Tanbasá mak dedika an ba Maromak Jeová?

“Basá hodikalan hamriik besik haʼu anju ida husi Maromak neʼebé haʼu sai ona ninian.”—APOS 27:23, MF.

1. Atu hetan batizmu, hakat saida deʼit mak ema tenke halo uluk? Ida-neʼe hamosu pergunta saida deʼit?

“HODI fiar ba Jesus Kristu nia sakrifísiu, Ita hakribi ka arrepende Ita-nia sala no dedika tiha ona Ita-nia an ba Maromak Jeová atu halo nia hakarak ka lae?” Neʼe mak pergunta ida husi pergunta rua neʼebé baibain husu iha diskursu batizmu nian ba ema neʼebé atu hetan batizmu. Tanbasá mak ema kristaun presiza dedika an ba Maromak Jeová? Tanbasá mak dedikasaun diʼak mai ita? Tanbasá mak ema ida la bele adora Maromak iha dalan neʼebé Nia simu se nia seidauk dedika an? Atu hetan resposta, ita presiza hatene saida mak dedikasaun neʼe.

2. Dedika an ba Maromak Jeová katak sá?

² Dedika an ba Maromak katak sá? Haree toʼok oinsá mak apóstolu Paulo hatudu kona-ba ninia relasaun ho Maromak. Kuandu ró besik atu mout, iha ema barak nia oin Paulo bolu Maromak Jeová nuʼudar “Maromak neʼebé haʼu sai ona ninian.” (Lee Apostolu 27:22-24, MF.) Ema kristaun loos hotu mak Maromak ninian. Maibé, mundu tomak mak “iha aat naʼin nia ukun”. (1 Joao 5:19) Ema kristaun sai Maromak Jeová ninian kuandu Maromak simu sira-nia dedikasaun neʼebé sira halo liuhusi orasaun. Dedikasaun neʼe mak hanesan promesa neʼebé ita halo rasik. Tuirmai mak foin hetan batizmu.

3. Jesus nia batizmu hatudu saida? Oinsá mak ninia dixípulu sira bele halo tuir nia ezemplu?

³ Jesus fó ezemplu mai ita kuandu nia foti desizaun rasik atu halo Maromak nia hakarak. Tanba nia moris iha nasaun Izraél neʼebé dedika tiha ona ba Maromak, neʼe katak nia dedika an tiha ona ba Maromak. Maski nuneʼe, iha ninia batizmu nia halo buat ida neʼebé liu fali buat neʼebé Lei haruka. Maromak nia Liafuan hatudu katak Jesus hatete: “Maromak, haʼu mak neʼe! Haʼu mai atu halo tuir Ita-nia hakarak.” (Ebr 10:7; Lc 3:21) Tan neʼe, Jesus nia batizmu hatudu katak nia fó ninia an ba Maromak atu halo ninia Aman nia hakarak. Ninia dixípulu sira mós halo tuir nia ezemplu hodi  hetan batizmu. Maibé ba sira, batizmu mak atu hatudu ba ema seluk katak sira halo ona sira-nia dedikasaun ba Maromak liuhusi orasaun.

Dedikasaun diʼak mai ita

4. David no Jónatas nia ezemplu hatudu katak ita tenke halo saida hodi iha relasaun diʼak nuʼudar belun?

⁴ Ema kristaun nia dedikasaun mak buat ida neʼebé sériu tebes. Neʼe laʼós deʼit buat ida neʼebé ita tenke halo tanba obrigasaun. Entaun, oinsá mak dedikasaun diʼak mai ita? Mai ita haree oinsá mak halo tuir ita-nia obrigasaun kona-ba relasaun diʼak ho ema bele lori buat neʼebé diʼak. Ezemplu ida mak kona-ba relasaun diʼak nuʼudar belun. Atu relasaun nuʼudar belun bele lori buat neʼebé diʼak, ita tenke simu ita-nia responsabilidade nuʼudar belun. Ida-neʼe envolve obrigasaun atu hanoin kona-ba ita-nia belun. Ezemplu diʼak ida iha Bíblia laran kona-ba neʼe mak Jónatas ho David. Sira mós halo aliansa atu sai belun ba malu. (Lee 1 Samuel 17:57; 18:1, 3.) Maski ohin loron ema ladún halo aliansa atubele sai belun ba malu, maibé relasaun diʼak nuʼudar belun bele sai metin liu kuandu ema sente katak sira iha obrigasaun ba malu.—Prov 17:17; 18:24.

