Ngemnyaka wemsebenti wanga-2021, a umhlaba wonkhe bewusolo uhlaselwe sifo se-COVID-19. Njengobe kuchazwe esihlokweni lesitsi “Kusita Emhlabeni Wonkhe Ngenca Yesifo Lesihlasele Umhlaba Wonkhe,” sisebentise tigidzi tema-dollar b etintfweni tekusita ngalesikhatsi salomkhuhlane saphindze samisa Emakomidi Lasita Nakuvele Tehlakalo langu-950.

 Ngesikhatsi lomkhuhlane usachubeka, labanye bazalwane nabodzadzewetfu emhlabeni wonkhe batsintfwa tehlakalo temvelo kanye netehlakalo letentiwe bantfu. Kuze isite kuletehlakalo letinjalo letingetulu kwa-200, iKomidi Yebachumanisi YeSigungu Lesibusako yaniketa imvume yekutsi kwengetwe 8 million wema-dollar emalini lebeyikhishwe kuze kusitwe nakuhlasele lomkhuhlane we-COVID-19. Asesibone kutsi iminikelo yenu isetjentiswe njani kuze kusitwe bantfu labatsintfwe tehlakalo letimbili takamuva.

 Nga-May 22, 2021, kwachuma intsabamlilo entsabeni iNyiragongo lese-Democratic Republic of the Congo. Ludzaka lolushisako lwabhidlita emakhaya, tikolwa kanye nelidamu lemanti. Akusilo loludzaka lolushisako kuphela lolwaba yingoti, kodvwa nelutfuli lolunebutsi lolwawela kulelidolobha laseGoma ngemuva kwekuchuma kwalentsaba nalo lwaba yingoti. Kwaba nekutamatama kwemhlaba lokuncane lokunyenti futsi bantfu labangetulu kwehhafu lebebahlala kulelidolobha bacelwa kutsi babaleke. Labanyenti babaleka, labanye baze bewela neluthaka baya eRwanda.

 Kulabo lababaleka bekunaBoFakazi BaJehova labacishe babe ngu-5 000. Emakhaya alabanye abhidlitwa ngulokuchuma kantsi alabanye agcekezwa ngemuva kwekutsi babaleke. EmaKomidi Ekusita laseRwanda naseDemocratic Republic of the Congo ngiwo lebekanake lomsebenti wekusita labazalwane betfu. Nayikhuluma ngalelinye lalamakomidi ekusita, ligatja laseCongo (Kinshasa) litsi: “Ngisho nobe bekunesiphitsiphitsi edolobheni ngaphambi kwekutsi kukhishwe umyalo wekutsi bantfu babaleke, lekomidi beseyivele icalile kuniketa bazalwane betfu kudla, emanti, tintfo tekulala, kanye netimphahla.” Kulelinye lidolobha labekuhlangene khona bazalwane betfu labangetulu kwa-2 000 lekomidi yekusita yamisa emathende, yabaniketa tifonyo, yaphindze yabachazela ngetindlela tekunciphisa ematfuba ekutfola i-COVID-19 kanye ne-cholera.

 Ngemuva kwetinyanga letintsatfu kwenteke lesehlakalo, bazalwane labasita nakuvele tehlakalo bese banikete bazalwane bendzawo kudla lokungetulu kwemathani langu-6 e-rice, emathani langu-6 emphuphu, emathani langu-3 emafutsa ekupheka kanye nemathani langu-3 emanti. Kuze kongiwe imali, ligatja lahlela kutsi kutsengwe kudla kulelive kunekutsi kutsengwe kudla lokudulile emaveni langesheya.

 “Besidvumatekile futsi sisebuhlungwini,” kusho lomunye dzadze indlu yakhe lensha leyabhidlitwa ngulokuchuma. Kodvwa umndeni wakhe watfola lusito ngetintfo lebewutidzinga kanye nekucinisa buhlobo bawo naJehova. Nyalo utsi: “Ngelusito lwaJehova, solo sisenako lesikudzingako. Sibonile kutsi Jehova uyasitfwalela umtfwalo wetfu aphindze awente ube melula.”

 Sekwendlule iminyaka leminyenti simo semnotfo saseVenezuela sisibi kakhulu. Bazalwane betfu kulelive babeketelela simo sekuphila lesimatima, kuswelakala kwekudla kanye nekwandza kwebugebengu. Nobe kunjalo, inhlangano yaJehova ayikabalahli.

 Emnyakeni wemsebenti lowendlulile, sasebentisa imali lengetulu kwa-150 million wema-dollar kuze sitsenge siphindze simikise kudla nensipho emindenini ledzingile. Ligatja laseVenezuela litsi: “Akusimelula kutfumela kudla lokungemathani langu-130 kuto tonkhe tincenye talelive njalo ngenyanga futsi sicinisekise kutsi bazalwane betfu labadzingile bayakutfola.” Kuze baciniseke kutsi lokudla akuboli, bazalwane betfu bavamise kutfumela kudla lokungasheshi konakale. Leligatja lichubeka litsi: “Sitsenga kudla lokunyenti ngebuningi nangesikhatsi lokukunyenti ngaso futsi kushiphile. Sibese sifuna indlela leshiphile yekukumikisa kubazalwane betfu.”

 Leonel, lolilunga leKomidi Lesita Nakuvele Tehlakalo eVenezuela uyawutsandza umsebenti wakhe. Utsi, “Lomsebenti wekusita ubaluleke kakhulu kimi. Ungisite kakhulu kusukela kwashona umkami lotsandzekako abulawa yi-COVID-19. Ngitigcina ngimatasa ngisita bazalwane labadzingile. Ngitibonele ngewami indlela Jehova lasigcina ngayo setsembiso sakhe sekungabalahli bantfu bakhe.”

 Lomunye umzalwane lowatfola lusito kantsi naye wake wasebenta ekomidini yekusita esikhatsini lesendlulile utsi: “Nyalo besekulitfuba lami lekutsi ngisitwe. Abazange basisite kuphela ngaloko besikudzinga, kodvwa bazalwane basita mine nemkami kutsi singakhatsateki futsi basinakekela, basidvudvuta baphindze basikhutsata.”

 Letinye tehlakalo tenteka ngaphandle kwesecwayiso. Nobe kunjalo, inhlangano yaJehova iyakhona kutfola iphindze itfumele tintfo tekusita ngekushesha. Konkhe loku kungenca yeminikelo yenu leniyentela umsebenti wemhlaba wonkhe. Letinye tindlela tekunikela tichazwe ku-website letsi donate.dan124.com. Sibonga kakhulu ngekwephana kwenu.