1, 2. Ia iaby ty ndaty ragne i Jehovah maifitse aze?

NDATY manao akore ty teà’o ho ragnetegne? Ndaty mitovy hevetse ama’o naho tea ze raha teà’o sady tsy magnambane ze raha lahibey ama’o. Ho teà’o ka ty ndaty soa toetse, tsy mavande sady soa fagnahy.

² Nijobogne ndaty ila’e ho ragne’e maifitse aze ty Jehovah. I ragnetse ty nikanjia’e i Abarahama. (Vakio Isaia 41:8; Jakoba 2:23.) Nisaontsy ka reke fa ‘lahilahy zoto ty arofo’e’ ty Davida fa teà’e ty toetoe’e. (Asan’ny Apostoly 13:22) “Ndaty ikokoagne” ka ty nikanjia’e i Daniela mpitoky.—Daniela 9:23.

3. Inogne ty anto’e nijobogna i Jehovah ty ndaty ila’e ho ragne’e?

³ Inogne ty nahavy i Abarahama naho i Davida vaho i Daniela ho ragne i Jehovah? Hoe reke tamy i Abarahama: “Nitsanogne ze raha vinolako rehe.” (Genesisy 22:18) Miharine ze ndaty miambane naho manao ze raha andilia’e ty Jehovah. Hoe reke tamy i Isiraelita rey: “Oriho ty rehako soa tie ho Andrianagnahare’areo raho, le i nareo ho ndatiko.” (Jeremia 7:23) Ho ragne i Jehovah ka rehe naho mete’e anaragne!

4, 5. Akore ty ampiasà i Jehovah ty heri’e hanohagnagne ty mpanompo’e?

⁴ Dineho ty soa ho rambese’o naho miragnetse an’Andrianagnahare rehe. Mirehake ty Baiboly fa mivazoho ty ndaty soa fo ty Jehovah “hanoroa’e ty heri’e handrombahagne ze mipiteke ama’e amy ty fo’e.” (2 Tantara 16:9) Akore ty ampiasà i Jehovah ty heri’e mba hagnampeagne azo? Hoe ty Salamo 32:8: “Hanao ze hampahimbagne azo raho [Jehovah], sady hanoro ze lalagne handehana’o. Ho toroako hevetse rehe sady hitalake azo ty masoko.”

⁵ Tsy fale vao rehe mahafantatse fa miatrake azo ty Jehovah! Hanoro hevetse azo sady hiaro azo reke naho magnorike ty raha atoro’e rehe. Irie’e ho avotse amy ze tsapa hevetse mahazo azo rehe. (Vakio Salamo 55:22.) Naho amy ty fo’o ty anompoa’o aze, le hanahake ty mpanoratse salamo rehe. Hoe reke: “Nataoko alohako eo lognandro ty Jehovah. Tsy hihondrahondra raho fa ankavanako eo reke.” (Salamo 16:8; 63:8) Hagnampe azo hanagne fiaignagne mampifale ty arofo’e ty Jehovah. Faie misy fahavalo’e te hikalagne azo tsy hanao izay.

6. Inogne ty tognom-bande natao i Satana amo o ndatio?

⁶ Nihazavaegne tamy Toko faha-11 ao ty nandiera i Satana Devoly ty maha mpitondra an’Andrianagnahare. Nirehake reke fa nao mpandagnitse ty Andrianagnahare sady nanao raha vilagne fa tsy nagnenga i Adama naho i Eva hivey vatagne. Naho fa nanan-tahigne iareo mirovaly sady nameno tane ty tarira iareo, le nirehake ka ty Satana tie nao raty ty anto’e anompoa o ndatio i Jehovah. Te hirehake reke tie: ‘Tsy hatea ty anompoa o ndatio an’Andrianagnahare. Engao ho tsapaeko hevetse iareo hagnenteagne aze tie tsy hivalike ama’o!’ Trea amy ty tantara i Joba fa ninoa i Satana vata’e zay. Ndaty ia o Joba zao, le akore ty nanognona i Satana vande aze?

7, 8. a) Inogne ty nampiambake i Joba amy ty ndaty tamy ty andro’e? b) Inogne ty nirehafe i Satana fa anto’e anompoa i Joba an’Andrianagnahare?

