TUIR Ita-Boot nia hanoin, Bíblia mai husi Maromak, ka Bíblia mak livru neʼebé fó sai ema nia hanoin deʼit?

Neʼe mak pergunta neʼebé ema barak husu, inklui mós ema katólika no protestante. Porezemplu, peskiza ida neʼebé halaʼo iha Estadus Unidus iha tinan 2014 fó sai katak maioria husi ema katólika no protestante hatete katak “Bíblia mak livru ida neʼebé iha ligasaun ruma ho Maromak”. Maski nuneʼe, porsentu 20 husi sira hatete katak Bíblia mak livru neʼebé “fó sai ema nia hanoin no istória neʼebé ema iha tempu antigu mak inventa deʼit”. Neʼe hatudu katak maski Bíblia hatete “Maromak mak leno Eskritura hotu”, maibé ema barak konfuzaun. Entaun, ulukliu mai ita buka-hatene liafuan “Maromak mak leno Eskritura” katak sá.—2 Timóteo 3:16.

Bíblia iha livru kiʼik hamutuk 66 neʼebé maizumenus ema naʼin-40 mak hakerek durante tinan 1.600. Maibé se ema mak hakerek Bíblia, entaun bele ka lae, atu hatete katak “Maromak mak leno Eskritura”? Liafuan “Maromak mak leno Eskritura” katak Maromak mak Hun ba Bíblia nia informasaun hotu. Bíblia hatete: “Ema koʼalia husi Maromak nuʼudar espíritu santu fó matadalan ba sira.” (2 Pedro 1:21) Sin, Maromak uza Ninia forsa, ka espíritu santu, atu hatoʼo Ninia liafuan ba ema neʼebé hakerek Bíblia. Ita bele kompara ida-neʼe ho patraun ida neʼebé hatoʼo informasaun ba ninia sekretáriu atu hakerek iha karta ida. Karta neʼe patraun nian, laʼós sekretáriu nian maski sekretáriu mak hakerek, loos ka lae?

Bíblia nia hakerek-naʼin balu rona mensajen husi Maromak liuhusi anju. Balu tan haree vizaun husi Maromak. Maromak mós fó-hatene Ninia hakarak ba hakerek-naʼin balu liuhusi mehi. Dala ruma Maromak husik Ninia atan sira atu hakerek Ninia mensajen ho sira rasik nia liafuan, maibé dala ruma Nia mós haruka sira atu hakerek Ninia liafuan ida-idak. Maibé, ema hotu neʼebé hakerek Bíblia sempre hatoʼo Maromak nia hanoin no hakarak, laʼós sira rasik nia ideia.

Entaun, oinsá mak ita bele fiar katak Bíblia mak Maromak nia Liafuan duni? Mai ita hanoin kona-ba buat tolu neʼebé bele ajuda ita atu fiar katak Bíblia mai husi Maromak.