Emavi latsi “Alfa na-Omega” abhekisele kuNkulunkulu Jehova, longuSomandla. Lamavi avela eBhayibhelini tikhatsi letintsatfu.—Sembulo 1:8; 21:6; 22:13. a

 Emavi latsi Alfa na-Omega atinhlavu tekucala netekugcina tekubhala ngesiGriki, lulwimi lelasetjentiswa kuze kubhalwe incenye yeliBhayibheli leyatiwa kakhulu ngekutsi liThestamente Lelisha , lefaka ekhatsi incwadzi yeSembulo. Njengoba Alfa na-Omega kutinhlavu tekucala netekugcina telulwimi lwesiGriki, kusetjentiswa kwato kwentelwe kucacisa kutsi nguJehova kuphela losicalo nesiphetfo. (Sembulo 21:6) BekanguNkulunkulu Somandla kusukela esikhatsini lesingatiwa endvulo futsi utawuchubeka anguNkulunkulu Somandla kute kube phakadze naphakadze. Nguye kuphela lebekakhona “kusukela phakadze kuze kube phakadze.”—Tihlabelelo 90:2.

 LiBhayibheli lisebentisa lamagama kuNkulunkulu Jehova nakuJesu iNdvodzana yakhe, kodvwa ngetinchazelo letehlukene. Asesicoce nganati tibonelo letimbili.

•   Ku-Isaya 44:6, Jehova utsi: “Mine ngiwekucala newekugcina; ngaphandle kwami kute Nkulunkulu.” Lapha Jehova ugcizelela kutsi unguNkulunkulu weliciniso kuze kube phakadze; futsi ngaphandle kwakhe kute lomunye. (Dutheronomi 4:35, 39) KulemiBhalo le, emavi latsi “ngiWekucala neWekugcina” anenchazelo lefanako nalatsi “ngingu-Alfa na-Omega.”

•   Ngetulu kwaloko, ligama lelitsi “Wekucala [pro’tos, hhayi alfa] nalelitsi Wekugcina [e’skha·tos,hhayi omega]” livela kuSembulo 1:17, 18 naku-2:8. Umongo walamavesi ukhombisa kutsi lona lokukhulunywa ngaye wafa waphindze wavuka. Ngaleyo ndlela, lamavesi angeke nanini abhekisele kuNkulunkulu ngobe akazange sekafe. (Habakhuki 1:12) Ngalokwehlukile kuloko, Jesu yena wafa waphindze wavuswa. (Imisebenti 3:13-15) Waba ngumuntfu wekucala kutsi avuselwe emtimbeni wemoya longafi ezulwini, lapho aphila khona nyalo futsi utawuphila “phakadze naphakadze.” (Sembulo 1:18; Kholose 1:18) Ngemuva kwaloko, konkhe kuvuswa kwebantfu labafile bese kutawukwentiwa nguye. (Johane 6:40, 44) Ngaleyo ndlela, kwaba nguye umuntfu wekugcina lowavuswa nguJehova lucobo lwakhe. (Imisebenti 10:40) Ngalomcondvo, Jesu angabitwa kufanele kutsi “Wekucala neWekugcina.”

 Abukho. Lokhuluma lamavi lakuSembulo 22:13, akavetwa kutsi ungubani futsi banyenti bantfu labakhulumako kulesehluko. Naku lokushiwo nguProfesa William Barclay ngalencenye yencwadzi yeSembulo: “Tintfo atikabhalwa ngekulandzelana kwato; . . . ngaleyondlela kulikhuni kusho kutsi ngubani lokhuluma lamavi.” (The Revelation of John, Volume 2, Revised Edition, likhasi 223) Ngako-ke, Alfa na-Omega lokukhulunywa ngaye kuSembulo 22:13 nakulalamanye emavesi eSembulo asho uMuntfu munye—lokunguNkulunkulu Jehova.