 ⁷ Fa 3 600 taogne zay ty niaigna i Joba. Ndaty soa reke kanao hoe ty Jehovah: “Tsy misy ndaty hoe’e ty ambone taney. Lahilahy tsy manan-tahigne reke, sady ndaty maren-tane naho matahotse an’Andrianagnahare, vaho faly aze ka ty raha raty.” (Joba 1:8) Nampifale an’Andrianagnahare ty Joba.

⁸ Nirehake ty Satana fa raty ty anto’e nanompoa i Joba an’Andrianagnahare. Hoe reke tamy i Jehovah: “Toe tsy ihe hao niaro i fanagna’ey [Joba] amy i tragno’ey naho o vata’eo? Nitahie’o ze asa tagna’e, le mangetseketseke mameno tane ty biby hare’e. Fa mangatake ajafady ama’o areke, le arangao ambone i tagna’oy sady dosio ze fanagna’e, le henteo tie tsy hozogne’e amasoamaso’o eo rehe!”—Joba 1:10, 11.

9. Inogne ty raha natao i Jehovah tamy ty tognom-bande nanoe i Satana, le inogne ty anto’e?

⁹ Le mbe tsy nipaoke avao ty Satana fa nao tsy hatea i Joba an’Andrianagnahare ty anompoa’e aze fa tie misy raha soa azo’e. Nirehake ka reke tie hivalike aman’Andrianagnahare ty Joba naho fa mijale mafe. Akore ty namalea i Jehovah i Satana? Nengà i Jehovah ty Satana hitsapa hevetse i Joba hahafantaragne ty anto’e anompoa i Joba aze. Izay ty hahatreavagne fa tea an’Andrianagnahare vata’e ty Joba.

10. Inogne iaby ty tsapa hevetse nahazo i Joba, le akore ty natao’e?

¹⁰ Maro ty raha nanoe i Satana mba hitsapagne hevetse i Joba. Nisy nangalatse ty biby hare’e sady nisy namono ty ila’e. Nisy namono ka ty ankamaroa i mpiasa’ey. Hafara’e reke niazo ty hararahagne. Tsy izay avao fa mbe vinono ty tiobey ka ty ana’e folo. “Tsy nanan-tahigne ty Joba ndra tie teo iaby zay, sady tsy mba nasara’e an’Andrianagnahare” o loza tsy tan-tane rehoe.—Joba 1:22.

11. a) Inogne ka ty tognom-bande nanoe i Satana tamy i Joba, le akore ty natao i Jehovah? b) Akore ty natao i Joba naho fa nampijalé i aretegney?

 ¹¹ Le mbe niharon-draha avao ty Satana. Nieretseretse varagne reke fa ndra tie nitante i Joba ty harebaha i fanagna’ey naho ty fate i ana’e rey vaho i mpiasa’e rey, le hisintake aman’Andrianagnahare reke naho ty vata’e ro marare. Nengà i Jehovah ty Satana hagnisy aretegne raty sady minovonovotse amy i Joba. Faie le mbe tsy nivalike taman’Andrianagnahare avao ty Joba. Tsy nisole reke nirehake tie: “Le mate avao raho fa tsy mba hivalike.”—Joba 27:5.

12. Akore ty nagnamarena i Joba fa diso ty tognom-bande nanoe i Devoly?

¹² Tsy fanta i Joba tie boake amy i Satana ty hasahiragne nanjò aze. Nieretseretse reke tie va’e boake aman’Andrianagnahare o raha nahazo aze iohoe fa tsy fanta’e tie nandietse ty maha mpitondra i Jehovah ty Devoly. (Joba 6:4; 16:11-14) Faie le mbe tsy nivalike tamy i Jehovah avao reke. Trea tamy ty tognom-bande nanoe i Satana tamy i Joba, fa vande i kitomboke manao tihoey tie raty ty anto’e anompoa i Joba an’Andrianagnahare!

13. Inogne ty voka’e naho fa tsy nivalike taman’Andrianagnahare ty Joba?

¹³ Nahavany namale ty tognom-bande nanoe i Satana ty Jehovah naho fa tsy nivalike ty Joba. Ragne i Jehovah vata’e ty Joba sady nahazo valesoa fa tsy nivalike ama’e.—Joba 42:12-17.

14, 15. Inogne ty anto’e irehafantikagne fa tsy i Joba raike avao ty natao i Satana kitomboke fa ze kila ndaty?

