Baibain, ema hotu gosta hatudu laran-diʼak ba malu no moris hakmatek iha dame laran. Maibé loroloron sempre iha notísias neʼebé fó sai kona-ba funu, violénsia no krime. Tansá mak mundu neʼe nakonu ho buat aat? Karik iha buat ruma neʼebé dudu ema halo hahalok aat, loos ka lae?​—Lee 1 João 5:​19.

Maromak kria ema atu halo buat aat ka lae? Lae, Maromak Jeová kria ema tuir Nia ilas atu ema bele haleno Ninia domin. (Gênesis [Kejadian] 1:​27; Jó [Ayub] 34:10) Maibé Maromak mós fó ema kbiit atu hanoin hodi ema ida-idak bele foti desizaun ba sira-nia an rasik. Tanba ema primeiru Adão ho Eva foti desizaun atu la halo tuir Maromak, tan neʼe sira sai sala-naʼin no sira-nia sala neʼe daʼet ba ita hotu.​—Lee Roma 5:​12.

Maromak hakarak ita luta hasoru tentasaun sira no ita-nia fraku nuʼudar ema sala-naʼin. (Provérbios [Amsal] 27:11) Tan neʼe, Maromak hanorin ita oinsá atu hadook an husi hahalok sala no halaʼo moris kontente. Maski nuneʼe, la iha ema ida mak bele banati-tuir Maromak nia domin ho perfeitu.​—Lee 2 Timóteo 3:​16.

Ohin loron mundu neʼe nakonu ho buat aat. Maromak sei husik ida-neʼe hodi ita ema bele haree rezultadu aat husi ema nia hahalok sala. Maibé lakleur tan, Nia sei halakon buat aat hotu husi mundu neʼe. (2 Pedro 3:​7-9) Ema neʼebé halo tuir Maromak deʼit mak sei moris haksolok iha mundu neʼe.​—Lee Mateus 5:​5.