Maro ty fanjakagne mitake ty hagnajagne o elagnelagneo naho mandrara o fivorivoriagneo. Vognogne hagnorike izay o Vavolombelo i Jehovah-o, faie mbe manohy manompo an’Andrianagnahare avao iareo. Mba hahafaha iareo miarake mivory areke, le mampiasa programa fanoagne Vidéoconférence iareo. Agnisa izay ohatse ty programa Zoom.

 Neke ty Filan-keve-pitantanagne fa hivilianagne konte Zoom o fiangonagneo, amy izay iareo afake mivory tsy tapake avao, le i vola fagnomezagne nimeintikagne rey ty niviliagne aze. Mahazo tombo’e ty fiangonagne ila’e noho ty nanoagne ze raha zay, satria tsy voavily iareo i konte tsotra fanoagne vidéoconférence rey. Ty anto’e, eo ho eo amy ty 15 dolara (55 000 ariary), ndra 20 dolara (75 000 ariary), ndra mihoatse izay ty vily o konte iohoe. Mateteke i fiangonagne rey ro nampiasa i programa tsy andoavam-bola rey, ie amy izaò voafetra avao ty isa ty ndaty afake mizilike ao sady tsy tena azo antoke ka. Faie mandrambe soa iaby ze fiangonagne mampiasa i konte Zoom i fikambanagne rey. Tsotra ty fomba iarovagne aze sady maro ty ndaty afake mizilike amy i fivoriagne anoentikagne rey. Fa losotse ty 65 000 zao ty fiangonagne mampiasa o konte Zoom rehoe. Amy ty firenena losotse ty 170 agne ty misy o fiangonagne rehoe.

 Nampiasa i programa tsy andoavam-bola rey ty fiangona i Kairagi a Manado, a Indonezia agne, tie taloha. Mampiasa i konte Zoom ahy i fikambanagney zao o fiangonagne iohoe amy hinane zao. Hoe ty rahalahy Hadi Santoso: “Afake mivory avao zao ndra o rahalahy naho o rahavave tsy zatse mampiasa varam-bazahao aza. Tsy mila miherenkeregne mizilike ka iareo agnate i fivoriagney mbe mandehay.”

 Hoe ty Lester Jijón, Jr., androanavi-pagnahy amy ty fiangona i Guayacanes Oeste, a Guayaquil, a Ekoatera agne: “Maro ty rahalahy naho ty rahavave sahiragne. Tena tsy vita ty fiangonagne ila’e areke ty hivily fahazoan-dalagne hampiasa Zoom mba hahafaha o fiangonagneo hagnatreke fivoriagne. Faie maro amy hinane zao ty afake mizilike amo o fivoriagneo, satria eo i konte Zoom nimey i fandaminagney. Afake manasa ndaty hafa maimaim-poagne ka aza zahay mba hagnatreke i fivoriagney, sady tsy misy atahoragne ndra tie maro aza ty ndaty mizilike ao.”

 Hoe ty Johnson Mwanza, androanavi-pagnahy amy ty fiangona i Ngwerere Avaratse, a Lusaka, a Zambia agne: “Mateteke ty ankamaroa o rahalahio naho o rahavaveo ro mirehake tie: ‘Tsapa’ay amy hinane zao fa vao mainke nifandrambe marine amo o mpiara-manompò zahay noho ty fisia i fivoriagne amo o Zoom iohoe. Tsapa’ay ka fa tena tea naho mikarakara anay ty Jehovah.’”

 Vola natokagne hagnampeagne o ndaty niazom-boigneo ty niviliagne i konte hoahy i fikambanagne rey. Boake amy i fagnomezagne hoahy ty asa magneran-taney o vola iohoe. Natao tamy ty alala ty donate.dan124.com ty ankamaroa o fagnomezagne iohoe. Misaotse anareo amy ty fagnomezagne tsiefa anoe’areo. Hagnampeagne ze ndaty niazom-boigne ila’e magneneke ty tane toy ka i fagnomezagne rey.—2 Korintianina 8:14.