Bíblia fó sai nanis katak “nasaun ida sei kontra nasaun seluk” no sei iha dezastre oioin durante tempu neʼebé besik daudaun ba “mundu neʼe nia rohan”. (Mateus 24:3, 7) Ita haree ona liafuan neʼe sai loos durante tinan serbisu nian 2023. a Maski akontese konflitu no dezastre naturais iha rai barak toʼo besik 100, iha tempu neʼe Testemuña ba Jeová hatudu domin ba malu hodi tuir Jeová nia ezemplu. Oinsá?

 Durante tinan serbisu nian 2023, iha dezastre 200 liu neʼebé kona irmaun-irmán sira, neʼe inklui dezastre naturais, funu no konflitu sira. Nuʼudar organizasaun, Testemuña ba Jeová gasta osan dolar Amerikanu b millaun 10 liu husi kontribuisaun hodi fó ajuda umanitária. Laʼós neʼe deʼit, irmaun-irmán barak mós uza sira-nia osan rasik atu ajuda ema seluk iha sira-nia área. Mai ita haree ezemplu rua kona-ba oinsá kontribuisaun neʼebé Ita fó ajuda ita-nia maluk sira neʼebé kona dezastre.

 Área balu iha rai-Nijéria hetan beibeik inundasaun. Maibé, inundasaun neʼebé akontese iha fulan-Outubru tinan 2022 mak inundasaun aat liu neʼebé akontese iha Nijéria durante tinan 10 nia laran. Área toʼos luan ektare 676.000 liu (neʼe luan hanesan ho kampu joga bola dala 946.000) hetan estragu, no ema naʼin millaun rua liu presiza evakua ba fatin seluk. Sukursál Nijéria arranja lalais komisaun ba dezastre atu organiza ajuda umanitária no hametin irmaun-irmán sira.

•   Irmaun-irmán naʼin-7.505 mak evakua ba fatin seluk

•   Uma 860 hetan estragu ka rahun hotu

•   Reuniaun-Fatin 90 no Salaun ba Asembleia ida kona inundasaun

 Uza $250.000 liu ba ajuda umanitária, neʼe inklui buat tuirmai:

•   Ai-han sira hanesan foos, koto, no ai-han seluk tan

•   Sasán sira hanesan kolxaun no moskiteiru

•   Hadiʼa ka harii fali uma neʼebé hetan estragu

 Oinsá mak irmaun sira uza osan kontribuisaun ho matenek? Dalan ida mak haree didiʼak uma ida-idak nia kondisaun atu deside se bele hadiʼa ka presiza harii fali. Se presiza harii fali uma tomak, sira uza modelu simples neʼebé tuir área ida-idak.

 Ita-nia irmaun-irmán sira agradese tebes ba ajuda neʼebé sira simu. Irmán ida dehan: “Inundasaun halo ami-nia moris sai runguranga tanba ami-nia toʼos no ami-nia uma hetan estragu boot. Ami sente kmaan tanba irmaun-irmán sira mai kedas iha loron neʼebá atu ajuda no prepara hela-fatin neʼebé seguru mai ami. Ami mós sente kmaan liután bainhira simu ai-han husi Sukursál. Ami sente admira tanba buat neʼebé hakerek iha João 13:34, 35 akontese duni iha ami-nia moris. . . . Ami komprende katak iha duni domin neʼebé loos. Haʼu no haʼu-nia família hotu fó obrigadu barak no agradese ba irmaun-irmán sira neʼebé mai ajuda ami iha tempu neʼebé loos.”

 Ema iha komunidade mós nota ajuda umanitária neʼebé Testemuña ba Jeová halo. Xefe ida husi komunidade iha Sabagreia, área Bayelsa dehan: “Iha mós organizasaun ka igreja barak iha mundu, maibé só Testemuña ba Jeová deʼit mak halo serbisu hanesan neʼe. . . . Imi-nia organizasaun mak diʼak tebes.”

 Durante Fevereiru 2023, akontese dezastre ahi han iha fatin 400 liu iha rai-Xile, no neʼe estraga rai luan ektare 430.000 liu (neʼe luan hanesan ho kampu joga bola dala 602.000) hamutuk ho fatin importante oioin. Maizumenus ema naʼin-8.000 mak evakua ba fatin seluk. Depois dezastre sira-neʼe, sukursál organiza kedas ajuda umanitária.

•   Irmaun-irmán naʼin-222 mak evakua ba fatin seluk

•   Uma 20 rahun hotu

 Gasta $200.000 liu ba ajuda umanitária, neʼe inklui buat tuirmai:

•   Ai-han no bee

•   Mina, sasán hamoos nian, no ai-moruk sira

•   Harii fali uma neʼebé hetan estragu

 Família ida hakfodak tebes kuandu hatene katak ahi han sira-nia uma no buat seluk tan. Sira mós lakon buat neʼebé ajuda sira atu sustenta sira-nia moris. Ba loron balu, sira estrese no trauma kuandu haree sira-nia uma no fatin neʼebé hetan estragu. Maibé, bainhira irmaun sira harii fali sira-nia uma, neineik-neineik sira sente kmaan fali. Hodi haree domin boot husi irmaun-irmán sira neʼebé halo serbisu voluntáriu, neʼe ajuda sira atu tahan susar. Esperiénsia neʼe book tebes sira, no sira mós oferese sira-nia an nuʼudar voluntáriu atu ajuda harii fali irmaun-irmán seluk nia uma.

 Serbisu ajuda umanitária book tebes irmaun-irmán sira-nia laran. Irmaun ida dehan: “Jeová nia arranju kona-ba Komisaun ba Dezastre mak kapás tebes. Loron ida depois dezastre neʼe, irmaun sira mai ona fatin neʼe hodi fahe buat neʼebé ami presiza. Bainhira Ita lee esperiénsia sira kona-ba oinsá irmaun sira ajuda malu kuandu dezastre akontese iha mundu tomak, neʼe anima tebes Ita. Maibé kuandu neʼe akontese ba Ita rasik nia moris, Ita sente la hanesan duni. Ita hafolin liután ita-nia organizasaun tanba haree oinsá irmaun sira banati-tuir Jeová nia ezemplu, no sira hanoin tebes ami-nia presiza fíziku nian, espirituál, no emosaun. Ami haree rasik Jeová nia domin liuhusi ninia organizasaun.”

 Nuʼudar mundu aat neʼe nia rohan besik daudaun, ita sei haree katak dezastre sira sei sai barak liután. (Lucas 21:10, 11) Maski nuneʼe, ita mós hatene katak ita-nia Liurai Jesus Kristu sei hamutuk nafatin ho ita “toʼo mundu neʼe nia rohan”. (Mateus 28:20) Obrigadu barak ba laran-luak neʼebé Ita hatudu hodi fó kontribuisaun liuhusi donate.dan124.com no dalan seluk, no mós tempu no forsa neʼebé Ita oferese. Buat sira-neʼe hotu hatudu katak Ita apoia Maromak nia Ukun no hadomi Ita-nia Liurai.