5. Saida mak atan ida tenke halo atu bele hetan buat diʼak ba nafatin?

⁵ Lei neʼebé Maromak fó ba ema Izraél hatudu kona-ba relasaun seluk tan neʼebé bele lori buat diʼak ba ema bainhira sira halo tuir sira-nia obrigasaun. Se atan ida hakarak atu moris seguru no hakmatek hodi sai ninia naʼi nian ba nafatin, atan neʼe bele halo kontratu neʼebé ba nafatin ho ninia naʼin. Lei hatete: “Se atan neʼe hatete beibeik, ‘haʼu hadomi tebes haʼu-nia naʼi, haʼu-nia feen no oan sira; haʼu lakohi sai husi neʼe nuʼudar ema neʼebé livre’, entaun ninia naʼi tenke lori nia besik ba Maromak neʼebé loos no tenke lori nia ba odamatan ka odamatan nia riin; no ninia naʼi tenke tuʼu nia tilun ho buat ida neʼebé kroʼat, no nia tenke sai atan ba nia naʼin toʼo tempu neʼebé la bele sura.”—Êx 21:5, 6.

6, 7. (a) Buat diʼak saida mak ema bele hetan hodi halo tuir sira-nia obrigasaun? (b) Ida-neʼe hatudu saida kona-ba ita-nia relasaun ho Maromak Jeová?

⁶ Moris nuʼudar kaben-naʼin mak relasaun ida neʼebé feen-laʼen presiza halo tuir duni sira-nia obrigasaun. Obrigasaun neʼe laʼós ba kontratu ida neʼebé hakerek iha surat tahan, maibé ba ema ida. Mane no feto neʼebé moris hamutuk hodi la kaben, nunka bele sente seguru no hakmatek neʼebé loos, nuneʼe mós sira-nia oan. Maibé mane no feto neʼebé halo tuir sira-nia obrigasaun ba malu hodi kaben loloos tuir Bíblia nia matadalan, sira sei hakaʼas an atu rezolve ho domin problema ruma neʼebé mosu.—Mt 19:5, 6; 1 Kor 13:7, 8; Ebr 13:4.

⁷ Iha tempu Bíblia nian, ema hetan buat diʼak kuandu halo kontratu kona-ba negósiu ka serbisu. (Mt 20:1, 2, 8) Ohin loron mós hanesan. Porezemplu, ita hetan buat diʼak kuandu ita hakerek kontratu ida antes ita komesa negósiu ruma ka komesa serbisu ba patraun ruma. Nuneʼe, maski halo tuir ita-nia obrigasaun bele hametin ita-nia relasaun nuʼudar belun, nuʼudar kaben-naʼin, no nuʼudar serbisu-naʼin, maibé kuandu ita halo tuir ita-nia obrigasaun hodi halo ita-nia dedikasaun ba Maromak Jeová, ida-neʼe sei diʼak liután mai ita iha ita-nia relasaun ho nia! Mai ita haree oinsá mak halo dedikasaun ba Maromak Jeová ajuda ema iha tempu uluk no oinsá mak dedikasaun neʼe laʼós deʼit kona-ba halo tuir obrigasaun.

