Koloso 1:1-29
1 Haʼu Paulo, neʼebé sai Kristu Jesus nia apóstolu liuhusi Maromak nia hakarak, no ita-nia alin Timóteo,+
2 hakerek ba ema santu* sira no maun-alin sira iha Koloso neʼebé laran-metin no sai ida deʼit ho Kristu:
Haʼu harohan katak ita-nia Aman Maromak haraik ninia laran-diʼak neʼebé boot no dame ba imi.
3 Bainhira ami halo orasaun kona-ba imi, ami sempre fó agradese ba Maromak, ita-nia Naʼi Jesus Kristu nia Aman,
4 tanba ami rona ona kona-ba imi-nia fiar iha Kristu Jesus no kona-ba imi-nia domin ba ema santu hotu
5 tanba esperansa neʼebé rai hela ba imi iha lalehan.+ Uluk imi rona ona kona-ba esperansa neʼe liuhusi mensajen lia-loos nian husi liafuan diʼak
6 neʼebé hatoʼo ona ba imi. Liafuan diʼak neʼe fó rezultadu no kontinua aumenta iha mundu tomak,+ no mós iha imi-nia leet, hahú husi loron neʼebé imi rona no hatene ho didiʼak Maromak nia laran-diʼak neʼebé boot ho loloos.
7 Neʼe mak buat neʼebé imi aprende ona husi ami-nia maluk atan Epafras+ neʼebé ami hadomi, nia halo serbisu ho laran-metin nuʼudar atan ba Kristu hodi reprezenta ami.
8 Nia mós fó-hatene ami kona-ba imi-nia domin neʼebé imi haburas liuhusi espíritu.*
9 Tan razaun neʼe, hahú husi loron neʼebé ami rona kona-ba neʼe, ami la para atu halo orasaun kona-ba imi+ no husu Maromak atu ajuda imi hetan koñesimentu neʼebé loos+ kona-ba ninia hakarak, no hetan matenek hotu no kbiit atu komprende buat espirituál,+
10 atu nuneʼe, imi bele moris ho loloos iha Jeová* nia oin hodi halo nia kontente iha buat hotu, no imi bele kontinua fó fuan iha serbisu diʼak hotu no aumenta imi-nia koñesimentu neʼebé loos kona-ba Maromak.+
11 Ami mós harohan atu imi bele hetan forsa ho kbiit hotu tuir Maromak nia kbiit neʼebé furak+ atu nuneʼe imi bele tahan buat hotu ho pasiénsia no ksolok,
12 no fó agradese ba Aman neʼebé ajuda imi kumpre kritéria hodi hola parte iha liman-rohan ba ema santu sira+ neʼebé simu ona naroman.
13 Nia salva ona ita hodi hasai ita husi nakukun nia ukun+ no lori ita ba ninia Oan doben nia ukun.*
14 No liuhusi ninia Oan nia sakrifísiu atu sosa fali ita mak ita sai livre, neʼe katak ita hetan ona perdua ba ita-nia sala sira.+
15 Nia mak ilas husi Maromak neʼebé matan labele haree,+ nia mak oan primeiru husi kriasaun hotu.+
16 Liuhusi nia mak Maromak kria buat hotu iha lalehan no iha rai, buat neʼebé matan haree no buat neʼebé matan labele haree,+ kadunan, naʼi-ulun, governu ka sira neʼebé iha podér. Maromak kria ona buat seluk hotu liuhusi nia+ no ba nia.
17 No mós, nia iha ona antes buat seluk hotu+ no liuhusi nia mak Maromak kria buat hotu,
18 no nia mak ulun ba isin-lolon, katak kongregasaun.*+ Nia mak primeiru, neʼebé moris ulukliu husi mate,+ atu nuneʼe nia bele sai primeiru iha buat hotu,
19 tanba Maromak kontente atu halo buat hotu sai kompletu iha nia.+
20 No mós liuhusi ninia Oan mak Maromak halo dame fali buat hotu ba ninia an,+ maski buat sira neʼebé iha rai ka buat sira neʼebé iha lalehan; Maromak halo nuneʼe liuhusi raan+ neʼebé ninia Oan fakar iha ai-riin terus nian.*
21 Tuir loloos, uluk imi dook husi Maromak no sai nuʼudar inimigu tanba imi tau imi-nia neon ba hahalok aat sira,
22 maibé agora Maromak hadame malu ona ho imi liuhusi ema neʼe nia isin neʼebé nia entrega ba mate nuʼudar sakrifísiu, atu nuneʼe imi bele sai santu no sala-laek, no atu ema ida labele koʼalia aat kona-ba imi iha ninia oin.+
23 Maibé imi tenke kontinua hela iha fiar,+ harii metin iha fiar neʼe nia hun+ no hamriik metin+ hodi la husik ema hadook imi husi esperansa ba liafuan diʼak neʼebé imi rona ona, no haklaken ona ba kriasaun hotu iha lalehan nia okos.+ Haʼu, Paulo, sai nuʼudar atan neʼebé fó sai liafuan diʼak neʼe.+
24 Agora, haʼu haksolok atu hetan terus ba imi-nia diʼak.+ Haʼu prontu atu kontinua hasoru terus nuʼudar parte ba Kristu nia isin-lolon.+ Terus neʼe sei lori buat diʼak ba Kristu nia isin-lolon, katak kongregasaun.+
25 Haʼu sai nuʼudar atan hodi serbí kongregasaun neʼe tuir knaar+ neʼebé Maromak fó ona mai haʼu atu haklaken Maromak nia liafuan ho didiʼak, no neʼe ba imi-nia diʼak,
26 Haʼu haklaken kona-ba segredu santu+ neʼebé subar hela iha tempu* uluk+ no iha jerasaun uluk nian. Maibé agora ida-neʼe hatudu sai ona ba ninia atan santu sira.+
27 Maromak haksolok atu fó sai ba ninia atan sira-neʼe kona-ba rikusoin furak husi segredu santu+ neʼe iha nasaun sira-nia leet. Segredu santu neʼe mak Kristu, neʼebé sai ida deʼit ho imi, neʼe katak imi iha esperansa atu simu glória hamutuk ho nia.+
28 Ita haklaken kona-ba nia hodi fó avizu ba ema hotu no hanorin ema hotu ho matenek hotu, atu ita bele entrega ema hotu ba Maromak nuʼudar ema neʼebé kompletu hodi sai ida deʼit ho Kristu.+
29 Ho objetivu neʼe mak haʼu halo duni serbisu makaʼas, haʼu hakaʼas an ho ajuda husi ninia kbiit neʼebé book an iha haʼu.+
Nota-rodapé
^ Haree “Ema santu” iha Glosáriu.
^ Orj., “domin iha espíritu”. Haree “Pneuma” iha Glosáriu.
^ Ka “reinu; governu”.
