Umshumayeli 3:1-22
3 Yonkhe intfo inesikhatsi sayo,Konkhe lokwentiwako lamhlabeni kunesikhatsi sako:
2 Kunesikhatsi sekutalwa* nesikhatsi sekufa;Kunesikhatsi sekuhlanyela nesikhatsi sekusiphula lokuhlanyelwe;
3 Kunesikhatsi sekubulala nesikhatsi sekuphilisa;Kunesikhatsi sekubhidlita nesikhatsi sekwakha;
4 Kunesikhatsi sekukhala nesikhatsi sekuhleka;Kunesikhatsi sekulila nesikhatsi sekujayiva;*
5 Kunesikhatsi sekusakata ematje nesikhatsi sekuwabutsisa ndzawonye;Kunesikhatsi sekubambana nigodlane nesikhatsi sekuyekelana;
6 Kunesikhatsi sekufuna nesikhatsi sekwemukela kutsi intfo ilahlekile;Kunesikhatsi sekubeka nesikhatsi sekulahla;
7 Kunesikhatsi sekudzabula+ nesikhatsi sekutfunga;Kunesikhatsi sekubindza+ nesikhatsi sekukhuluma;+
8 Kunesikhatsi sekutsandza nesikhatsi sekwenyanya;+Kunesikhatsi semphi nesikhatsi sekuthula.
9 Sisebenti sitfolani ngekutikhandla kwaso?+
10 Ngiwubonile umsebenti Nkulunkulu lawunike bantfu kutsi babe matasatasa ngawo.
11 Wente tonkhe tintfo taba tinhle* ngesikhatsi lesifanele.+ Ufake ngisho nebuphakadze etinhlitiyweni tabo; kodvwa bantfu abayuze bayicondze yonkhe* imisebenti yaNkulunkulu weliciniso.
12 Sengiyati kutsi kute lokuncono ngaphandle kwekutsi bantfu bajabule futsi bente lokuhle nabasaphila,+
13 nekutsi bonkhe bantfu kufanele badle, banatse futsi bajabule ngemsebenti wabo lomatima. Lesi sipho lesivela kuNkulunkulu.+
14 Sengiyati kutsi konkhe lokwentiwa nguNkulunkulu weliciniso kutawuhlala kukhona kuze kube phakadze. Kute lokungengetwa kuko futsi kute lokungasuswa kuko. Nkulunkulu weliciniso wente tonkhe tintfo ngalendlela kuze bantfu bamesabe.+
15 Nobe yini leyentekako ike yenteka futsi nobe yini letako seyike yefika;+ kodvwa Nkulunkulu weliciniso ufuna loko bekufunwa bantfu.*
16 Naku lokunye lengikubonile lamhlabeni: Lapho kufanele kwehlulelwe kahle khona, kwentiwa lokubi, nalapho kufanele kube nekulunga khona, kuba nebubi.+
17 Ngako ngatitjela ngatsi: “Nkulunkulu weliciniso utawehlulela labalungile nalababi,+ ngobe kunesikhatsi sako konkhe lokwentiwako nesikhatsi sawo wonkhe umsebenti.”
18 Ngaphindze ngafika esiphetfweni sekutsi Nkulunkulu weliciniso uvumela bantfu kutsi bavivinywe kuze babone kutsi bafana netilwane,
19 ngobe loko lokwenteka kubantfu kuyenteka nasetilwaneni, konkhe kunesiphetfo sinye.+ Njengobe nje nesilwane sifa, kanjalo nemuntfu uyafa futsi konkhe kunemoya lofanako.+ Ngako umuntfu kute lancono ngako kunesilwane, konkhe kulite.
20 Konkhe kuya endzaweni lefanako.+ Konkhe kuvela elutfulini,+ futsi konkhe kutawubuyela elutfulini.+
21 Ngubani lowatiko kutsi umoya webantfu wenyukela etulu yini, nekutsi umoya wetilwane wehlela emhlabatsini yini?+
22 Ngabona nekutsi kute lokuncono kwendlula kutsi umuntfu ajabule ngemsebenti lawentako,+ njengobe loko kungumvuzo wakhe; ngobe ngubani nje longamenta abone kutsi kutakwentekani nasekafile?+
Imibhalo lengentansi
^ Nobe “sekutala.”
^ NgesiHebheru kutsi, “sekugcumagcuma.”
^ Nobe “tahleleka kahle; taba kahle.”
^ NgesiHebheru kutsi, “kusukela ekucaleni kuze kube sekugcineni.”
^ Kungaphindze kubekwe ngekutsi, “lesekwengcile.”
