labatawukholwa kimi ngemuva kwekulalela labakufundzisako,
21 kuze bonkhe babe munye,+ njengobe nawe Babe umunye nami, nami ngimunye nawe,+ khona nabo batewuba munye natsi, nelive litewukholwa kutsi wena wangitfuma.
22 Ngibanike inkhatimulo longinike yona, kuze nabo babe munye njengobe natsi simunye.+
23 Mine ngimunye nabo futsi wena umunye nami, kuze nabo babe nebunye sibili,* khona live litewukwati kutsi wangitfuma nekutsi wabatsandza njengobe nami wangitsandza.
24 Babe, ngifuna kutsi labo longinike bona babe nami lapho ngikhona khona,+ kuze babone inkhatimulo lowanginika yona, ngobe wangitsandza lisengakasekelwa live.*+
25 Babe Lolungile, live alikwati, kodvwa mine ngiyakwati,+ nalaba sebayati+ kutsi wena wangitfuma.
26 Ngibafundzisile* ngelibito lakho, futsi ngitawuchubeka ngibafundzisa ngalo,+ kuze batsandzane ngendlela lowangitsandza ngayo, bese ngiba munye nabo.”+
Imibhalo lengentansi
^ Nobe “Kufundza ngawe.” NgesiGriki, leligama lisento lesichubekako.
^ Nobe “baligcinile.”
^ Nobe “nebunye.”
^ Nobe “sinebunye.”
^ Nobe “Tehlukanisele bona; Bente babe ngcwele.”
^ Nobe “babe nebunye lobuphelele.”
^ Loku kusho bantfwana ba-Adamu na-Eva.
^ NgesiGriki kutsi, “Ngibente balati.”