¹⁴ Tsy i Joba raike avao ty natao i Satana kitomboke tie hivalike aman’Andrianagnahare fa ihe ka. Magnamaregne izay ty Saontsy i Jehovah amy Ohabolana 27:11 manao tie: “Mihendrea, anake, le ampifaleo ty arofoko, hamaleako i magnaraty ahỳ.” Taogne maro tafara ty nimateza i Joba ty nanoratagne o rehake rehoe. Izay ty ahafantaragne tie mbe mirehake  raty an’Andrianagnahare naho mbe manao kitomboke ty mpanompo’e avao ty Satana. Faie naho mampifale i Jehovah ty fiaignantikagne, le izay ty magnamaregne fa vande ty kitomboke anoe i Satana. Manao akore ty fahatreava’o izay? Tsy ho teà’o vao ty hagnamaregne fa mavande ty Devoly ndra tie hagnova ty fiaigna’o ty fanoagne izay?

¹⁵ Hoe ty Satana: “Ze raha anagna o ndatio le homei’e hiarovagne ty fiai’e.” (Joba 2:4) Ty reha i Satana manao tihoe “o ndatio” ty magnamaregne fa tsy i Joba raike avao ty atao’e kitomboke, fa ze kila ndaty. Iankigna ty aigne o hevetse iohoe. Nirehake ty Satana fa hivalike aman’Andrianagnahare ka rehe. Teà’e tsy hagnorike an’Andrianagnahare sady tsy hagnorike ty hamarenagne rehe naho fa misy raha sarotse mahazo azo. Inogne ty raha va’e hatao i Satana hahavoà izay azo?

16. a) Inogne ty fitake ampiasae i Satana mba hampisintahagne o ndatio aman’Andrianagnahare? b) Akore ty va’e hampiasà i Devoly o fitake rehoe hamandrihagne azo?

¹⁶ Nianarantikagne tamy Toko faha-10 ao, fa mampiasa fitake maro ty Satana hampisintahagne o ndatio aman’Andrianagnahare. Voaloha’e, “hoe liona miregnetse mipay ndaty havorembore’e” ty Satana. (1 Petera 5:8) Va’e i Satana ty mandrisike ty ragnetse, ty longo naho ty ndaty hafa, hikalagne azo tsy hianatse Baiboly naho tsy hagnorike ze raha ianara’o. * (Jaona 15:19, 20) Faharoe, “mievaeva ho anjely ty mazava” reke. (2 Korintianina 11:14) Va’e hamorogne vande reke hamitahagne azo naho tsy hanagna’o fiaignagne mampifale an’Andrianagnahare. Va’e hanao ze raha hampamoe fo azo ka reke soa tie hieretsereta’o tie tsy hahavita hampifale an’Andrianagnahare. (Ohabolana 24:10) Ndra tie “hoe liona miregnetse” ty Satana ndra tie mievaeva ho “anjely ty mazava”, le izao ty kitomboke atao’e: Nao tsy hanompo an’Andrianagnahare sasa rehe naho fa mijale ndra azo ty tsapa hevetse.  Akore ty hagnamarena’o manahake ty natao i Joba fa diso zay?

17. Inogne ty anto’e agnorihantikagne ty lily i Jehovah?

¹⁷ Mahalietse ty tognom-bande i Satana rehe naho fa mampifale an’Andrianagnahare ty fiaigna’o. Inogne ty teà izay ho rehafegne? Hoe ty Baiboly: “Anò amy ty fo’o naho amy ty vata’o vaho amy ty oza’o ty hatea’o i Jehovah Andrianagnahare’o.” (Deoteronomia 6:5) Hagniry hanao ze raha andilian’Andrianagnahare rehe naho mitombo ty hatea’o aze. Hoe ty apositoly Jaona: “Izao ty hatea an’Andrianagnahare, le ty hagnorihantikagne ty lili’e.” Naho toe amy ty fo’o vata’e ty hatea’o i Jehovah, le “tsy mavesatse ty lili’e.”—1 Jaona 5:3.

18, 19. a) Inogne iaby ty ila’e amy ty lily i Jehovah? (Henteo ty  efa-joro peje 122.) b) Akore ty ahafantarantikagne fa tsy mandily ze raha tsy ho vitantikagne ty Andrianagnahare?

