Talily Soa Nisorate i Matio 11:1-30
11 Naho fa boake nagnomey toromareke i mpiana’e 12 rey ty Jesosy, le nandeha nitory naho nampianatse amy ty tanàgne magnodidigne ey.
2 Faie naho fa naharey i raha natao i Kristy rey ty Jaona tamy ireke nigadray, le nirahe’e mbama’e mbeo i mpiana’e rey,
3 mba hagnontane aze tie: “Irehe vao i Ndaty Ho Avy nilignisagney sa mbe mandigne ndaty hafa zahay?”
4 Le hoe ty navale i Jesosy iareo: “Mandehana atalilio’areo i Jaona ty raha nirei’areo naho nitrea’areo retoa:
5 Nampahatreavegne ty ndaty goa, nampandehanegne ty ndaty maleme, niliovegne ty ndaty voa ty habokagne,* nampahareizegne ty ndaty karegnegne, nivelomegne indraike ty ndaty nimate, le ty ndaty mahantra nirehafagne i talily soay.
6 Sambatse ze ndaty tena matoky ahy naho tsy misalasala miomba ahy.”*
7 Naho fa nandeha i mpiana i Jaona rey, le nirehake ty miomba aze tamy i vahoake rey ty Jesosy tie: “Ia i lahilahy nihentea’areo tam-patrambey agney? Ndaty malemeleme mora aviombio ty tioke manahake o bararatao vao? Aha’a.
8 A ia areke reke? Ndaty magnisy akanjo fanjaka vao? Aha’a. Amy ty tragno o mpanjakao agne ro misy ndaty magnisy akanjo fanjaka.
9 Ia maregne areke reke? Mpaminany vao? Ie, rehafeko ama’areo fa mpaminany ty Jaona. Sady toe lahibey ambone o mpaminanio reke.
10 Izao ty nirehafe ty Soratse Masigne miomba aze: ‘Hiraheko aloha’o eo i irakoy mba hagnomagne ty lalagne homba’o.’
11 Volagneko ama’areo* fa naho amy ze nateran’ampela avao, le tsy misy bey ambone i Jaona Mpanao Badisa. Faie bey ambone’e ze ndaty fara’e kidikidy amy i Fanjakà i lagnitsey ao.
12 Nanomboke tamy ty andro i Jaona Mpanao Badisa hatrake amy izao, le i Fanjakà i lagnitsey ty tanjogne ifofora o ndatio mafe. Le ze mifofotse mafe ama’e ro ho agnisa i Fanjakagney.
13 Fa ndra o Mpaminanio ndra o Lalànao, le sambe nirehake faminaniagne iaby, amparake ty nanomboha i Jaona ty fanompoa’e.
14 Ndra inoa’areo ndra tsy inoa’areo, le i Jaona, i Elia mpaminany nirehafegne tie ho avỳ.
15 Ho anareo ze afake mitsanogne, le mitsanogna soa.
16 “Inogne koahe ty hampitovieko amy ty taranake toy? Ajaja mitoboke a bezara ey sady mitokatoka ty nama’e.
17 Hoe iareo tie: ‘Fa nitiofe’ay i solỳ faie tsy mba nitsinjake nareo; fa nanao hira fisaognagne ka zahay faie tsy mba nampiseho ty alahelo’areo nareo.’
18 Hoe izay ka fa naho fa niavy ty Jaona, le nifaly hanegne sady tsy ninogne divay. Faie hoe ty reha o ndatio aze: ‘Itoboha ty demonia reke.’
19 Ie ka i Ana o ndatỳ tsy mifaly hanegne sady minogne divay, le hoe o ndatio: ‘Hehenke ty lahy tea hanegne naho mamo lava sady nama o mpamory hetrao naho o mpanotao tike!’ Faie ty fahendrea o ndatio, le trea amy ty raha atao’e.”
20 Le nanomboke nagnomey tsiny i tanàgne nanoa’e fahagagagne maro rey ty Jesosy, satria tsy mba nibebake iareo. Hoe reke tamy i tanàgney:
21 “Ho azon-doza rehe Korazina! Ho azon-doza ka rehe Betsaida! Satria naho ta Tiro naho ta Sidona agne ty nanoagne i fahagagagne natao tama’o teto rey, le fa ela ty ndaty agne ro ho nibebake, sady ho nagnisy akanjo fisaognagne naho ho nihosotse lavenoke.
22 Faie volagneko ama’areo, fa ndra mbe moramora ka ty hahazo i Tiro naho i Sidona amy i Andro Fitsaràgney naho ampitahaegne amy ty raha hahazo anareo.
23 A ihe ka Kapernaomy, hasondrotse mban-dagnitse mbeo vao rehe? Hizotso mban-kibory mbeo rehe. Naho natao ta Sodoma agne i fahagagagne natao tama’o tao rey, le mbe ho teo o tanàgne iohoe hatrake amy izao.
24 Faie volagneko ama’o fa ndra mbe moramora ka ty hahazo ty tanà i Sodoma amy i Andro Fitsaràgney naho ampitahaegne amy ty raha hahazo azo.”
25 Le hoe ty Jesosy tafara izay: “O Baba, i Mpamorogne* i lagnitsey naho i taneỳ, midera azo agnatreha ty ndaty retoagne eto raho, satria naeta’o amo o ndaty mahilalao naho o mahay rahao ze raha rezay fa nabaribari’o amo o ajajao.
26 Toe izay anio Baba ty zoton’arofo’o!”
27 Le hoe ka ty Jesosy: “Fa nimein-dRaeko ahy iaby ze kila raha. Tsy misy mahafantatse soa ahy* naho tsy i Raeko* avao. Le tsy misy mahafantatse soa an-dRaeko naho tsy iraho avao naho ze ndaty teako hampahafantaregne aze.
28 Mbamako mbetoa ze rokake ty asa mafe naho ze minday entagne mavesatse fa hampitofaeko.*
29 Ento i baokoy, le mianara amako fa soa fagnahy naho miambane raho, le inareo ka hahazo hery indraike.
30 Satria tsy mamparare* ty mitarazo i baokoy sady tsy mavesatse ka ty raha ampindeseko anareo.”
Fagnamarehagne ambane peje
^ Ndra: “angamae.”
^ Abt: “tsy voafingagne noho ty amako.”
^ Abt: “Volagneko ama’areo to vata’e.”
^ Abt: “Tompo.”
^ Abt: “i Anakey.”
^ Abt: “Rae.”
^ Abt: “hamelombolo aze raho.”
^ Abt: “mora entegne.”
