Galásia 6:1-18
6 Maun-alin sira, se ema ida komesa laʼo sala dalan no nia la hatene kona-ba neʼe, imi neʼebé kumpre Maromak nia kritéria* tenke koko atu hadiʼa ema hanesan neʼe ho laran-maus.+ Maibé kontinua tau matan ba imi-nia an rasik,+ tanba taʼuk katak imi mós sei hetan tentasaun.+
2 Kontinua ajuda malu iha susar laran,*+ no ho ida-neʼe mak imi bele kumpre Kristu nia ukun-fuan.+
3 Tanba se ema ruma hanoin katak nia ema importante maski tuir loloos lae,+ nia lohi ninia an rasik.
4 Maibé ema ida-idak tenke buka-hatene ninia hahalok rasik,+ no tuirmai nia sei iha razaun atu haksolok kona-ba ninia an rasik, laʼós hodi kompara nia an ho ema seluk.+
5 Tanba ema ida-idak sei lori ninia todan rasik.*+
6 Liután neʼe, ema neʼebé simu hanorin kona-ba Maromak nia liafuan, diʼak ba nia atu fahe buat diʼak hotu ba ida neʼebé hanorin buat sira-neʼe ba nia.+
7 Keta lohi imi-nia an:* Ita labele bosok* Maromak. Tanba buat naran deʼit neʼebé ema kari, nia mós sei koʼa ida-neʼe.+
8 Ema neʼebé kari hodi tuir hakarak isin nian sei koʼa mate* husi ninia isin, maibé ema neʼebé kari hodi tuir espíritu sei koʼa moris rohan-laek husi espíritu neʼe.+
9 Neʼe duni, ita labele rende an atu halo buat neʼebé diʼak, tanba se ita la sai kole,* ita sei koʼa iha tempu neʼebé loos.+
10 Entaun, kuandu sei iha oportunidade,* mai ita halo buat neʼebé diʼak ba ema hotu, maibé liuliu ba ita-nia maluk fiar-naʼin.
11 Haree toʼok, haʼu hakerek karta neʼe ba imi ho haʼu-nia liman rasik ho letra boboot.
12 Ema hotu neʼebé hakarak atu ema simu sira* mak ema neʼebé koko atu obriga imi hodi hetan sirkunsizaun,* maibé sira halo nuneʼe atu sira bele hasees an husi terus tanba Kristu nia ai-riin terus nian.*
13 Tanba ema sira-neʼe neʼebé hetan ona sirkunsizaun mós la halo tuir Ukun-Fuan,+ maibé sira hakarak imi atu hetan sirkunsizaun hodi nuneʼe sira bele iha razaun atu gaba an kona-ba imi-nia isin.
14 Maibé haʼu hein katak haʼu sei nunka gaba an, só gaba deʼit ita-nia Naʼi Jesus Kristu+ neʼebé mate ona iha ai-riin terus nian.* Ba haʼu, mundu mate tiha ona* liuhusi nia, no ba mundu haʼu mós mate tiha ona liuhusi nia.
15 Tanba hetan sirkunsizaun ka la hetan sirkunsizaun, neʼe la iha folin,+ maibé kriasaun foun ida mak iha folin.+
16 Maromak sei haraik dame no laran-sadiʼa ba sira hotu neʼebé moris tuir prinsípiu neʼe ho didiʼak, sin, ba Izraél Maromak nian.+
17 Husi ohin ba oin, ema ida keta halo susar tan mai haʼu, tanba haʼu iha marka iha haʼu-nia isin nuʼudar Jesus nia atan ida.+
18 Maun-alin sira, haʼu hein katak ita-nia Naʼi Jesus Kristu nia laran-diʼak neʼebé boot sei hamutuk ho espíritu* neʼebé imi hatudu. Amen.
Nota-rodapé
^ Ka “imi neʼebé ema espirituál”.
^ Ka “Kontinua lori imi-nia maluk nia todan”.
^ Ka “responsabilidade rasik”.
^ Ka karik “Keta husik ema seluk lohi imi”.
^ Orj., “goza”.
^ Orj., “dodok”.
^ Ka “la rende an”.
^ Orj., “iha tempu neʼebé deside ona”.
^ Ka “hakarak haree diʼak husi liʼur”.
^ Ka “hetan ona kastigu-mate iha ai-riin”.
^ Ka “hanoin no atitude”. Haree “Pneuma” iha Glosáriu.