Dedikasaun ba Maromak diʼak ba Izraél

8. Povu Izraél nia dedikasaun ba Maromak katak sá?

⁸ Nasaun Izraél tomak dedika an ba Maromak Jeová kuandu sira halo promesa ba nia. Maromak Jeová haruka sira atu halibur an iha Foho Sinai, no nia hatete ba sira: “Se imi halo tuir ho loloos haʼu-nia liafuan no kaer metin ba haʼu-nia aliansa, imi sei sai duni povu neʼebé espesiál mai haʼu iha povu sira seluk nia leet.” Povu tomak simu hodi dehan: “Buat hotu neʼebé Jeová hatete ona, ami sei halo tuir duni.” (Êx 19:4-8) Povu Izraél nia dedikasaun laʼós deʼit kona-ba obrigasaun atu halo buat ruma. Sira-nia  dedikasaun katak sira mak Maromak Jeová ninian, no Maromak Jeová tau matan sira nuʼudar ninia “povu neʼebé espesiál”.

9. Buat diʼak saida deʼit mak ema Izraél hetan tanba halo dedikasaun ba Maromak?

⁹ Ema Izraél hetan buat diʼak tanba sira sai Maromak Jeová ninian. Nia laran-metin ba sira no tau matan ba sira hanesan aman ida neʼebé hadomi nia oan. Maromak hatete ba ema Izraél: “Bele ka lae, feen ida haluha ninia oan neʼebé sei susu hela hodi la sente hanoin ba oan husi ninia knotak? Maski feto sira-neʼe bele haluha, maibé haʼu sei nunka haluha ó.” (Isa 49:15) Maromak Jeová fó Lei ba sira nuʼudar matadalan ba sira-nia moris, fó mós profeta sira atu fó laran-manas, no anju atu proteje sira. Ema neʼebé hakerek salmu ida, hatete: “Nia fó-hatene ninia liafuan ba Jacob, ninia lei no ninia desizaun sira ba Izraél. Nia seidauk halo ida-neʼe ba nasaun seluk.” (Sal 147:19, 20; lee Salmo 34:7, 19; 48:14.) Hanesan Maromak Jeová tau matan ba nasaun neʼebé sai ona ninian iha tempu uluk, nia mós sei tau matan ba ema neʼebé dedika an ba nia ohin loron.

Tansá ita tenke dedika an ba Maromak

10, 11. Ita moris mai nuʼudar Maromak nia família ka lae? Esplika toʼok.

¹⁰ Kuandu hanoin kona-ba dedikasaun no batizmu, karik ema balu hanoin: ‘Tanbasá mak haʼu la bele serbí Maromak se haʼu seidauk dedika an ba nia?’ Atu hatene kona-ba neʼe, ita presiza hanoin kona-ba ita-nia situasaun iha Maromak nia oin. Hanoin-hetan katak tanba Adão nia sala, ita hotu moris mai ketak husi Maromak nia família. (Rom 3:23; 5:12) Tan neʼe, dedika ita-nia an mak dalan importante ida atu Maromak simu ita iha ninia família. Mai ita haree tanbasá mak ida-neʼe importante.

¹¹ La iha aman ida iha rai neʼebé bele fó mai ita moris neʼebé perfeitu. (1 Tim 6:19) Ita moris mai laʼós nuʼudar Maromak nia oan tanba kuandu ema primeiru halo sala, sira halo ema tomak haketak an husi sira-nia Kriadór no Aman neʼebé domin. (Kompara ho Deuteronômio 32:5.) Husi tempu neʼebá kedas, ema moris dook husi Maromak Jeová nia família tomak, dook husi Maromak.

12. (a) Oinsá mak ema neʼebé sala-naʼin bele sai Maromak nia família? (b) Hakat saida deʼit mak ita tenke halo antes hetan batizmu?

