BUAT NEʼEBÉ EMA HANOIN: Tanba Maromak mak ukun mundu, nia mak halo dezastre naturál. Ema hanoin ida-neʼe hatudu katak Maromak laran-aat.

BUAT NEʼEBÉ BÍBLIA HANORIN: “Mundu tomak sei iha aat-naʼin nia ukun.” (1 Joao 5:19) Sé mak “aat-naʼin” neʼe? Bíblia hatudu katak ida-neʼe mak Satanás. (Mateus 13:19; Marcos 4:15) Bele fiar ida-neʼe ka lae? Bele. Hanoin toʼok kona-ba neʼe: Satanás mak ukun mundu, tan neʼe nia mak book ema atu hatudu hahalok hanoin an, kaan-teen, no buka sira rasik nia diʼak deʼit. Ida-neʼe bele ajuda ita atu komprende tanbasá mak ema la bele tau matan didiʼak ba ambiente. Matenek-naʼin sira fó sai katak dezastre naturál bele mosu tanba ema estraga ambiente. Tan neʼe, ikusmai sira mós tau ema seluk nia moris iha perigu laran kuandu dezastre mosu.

Se hanesan neʼe, tanbasá mak Maromak husik Satanás atu kontrola ema? Atu hetan resposta, ita presiza hanoin kona-ba tempu uluk bainhira Adão no Eva kontra Maromak nuʼudar Ukun-naʼin. Husi tempu neʼebá, ema barak halo tuir sira. Sira-nia desizaun atu kontra Maromak nia Ukun, halo Diabu Satanás sai mundu neʼe nia ukun-naʼin. Tan neʼe, Jesus bolu Satanás nuʼudar “ukun-naʼin mundu neʼe nian”. (Joao 14:30) Satanás sei ukun mundu neʼe ba nafatin ka lae? Lae!

Maromak Jeová a hanoin tebes ema neʼebé hetan terus tanba Satanás nia ukun. Bainhira Maromak haree ema hetan terus, nia laran-triste tebes. Porezemplu, kuandu nasaun Israel hasoru susar, Bíblia hatete: “Durante sira-nia terus, ida-neʼe halo susar ba [Maromak].” (Isaías [Yesaya] 63:9) Ho laran-sadiʼa, Maromak halo arranju atu lakleur tan halakon Satanás nia ukun. Maromak hili nia Oan, Jesus Kristu, atu sai Liurai neʼebé hatudu justisa ba nafatin.

OINSÁ MAK IDA-NEʼE KONA ITA: Satanás nia ukun la bele proteje ema husi dezastre naturál. Maibé Jesus nia ukun sei halo nuneʼe. Uluk Jesus proteje ninia dixípulu sira husi anin boot. Bíblia dehan: “Nia hateten ba anin no dehan ba tasi, ‘Hakmatek bá!’ Anin nonook kedas; buat tomak hakmatek.” Dixípulu sira hatete: “Ema neʼe sé loos? Anin no tasi mós halo tuir nia!” (Marcos 4:37-41) Istória neʼe fó fiar mai ita katak Jesus sei ajuda ema hotu neʼebé halo tuir nia bainhira nia ukun mundu nuʼudar Liurai.—Daniel 7:13, 14.