INFORMASAUN IHA OIN | KETA RENDE AN MASKI HASORU SUSAR
Susar: Situasaun neʼebé la bele troka
KARIK Ita hetan moras ruma neʼebé susar atu kura. Ka Ita soe malu ona ho Ita-nia kaben, ka karik ema neʼebé Ita hadomi mate. Susar hirak-neʼe bele halo Ita sente triste, liuliu tanba Ita la bele troka situasaun hanesan neʼe. Nuneʼe, oinsá mak Ita bele sente laran-kontente fali?
EZEMPLU HUSI BÍBLIA: APÓSTOLU PAULO
Bainhira apóstolu Paulo laʼo ba fatin barak nuʼudar misionáriu ida, derrepente deʼit ema duun matak nia, soldadu sira kaer no sulan nia iha uma ida nia laran ba tinan rua. Maibé Paulo la rende an. Nia nafatin halo buat neʼebé nia bele halo. Nia simu ema hotu neʼebé vizita nia hodi ajuda no fó-kmaan ba sira. Nia mós hakerek karta barak ba ninia maluk kristaun sira iha tempu neʼebá, toʼo agora ita mós bele lee ninia karta balu iha Bíblia.—Apóstolu 28:30, 31.
SAIDA MAK ANJA HALO?
Anja neʼebé temi ona iha pájina 3, dehan: “Moras kankru troka haʼu-nia moris tomak. Tanba fasil deʼit moras seluk daʼet haʼu, tan neʼe haʼu tenke sulan deʼit iha uma laran, la bele bá serbisu no la bele ransu malu ho kolega sira.” Maibé oinsá mak Anja bele tahan hasoru ninia susar? Nia dehan: “Haʼu halo lista kona-ba buat neʼebé haʼu tenke halo iha haʼu-nia moris, no halo planu atu kumpre buat sira-neʼe ida ba ida tuir buat neʼebé haʼu bele halo. Haʼu sente kontente.”
“Iha situasaun naran deʼit haʼu aprende ona atu sai kontente.”—Apóstolu Paulo nia liafuan iha Filipe 4:11
SAIDA MAK ITA BELE HALO?
Se Ita mós hasoru daudauk susar ruma, koko toʼok atu halo buat sira tuirmai neʼe:
-
Hanoin kona-ba buat neʼebé Ita bele halo, tuir Ita-nia situasaun. Porezemplu, se Ita kona moras ruma, karik Ita bele han hahán neʼebé diʼak ba saúde, halo ezersísiu no deskansa barak.
-
Hanoin didiʼak kona-ba buat ida neʼebé Ita hakarak halo iha Ita-nia moris. Loron-loron fahe tempu uitoan-uitoan atu kumpre Ita-nia hakarak neʼe.
-
Hatoman an halo serbisu kmaan ruma neʼebé halo Ita sente kontente, hanesan dasa rai ka fase bikan. Keta husik Ita-nia hatais ka fuuk sabraut. Iha dadeer, halo uluklai buat neʼebé importante.
-
Haburas hanoin neʼebé pozitivu kona-ba susar neʼebé Ita hasoru. Tanba susar hotu bele halo Ita aprende oinsá atu tahan, ka, bele sai nuʼudar esperiénsia ida ba Ita atubele ajuda fali ema seluk.
Keta haluha: Maski Ita la bele troka susar neʼebé Ita hasoru daudaun, maibé Ita bele duni troka Ita-nia hanoin kona-ba situasaun neʼe.
Karik Ita sei gosta
PERGUNTA KONA-BA BÍBLIA
Moras todan—Bíblia bele ajuda Ita ka lae?
Sin! Aprende dalan tolu neʼebé bele ajuda ita tahan bainhira moras todan.
LIVRU HAKLAKEN—ESTUDU NIAN
Kuandu ita-nia kaben mate
Triste neʼebé ita sente kuandu ita-nia kaben mate mak makaʼas no ba tempu naruk. Haree toʼok oinsá mak esperansa moris-hiʼas neʼebé temi iha Maromak nia Liafuan bele fó kmaan ba ita.