¹² Maski nuneʼe, nuʼudar ema ida-idak ita bele husu ba Maromak atu simu ita iha ninia família. * Oinsá mak ita bele sai parte iha Maromak nia família maski ita sala-naʼin? Apóstolu Paulo hakerek: “Wainhira ita sei funu-balun ba malu, ita hadame malu ona karik ho Maromak husi nia Oan-Mane nia mate.” (Rom 5:10) Kuandu ita hetan batizmu, ida-neʼe hanesan ita husu Maromak atubele iha laran ka konxiénsia neʼebé moos atu nia bele simu ita. (1 Ped 3:21) Maibé, antes hetan batizmu, ita presiza halo hakat balu. Ita presiza hatene Maromak, aprende atu tau fiar ba nia, arrepende an, no troka ita-nia moris. (Joao 17:3; Apos 3:19; Ebr 11:6) No iha buat ida tan neʼebé ita presiza halo antes Maromak bele simu ita iha ninia família. Saida mak neʼe?

13. Tanbasá mak loos atu ema halo promesa ida ba Maromak antes nia bele sai parte iha Maromak nia família?

¹³ Antes ema ida neʼebé dook husi Maromak bele sai parte iha ninia família, ema neʼe tenke halo promesa ida ba Maromak Jeová. Atu komprende kona-ba ida-neʼe, hanoin toʼok kona-ba aman ida neʼebé hatudu laran-diʼak ba labarik ida neʼebé la iha inan-aman, no hakarak atu hakiak nia atu sai ninia família rasik. Ema barak hatene katak aman neʼe ema neʼebé diʼak. Maski nuneʼe, antes nia simu labarik neʼe nuʼudar ninia oan, nia hakarak atu labarik neʼe halo promesa ida. Aman neʼe hatete: “Antes haʼu simu ó nuʼudar haʼu-nia oan, haʼu hakarak hatene katak ó sei hadomi no respeitu haʼu nuʼudar ó-nia  aman.” Se labarik neʼe promete duni atu halo ida-neʼe mak foin aman neʼe simu nia ba ninia família. Entaun, loos atu aman neʼe halo ida-neʼe ka lae? Hanesan mós ho Maromak Jeová, nia hakarak deʼit atu simu ema neʼebé ho hakarak rasik halo promesa hodi dedika an ba nia atubele sai parte iha ninia família. Bíblia hatete: “Saran imi-nia isin nuʼudar sakrifísiu moris nian, santu no buat neʼebé Maromak bele simu.”—Rom 12:1.

Hatudu domin no fiar

14. Iha dalan saida mak dedikasaun hatudu katak ita hadomi Maromak?

¹⁴ Kuandu ita promete atu serbí Maromak Jeová hodi dedika an ba nia, ita hatudu katak ita hadomi nia ho laran. Ida-neʼe atu besik hanesan ho juramentu kaben nian. Noivu kristaun ida hatudu nia domin hodi promete atu laran-metin ba ninia noiva maski hasoru buat naran deʼit. Ida-neʼe mak promesa ba ema ida, laʼós deʼit promete atu halo buat ruma. Noivu neʼe mós hatene katak se nia la halo juramentu kaben nian, nia labele moris hamutuk ho nia noiva. Nuneʼe mós, ita la bele sai parte iha Maromak nia família se ita seidauk promete atu serbí Maromak hodi dedika an ba nia. Nuneʼe, maski ita sala-naʼin, ita dedika an ba Maromak Jeová tanba ita hakarak atu sai ninian no hakarak atu laran-metin ba nia maski hasoru buat naran deʼit.—Mt 22:37.

15. Tanbasá mak dedikasaun hatudu katak ita fiar duni Maromak?

¹⁵ Kuandu ita dedika an ba Maromak, ita hatudu katak ita fiar duni nia. Tanbasá? Tanba ita fiar katak hakbesik ba Maromak Jeová diʼak mai ita. (Sal 73:28) Ita hatene katak dala ruma susar atu laʼo ho Maromak tanba ita sei hela iha “ema laran-aat no maksalak sira leet”, maibé ita fiar ba Maromak nia promesa atu ajuda ita kuandu ita hakaʼas an atu laʼo ho nia. (Flp 2:15; 4:13) Ita hatene katak ita sala-naʼin, maibé ita fiar katak Maromak Jeová sei hatudu laran-sadiʼa mai ita maski ita halo sala. (Lee Salmo 103:13, 14; Roma 7:21-25.) Ita fiar katak Maromak Jeová sei haraik bensaun mai ita kuandu ita hakaʼas an atu laran-metin nafatin.—Jó 27:5.

