Sekta vao o Vavolombelo i Jehovah-o?

MANDEFA

Aha’a. Tsy sekta zahay Vavolombelo i Jehovah. Kristiana zahay, le mikezake manahake ty modely nimey i Jesosy Kristy sady magnorike ty fampianara’e.

Ino ty dika tihoe sekta?

Tsy mitovy ty fomba amarita o ndatio o rehake iohoe. Andao tikagne handineke famaritagne roe, le hagnente naho fa avy eo tie, nagnino zay ro tsy mihatse ama’ay.

Misy ty mirehake fa fivavahagne vaovao ty atao tihoe sekta. Faie tsy namorogne fivavahagne vaovao o Vavolombelo i Jehovah-o. Ty fivavahagne norihe ty Kristiana tamy ty taonjato voaloha’e ro tsikombe’ay sady voarehake amy Baiboly ao ty ohatse nengà iareo naho ty fampianara’e. (2 Timoty 3:16, 17) Mino zahay fa ty Soratse Masigne avao ro afake mamaritse ty fivavahagne maregne.
Misy ka ty mirehake fa fivavahagne magnoho-doza tihoe sekta, le ndaty ty mitarike aze. Tsy olombelogne ty mitarike o Vavolombelo i Jehovah-o. Satria hoe ty Jesosy tamo o mpanonjohy ty lia’eo: “Raike avao ty mpitarike anareo, le i Kristy.” Izay ty orihe’ay.—Matio 23:10.

Tsy fivavahagne magnoho-doza ka o Vavolombelo i Jehovah-o. Mandrambe soa boake amy io aza ty mpiara-mivavake ama’e ao naho ty fiaraha-monegne. Noho ty fanompoagne atao’ay zao ohatse, le ndaty maro ro afake amy ty fahazaran-drati’e, le tsy mifoke rongony ndra sigara sady tsy minon-toake maro sasa. Mampianatse mamaky teny naho manoratse ka zahay, le ndaty agn’arivo’e magneran-tane ro mandrambe soa boake amy izay. Mazoto magnampe ze niazom-boigne ka zahay naho fa misy loza. Mikezake mafe zahay mba hisy voka’e soa amy ty hafa ty findesam-bata’ay naho ty raha atao’ay arake ty reha i Jesosy tamy ze mpanonjohy ty lia’e.—Matio 5:13-16.