¹⁸ Inogne iaby ty lily i Jehovah? Ty ila’e magnambara ty raha andrarà’e antikagne. Misy ohatse ty amy peje 122 ao, manao tihoe tie “ Ko Atao ze Raha Heje i Jehovah.” Rehafe’e ao iaby ty fomba raty andrarà ty Baiboly. Va’e tsy le raty loatse ty fahatreava’o ty ila’e ama o raha rehoe. Faie naho fa mamaky sady mametsevetse o andalan-teny tondroe’eo rehe, le hagneke ty hilala agnate ty lily i Jehovah ao. Va’e ty hagnova ty fomba mahazatse azo varagne ro ho sarotse ama’o. Faie mahafa-po naho mahasambatse ty managne fiaignagne mampifale an’Andrianagnahare. (Isaia 48:17, 18) Ho vita’o ty hanao izay. Inogne ty mahavy antikagne mirehake izay?

¹⁹ Tsy mandily ty raha tsy ho vitantikagne ty Jehovah. (Vakio Deoteronomia 30:11-14.) Ambone ty fahafantarantikagne ty vatantikagne ty fahafantara’e antikagne. Fanta’e soa ty raha ho vitantikagne naho ty tsy ho vitantikagne. (Salamo 103:14) Hanohagne antikagne reke hahavitantikagne hagnorike ty lili’e. Hoe ty apositoly Paoly: ‘Tsy mivalike amy ty saontsi’e ty Andrianagnahare, le tsy hengà’e hisy tsapa hevetse ambone’e fa ze tante’areo avao, naho fa misy tsapa hevetse le  hisia’e hirike hiakara’e soa tie hahatanteza’areo aze.’ (1 Korintianina 10:13) Ho mea’e “tovon’ozatse” ka rehe hagnampe azo hiaretse. (2 Korintianina 4:7) Hoe ty Paoly, naho fa niaretse fijaleagne maro: “Managne ozatse hiatrehagne ze raha miseho raho, fa misy magnomey ozatse ahy.”—Filipianina 4:13.

20. Inogne iaby ty toetse toko’e ho kezahe’o hanagnagne, le inogne ty ipaliagne izay?

²⁰ Tsy ampe ty tsy manao ze raha heje i Jehovah naho te  hampifale aze. Toko’e ho teà’o ka ze raha teà’e. (Romanina 12:9) Tsy hahavoatarike azo vao ty ndaty mira hevetse ama’o naho tea ze raha teà’o sady tsy magnambane ze raha lahibey ama’o? Manahake izay ka ty Jehovah. Mianara ho tea ze raha teà’e. Amy Salamo 15 ty ila’e amy izay. Rehafe’e ao ty toetoe ty ndaty teàn’Andrianagnahare ho ragne’e. (Vakio Salamo 15:1-5.) Manoro ty atao ty Baiboly tihoe tie ‘vokatse ty fagnahy’ iareo. Intoagne iaby zay: “Hatea, hafaleagne, fiadanagne, fitanam-po, hasoa fagnahy, hasoa toetse, finoagne, halem-pò, fanjiram-batagne.”—Galatianina 5:22, 23.

21. Inogne ty hagnampe azo hanagne toetse teàn’Andrianagnahare?

 ²¹ Hanagne o toetse teàn’Andrianagnahare rehoe rehe naho mamaky sady mianatse Baiboly lognandro. Ty fianara’o ze raha andilia’e ty hagnampe azo hanagne ty heven’Andrianagnahare. (Isaia 30:20, 21) Miankigne amy ty hatea’o aze ty hahavy azo hanagne fiaignagne mampifale aze.

22. Hagnamaregne inogne rehe naho mampifale an’Andrianagnahare ty fiaigna’o?

²² Toko’e hikezake mafe tikagne naho te hanagne fiaignagne mampifale i Jehovah. Ampanahafe ty Baiboly amy ty fanintahagne ty toetse taloha naho ty fiakanjoagne ty toetse vaovao ty fagnovàgne ty fiaignagne mahazatse. (Kolosianina 3:9, 10) Faie hoe ty reha ty ndaty mpanoratse salamo miomba ty lily i Jehovah: “Ahazoagne valesoa lahibey ty fagnorihagne aze.” (Salamo 19:11) Hanahake izay ka rehe naho mampifale an’Andrianagnahare ty fiaigna’o. Izay avao ty hagnamarena’o fa diso ty tognom-bande i Satana sady hampifale ty arofo i Jehovah rehe!