LESOGNE 2
Ia o Andrianagnahare Zao?
1. Nagnino tikagne ro toko’e hivavake ama’e?
Andrianagnahare ty Mpamorogne ze kila raha. Tsy nisy fiatomboha’e reke sady tsy hisy fifaragna’e. (Salamo 90:2) Boake ama’e ty talily soa agnate Baiboly ao. (1 Timoty 1:11) I Andrianagnahare maregney avao ty toko’e hivavahantikagne, fa ie ty nagnomey aigne antikagne.—Vakio Apokalypsy 4:11.
2. Manao akore ty toetse’e naho ty miomba aze?
Tsy trea maso reke fa Fagnahy. Ambone naho mahery mihoatse o ndatio o fagnahy zao. (Jaona 1:18; 4:24) Ndra tie tsy trea maso ty Andrianagnahare, le trea amy ty raha niforogne’e ty toetse’e. Hendre naho bey hatea, ohatse, reke kanao namboatse o folerao naho o hatae misy voa’e sambe karaza’eo. Mahery vata’e reke kanao nahavita namboatse i lagnitse feno vasiagney.—Vakio Romanina 1:20.
Hahafantatse ty toetsen’Andrianagnahare tikagne naho mamaky Baiboly. Trea ao, ohatse, ty raha tea’e naho ty raha heje’e. Trea ao ka ty fomba findesa’e o ndatio naho ty raha atao’e naho fa manao fahadisoagne tikagne.—Vakio Salamo 103:7-10.
3. Managne agnaragne vao reke?
Eka, satria hoe ty Jesosy: “Rae’ay amy lagnitsey ao, hohamasinegne abey ty tahina’o!” (Matio 6:9) Maro ty agnaram-boninahitse itokavagne an’Andrianagnahare, faie raike avao ty tahina’e. Sambe managne ty fanognona’e aze o ndatio. Fa naho amy ty rehan-gasy, le i “Jehovah” ndra “Iaveh” ty ampiasaegne.—Vakio Salamo 83:18.
Maro ty Baiboly nanolo i tahinan’Andrianagnaharey ho Tompo ndra Andrianagnahare. Faie vaho sinoratse o Baibolio, le fa niherekeregne tao im-7000 ty tahinan’Andrianagnahare. Naho fa nampianatse ty Jesosy, le nampahafantare’e o tahinagne iohoe.—Vakio Jaona 17:26.
Henteo ty video Managne Agnaragne vao ty Andrianagnahare?
4. Tsy midare antikagne vao ty Jehovah?
Hejen’Andrianagnahare vao o ndatio kanao engà’e hijale? Misy mihevetse fa tsapa heven’Andrianagnahare o fijaleagneo. Faie diso zay.—Vakio Jakoba 1:13.
Engàn’Andrianagnahare hifily ze tea’e hanoegne o ndatio, ndra hanompo aze ndra tsy hanompo aze. (Josoa 24:15) Faie maro ty mifily ty hanao raty, le mampijale ty ila’e. Manahelo ty Jehovah mahavazoho ty tsy rare’e hoe zay.—Vakio Genesisy 6:5, 6.
Tea antikagne ty Jehovah, sady tea’e ho fale amy ty fiaignagne tikagne. Fa marine ty hagnafaha’e ze raha mahavy o ndatio hijale. Misy anto’e soa kanao mbe tsy afaha’e o fijaleagneo. Magnazava izay ty Lesogne faha-8.—Vakio 2 Petera 2:9; 3:7, 13.
5. Akore ty fomba hiharineantikagne an’Andrianagnahare?
Amy ty alala ty vavake. Tea i Jehovah hirehake ama’e naho hiharine aze tikagne. Mipay ze hahasoa antikagne tsikiraidraike reke. (Salamo 65:2; 145:18) Vognogne hamela heloke reke, sady mahavazoho ty kezake ataontikagne ndra tie manao fahadisoagne tsikindraikindraike tikagne. Mahazo mifandrambe ama’e areke tikagne ndra tie tsy voririke aza.—Vakio Salamo 103:12-14; Jakoba 4:8.
Toko’e hihoatse ty hateantikagne o ndatio ty hateantikagne i Jehovah, fa ie ty namorogne antikagne. (Marka 12:30) Atorò fa tea aze rehe, le tohizo ty fianara’o Baiboly sady ampiharo ze raha ianara’o. Izay ty fomba hagnarinea’o aze.—Vakio 1 Timoty 2:4; 1 Jaona 5:3.