Toʼos-naʼin sira iha mundu tomak prodús ai-han neʼebé toʼo atu fó han ba ema naʼin- 12.000.000.000, neʼe mak 5.000.000.000 liu fali ema hotu iha mundu tomak. Maibé ema barak hamlaha tanba problema ho osan, ema la bele fahe ai-han ba ema hotu, no mós tanba ema soe deʼit ai-han.

Ema neʼebé serbisu iha finansas, porsentu 24 neʼebé hetan entrevista fiar katak atu hetan susesu, karik sira presiza atu halo hahalok neʼebé laloos no kontra governu nia lei. No porsentu 16 hatete katak sira sei halo nuneʼe duni, se sira sente katak la iha ema ida mak hatene kona-ba neʼe.

Iha rai-Arjentina maizumenus mestre-mestra porsentu 60, husu lisensa husi sira-nia serbisu tanba sira estrese kona-ba violénsia neʼebé akontese iha sira-nia serbisu-fatin.

Iha rai-Koreia Súl, tuir peskiza neʼebé ema halo, hatudu katak iha futuru karik ema barak sei hili atu hela mesak deʼit duké hamutuk ho ema seluk.

Governu Xina atu halo regra foun kona-ba anin nia kualidade no sei komesa iha tinan 2016. Maibé porsentu 66 husi sidade sira iha rai-Xina, karik sei la kumpre arranju neʼe. Liután neʼe, bee neʼebé fura husi rai okos, nia kualidade aat tebes.