Tagnate ze folo taogne mahery zay le agnisa ty nahasarike ndaty maro amy ty fanompoagne ataontika o kalesy fampirantiagneo. Ndra aia ndra aia ahatreava o ndatio i kalesy fampirantiagney le avy le fanta iareo tie itika ty mampiasa aze. Tsy vita tihoe mahasarike i kalesỳ fa mbe mora ampiasagne ka. Va’e hitovy hevetse amy i Asenata rahavave a Polony agne toy rehe. Hoe reke: “Tena tsotra i kalesỳ faie soa sady manintogne. Tsy sarotse ty mampiasa naho ty mamindrafindra aze.”

 Fa nieretserete’o vao tie akore ty fomba nagnamboaragne i kalesy rey?

 Tamy ty taogne 2001 ty nagnekea o Filan-keve-pitantanagneo fa afake mipay fomba maro isan-karaza’e mba hitoriagne amy ty ndaty maro ty rahalahy naho rahavave a Frantsa agne, le agnisa izay i kalesy fampirantiagney. Namboatse kalesy maromaro iareo sady sambe hafa ty pozi’e. Natao iareo manahake o valizio sady misy etazera zao ohatse ty pozi’e amy izay afake ampirantiagne naho agnajagne i boke naho gazetey. Tamy ty fara’e ty sampa i Frantsa le nifily pozi’e raike fampiasà o mpitorio tagnate ty taogne maro.

 Tena nahafale o rahalahy a Frantsa agneo ty nivoka i asa fitoriagne amy ty ndaty maro natao iareoy. Neké o Filan-keve-pitantanagneo ty hampiasagne fomba hafa mba hitoriagne amy ty toeragne maro ndaty a Etazonia agne tamy 2011, tsy inogne zay fa ty fampiasagne kalesy naho latabatse. Ze mpisava lalagne nandrambe anjara tamy zay le nahatrea fa maro ty tombotsoa azo boake amy ty fampiasagne i kalesy fampirantiagney, agnisa izay tihoe afake andesegne mandehandeha reke. Nagnomey soso-kevetse mete soa areke iareo mba hahafahagne magnasoa ty pozy i kalesỳ. Hatae ty namboaragne i kalesy voaloha’ey, le tena nanahiragne ty nangalake naho nanese aze satria navesatse. Nipay hevetse hafa areke iareo mba hanoagne aze maivagne, faie tsy natao maivagne loatse manjare aviombio o tiokeo. Nitrea iareo ka tie soa naho asiagne larò’e beibey i kalesỳ amy izay tsy tsiela tonta naho fa aroso amo o tane tsy mirao ndra feno vatovatò. Tsy izay avao fa nasia iareo boate kedekedeke ka ty ao mba hagnajagne ty ila’e amy boke naho gazete rey.

 Nisy voka’e soa ze fomba fiasa zay. Neké o Filan-keve-pitantanagneo areke tamy 2012, fa afake mampiasa kalesy fampirantiagne iaby ty rahalahy naho rahavave magneran-tane. Nifagnarake tamo o mpamboatseo areke i rahalahy rey le nikomandy kalesy maro, sady maivagne ro mafe.

 Tagnate ty taogne maro, le nihasoagne tsikedekede i kalesy rey. Ohatse zao tamy 2015 le nasiagne fogno’e plastike tsy len’oragne ty aloha eo. Tena nitea i Dina, mipetrake a Georgia agne o pozi’e iohoeke. Hoe reke: “Misy fitaovagne manokagne ‘tsy len’oragne’ mba hiarovagne o boke naho gazeteo i kalesỳ.” Tamy 2017 le nisy afisy misy fandriam-bigne natao tamy ty firehake tsiampeampe. Izao ty nirehafe i Tomasz rahalahy a Polonina agne: “Nisy koly i afisy talohay le tena nisarotse ty nagnafake aze naho fa hovagne. Tena nimete soa areke ty nampiasagne i fandriam-bigney.” Tamy 2019 le mbe nisy fiovagne hafa avao ka natao tamy i fitaovagney naho tamy ty fagnamboaragne i kalesỳ amy zay reke mba maharetse mihoatse ty taloha.

 Toeragne raike avao ty nagnamboaragne i kalesy fampirantiagne rey, izay vaho nalefa amy ty fiangonagne magneran-tane. Vola 43 dolara, ty lany amy ty fagnamboaragne ty kalesy raike, mbe tsy agnate io ao ty forè andefasagne aze naho ty vilin-draha hafa. Hatrake amy zao le fa mihoatse ty 16 dolara ty lany tamy ty namboaragne kalesy, le mihoatse ty 420 000 ty isa ty fa nalefa tamy ty fiangonagne magneran-tane.

 Mba hampiasagne soa i fagnomezagne rey le avy le natao maro ty kalesy fampirantiagne nihafaregne. Fagnampe izay ka le nameagne fitaovagne fikojakojagne aze o fiangonagneo amy izay naho fa misy simba i kalesỳ le tsy voatere soloegne fa amboaregne avao.

 Mahafale ty mpitory magneran-tane ty mampiasa i kalesy fampirantiagney. Nirehake hoe izao ty Martina boake a Ghana agne: “Mateteke le itika ty magnantogne o ndatio naho fa mitory. Fa ty tena iteavako ty mampiasa i kalesỳ, le o ndatio ka ro magnantogne antika. Ndra ty ndaty mandriogne avao aza le fa afake itoriagne.”

 Tamy ty firenena hafa ta Afrika agne, le nisy lahilahy raike nagnantogne i kalesỳ sady nalake boke tamy ty fireha’e. Niheregne reke heregnandro raike tafara izay le nirehake tie: “Vinakiko iaby i lahatsoratsey. Tena lahibey ty fagnazavagne rehafegne ao. Hozaraeko amo o keleiakò toy naho fa avy ama’ay agne raho,” 500 kilometatse miala eto ty misy anay. Roe volagne tafara izay le niheregne reke sady nirehake tie: “Namaky i lahatsoratsey iaby ze ndaty tama’ay agne le tena nifale iareo nahatrea ty fagnazavagne tagnate’e ao. Te hanjare ho Vavolombelo i Jehovah iareo faie misy raha tea iareo hagnonteneagne anareo. Fanta iareo zao ohatse fa naho te hatao badisa iareo le tsy maintsy alimpotse agnate rano. Faie tsy misy renerano marine ty tanagne misy anay. Tsy maintsy avy atoy vao zahay vaho azo atao badisa?” Nimea i mpitory rey ty mpisava lalagne mampiasa i firehakey ty nimero i lahilahỳ. Nanomboke tamy izay le nifampirehake tsy tapake iareo roe.

 Tena mahafale ty mahatrea i kalesy fampiratiagney ampiasaegne hitoriagne mba “ho vavolombelogne amy ty firenena iaby.” (Matio 24:14) Akore ty ahafahagne mandoa ty vola lany mba hagnamboaragne i kalesy rey? Amy ty alala ty fagnomezagne hoahy ty asa magneran-tane ty ahafahagne manao izay. Azo atao amy ty alala ty Internet ka o fagnomezagne iohoe amy donate.dan124.com ao. Misaotse anareo amy ty fatariha’areo.