Kulandzisa KwaLukha 14:1-35
14 Ngalelinye liSabatha, Jesu wahamba wayokudla emtini walesinye sikhulu sebaFarisi, futsi labo lebebalapho bebambukisisile.
2 Embikwakhe bekunendvodza lebeyinesifo sekuvuvuka.*
3 Ngako Jesu wabuta labo labati uMtsetfo kanye nebaFarisi watsi: “Kuvumelekile yini kwelapha ngeliSabatha?”+
4 Kodvwa abazange bamphendvule. Ngako wabamba lendvodza, wayelapha wase utsi ayihambe.
5 Ngemuva kwaloko watsi kubo: “Ngubani emkhatsini wenu lokutsi nangabe indvodzana yakhe nobe inkunzi yakhe igcumukela emgodzini+ ngeliSabatha angasheshi ayikhiphe?”+
6 Kodvwa behluleka kumphendvula.
7 Nakabona kutsi emadvodza lebekamenyiwe bekatikhetsela tindzawo letisembili,+ wawatjela umfanekiso watsi:
8 “Nawumenywe edzilini lemshado, ungahlali endzaweni lesembili.+ Ngobe kungenteka kunalotsite lomenyiwe lobaluleke kakhulu kunawe,
9 futsi loyo lokumemile utawuta naloyo muntfu kuwe, afike atsi: ‘Ngicela kuhlale nangu lapho.’ Ngako utawusuka unemahloni uye endzaweni lengemuva.
10 Kodvwa nawumenyiwe, hlala endzaweni lesemuva kuze umuntfu lokumemile ete kuwe, afike atsi: ‘Mngani wami, yani embili.’ Ngako wena utawuhlonishwa ngibo bonkhe labamenyiwe.+
11 Ngobe nobe ngubani lotiphakamisako utawutfotjiswa, futsi nobe ngubani lotitfobako, utawuphakanyiswa.”+
12 Ngemuva kwaloko watsi kulendvodza lebeyimmemile: “Nawente lidzili nobe sidlo sakusihlwa, ungamemi bangani bakho, bomnakenu, tihlobo takho nobe bomakhelwane bakho labanjingile, ngobe mhlawumbe ngalelinye lilanga nabo batakumema, ngaleyondlela utawube sewuwutfolile umvuzo wakho.
13 Kodvwa nawente lidzili, mema labeswele, labakhubatekile, labachutako nalabangaboni emehlweni,+
14 futsi utawujabula ngenca yekutsi ngeke bakumeme. Utawutfola umvuzo wakho nasekuvuswa+ labalungile.”
15 Nakeva loku, lomunye lobekamenyiwe watsi kuye: “Uyajabula loyo lotawudla* eMbusweni waNkulunkulu.”
16 Jesu watsi kuye: “Lenye indvodza beyente lidzili lelikhulu,+ yamema nebantfu labanyenti.
17 Kwatsi nasekushaye sikhatsi selidzili, yatfuma sisebenti sayo kutsi siye kulabamenyiwe sifike sitsi: ‘Wotani, ngobe konkhe sekulungile.’
18 Kodvwa bonkhe babeka taba.+ Wekucala watsi kulesisebenti: ‘Ngitsenge insimu futsi ngifuna kuyoyibona; ngiyacolisa, ngeke ngiphumelele.’
19 Lomunye watsi: ‘Ngitsenge tinkhomo letingu-10 futsi ngifuna kuyotihlola; ngiyacolisa, ngeke ngiphumelele.’+
20 Nalomunye watsi: ‘Ngisandza kushada, ngako-ke ngeke ngikhone kuta.’
21 Lesisebenti sabuyela emuva sayobikela inkhosi yaso. Lenkhosi yatfukutsela, yatsi kulesisebenti: ‘Hamba ngekushesha uye emigwacweni lemikhulu nasetindleleni telidolobha ubite labeswele, labakhubatekile, labangaboni emehlweni kanye nalabachutako.’
22 Nasesibuyile lesisebenti satsi: ‘Nkhosi, sengikwentile loko bewukushito, kodvwa indzawo isekhona.’
23 Ngako lenkhosi yatsi: ‘Hamba uye emigwacweni nasetindleleni, uncenge bantfu kutsi bete kuze indlu yami igcwale.+
24 Ngobe ngitsi kini: Kute namunye kulabantfu lebebamenyiwe lotawudla kulelidzili lami.’”+
25 Bekunesicumbi sebantfu lebesihamba naye, futsi wagucuka watsi kuso:
26 “Nangabe umuntfu eta kimi kodvwa angamtondzi* babe wakhe, make wakhe, umkakhe, bantfwana bakhe, bomnakabo, bodzadzewabo kanye nekuphila kwakhe,+ ngeke abe ngumfundzi wami.+
27 Nobe ngubani longavumi kuhlushwa* futsi angilandzele, ngeke abe ngumfundzi wami.+
28 Ngubani emkhatsini wenu lotsi nakafuna kwakha umbhoshongo angacali ahlale phansi abale tindleko kuze abone kutsi unako konkhe yini lokudzingekako kuze awucedze?
29 Nakangenti njalo angabeka sisekelo kodvwa ehluleke kuwucedza, bese lababukele bayamhleka,
30 batsi: ‘Lomuntfu wacala kwakha kodvwa wehluleka kucedza.’
31 Ikhona yini inkhosi letsi nayiyokulwa nalenye inkhosi emphini ingacali ihlale phansi ibukisise, kuze ibone kutsi ingayincoba yini lenkhosi lenemasotja langu-20 000 ngemasotja ayo langu-10 000?
32 Nayibona kutsi ngeke ikhone, itawutfumela emancusa kulelenye inkhosi isesekhashane kuze ayishweletele.
33 Ngendlela lefanako, umuntfu longatishiyi tonkhe tintfo lanato ngeke abe ngumfundzi wami.+
34 “Luswayi lumnandzi. Kodvwa naluphelelwa ngemandla alo, lawo mandla atawubuyiselwa ngani?+
35 Lusuke lungeke lusasetjentiswa emhlabatsini nobe emcubeni, futsi bantfu balulahla ngephandle. Lonendlebe levako akeve.”+
Imibhalo lengentansi
^ NgesiNgisi lesifo kutsiwa yi-dropsy nobe yi-edema, lokusifo lesibangelwa kutsi umtimba ube nemanti lamanyenti.
^ NgesiGriki kutsi, “lotawudla sinkhwa.”
^ Nobe “angamtsandzi kancane.”
^ Nobe “kutsatsa lugodvo.” Fundza Tinchazelo Temagama.