Dedikasaun ba Maromak halo ita haksolok

16, 17. Tanbasá mak dedikasaun ba Maromak Jeová halo ita haksolok?

¹⁶ Dedika an ba Maromak Jeová halo ita haksolok tanba ida-neʼe envolve fó ita-nia an ba nia. Jesus hatete buat ida neʼebé loos kuandu nia dehan: “Diʼak liu fó liu fali simu.” (Apos 20:35) Kuandu Jesus halaʼo hela ninia serbisu iha rai, nia rasik sente duni katak diʼak liu fó liu fali simu. Dala ruma, nia la deskansa, la han, no la halo kontente nia an hodi nia bele ajuda ema seluk atu bele hetan dalan moris nian. (Joao 4:34) Jesus mós haksolok hodi halo ninia Aman nia laran kontente. Jesus hatete: “Haʼu halo nafatin buat neʼebé fó ksolok ba Nia.”—Joao 8:29; Prov 27:11.

¹⁷ Tan neʼe, Jesus hanorin ninia dixípulu sira kona-ba dalan moris nian neʼebé lori haksolok,  nia hatete: “Ema ruma hakarak tuir haʼu karik, nia sei hewai nia an rasik.” (Mt 16:24) Hodi halo nuneʼe, ita bele hakbesik liután ba Maromak Jeová. Iha ka lae, ema seluk neʼebé bele tau matan ba ita ho domin hanesan Maromak?

18. Tanbasá mak moris tuir ita-nia dedikasaun ba Maromak Jeová halo ita sente kontente liu duké dedika an ba buat ruma ka ba ema ruma?

¹⁸ Dedika ita-nia an ba Maromak Jeová no moris tuir ita-nia dedikasaun neʼe hodi halo Maromak nia hakarak, sei halo ita sente kontente liu duké dedika an ba buat ruma ka ba ema ruma. Porezemplu, ema barak neʼebé hakaʼas an atu uza sira-nia moris tomak hodi buka rikusoin, sira la hetan ksolok neʼebé loloos. Maibé, sira neʼebé dedika an ba Maromak Jeová hetan ksolok neʼebé ba nafatin. (Mt 6:24) Oportunidade furak atu sai “Maromak nia serbisu-naʼin” halo ema sente kontente, no sira-nia dedikasaun neʼe laʼós ba serbisu ruma, maibé ba Maromak. (1 Kor 3:9) La iha ema ida neʼebé hafolin liu sakrifísiu neʼebé sira halo duké Maromak. Nia mós sei halo ema neʼebé laran-metin ba nia atu sai joven fali, hodi nuneʼe sira bele hetan buat diʼak ba nafatin tanba nia tau matan ba sira.—Jó 33:25; lee Ebreu 6:10.

19. Oportunidade espesiál saida mak ita iha tanba dedika an ba Maromak Jeová?

¹⁹ Dedika ita-nia moris ba Maromak Jeová halo ita sai besik liu ba nia. Bíblia hatete: “Hakbesik ba Maromak, no nia sei hakbesik imi.” (Tgo 4:8; Sal 25:14) Iha lisaun tuirmai, ita sei haree tansá mak ita la presiza taʼuk atu halo desizaun atu sai Maromak Jeová ninian.

[Nota–rodapé]

Oinsá ita hatán?

• Dedika an ba Maromak katak sá?

• Tanbasá mak dedikasaun diʼak mai ita?

• Tanbasá mak ema kristaun presiza dedika an ba Maromak Jeová?

[Pergunta estudu nian]

[Dezeñu iha pájina 6]

Moris tuir ita-nia dedikasaun halo ita haksolok ba nafatin