Nirehake hoe izao ty Fitalakesan-davitse (angilé) 1 Jona 1912: “Va’e maro amy i ndaty mamaky ty raha aboantikagne rey ro mahafantatse ndaty goa. Afake mahazo raha ho vakiegne i ndaty goa rey. ... Natao amy ty endreke afake vakie o ndaty goao ty gazete toy.” Mbe nirehake hoe izao ka i gazetey: “Maro ty ndaty goa tena fale naho fa nahafantatse tie tena mbe hihasoa ty fiaignagne amy ty hoavy.”

 Tamy ty fotoagne nanoratagne o rehake rehoe, le mbe sambe hafa ty fomba nampiasae o firenena mirehake angiléo naho fa nandika soratse braille iareo. Faie o Vavolombelo i Jehovah-o fa nandika ty hamarenagne amy Baiboly ao amy ty endreke braille. Le mbe manao izay tikagne hatrake amy izao. Managne fitaovagne ara-baiboly amy ty endreke braille amy ty firehake losotse ty 50 tikagne tie amy izao. Akore ty atao naho fa mandika aze?

 Ty voaloha’e, le ovagne ho amy ty endreke braille heike i lahatsoratsey. Hoe ty Michael Millen miasa amy ty Sampan’asa ty Fanoratagne a Patterson, New York agne: “Taloha tikagne nampiasa programa niforogne ty tontolo toy magnova soratse ho amy ty endreke braille faie tsy mete amy ty firehake iaby i rahay. Fa amy izao tikagne mampiasa ty programa tihoe Watchtower Translation System, sady mete mamalike soratse fa ho amy ty firehake magneran-tane io. Mino raho fa tsy misy fitaovagne manahake io ty agne ho agne.”

 Tsy lahatsoratse amy i bokey ndra i gazetey ao avao ro trea agnate ty fitaovagne amy ty endreke braille fa misy fagnazavagne sare ka ty ao. Izao ohatse ty agnazavagne i sare amy ty fogno i boke Ankamamio Nainai’e o Fiaignagneo! amy ty endre’e braille: “Lahilahy raike mandeha amy ty lalagne miotakotake feno folera, haboagne naho vohitse ty magnodidigne aze.” Hoe ty Jamshed, rahalahy goa mpagnampe amy ty fiangonagne sady mpisava lalagne: “Tena sarobily amako o fagnazavagne sare reo.”

 Naho fa vita dika ho amy ty endreke braille i lahatsoratsey, le alefa amy ty birò i sampagne agne mba hanambàragne iareo ho raike. Afara izay reke atambatse amy ty taratasy mafe amy izay tsy poteke ndra ho simba sady tsy mifafa ka i teboteboke rey amy iareo atambatsey. Naho fa avy eo, le mitambatambatse i peje rey, le manjare hoe kahie ty pozi’e. Alefa amy ty fiangonagne fa mpagnafatse irey iareo afara izay ndra alefa amy ty “raha maimaim-poagne hoahy ty ndaty goa” naho ohatse misy izay ty amy ty posita amy i sampagney eo. Misy fotoagne aza o sampagneo manao fandaharagne mba handefasagne i raha rey tsiela amy izay afake mampiasa irey amy ty fivoria ty fiangonagne i rahalahy goa ndra tsy le mahatrea soa rey.

 Fotoagne maro sady vola tsiefa ty ahavitagne ze asa rezay iaby. Naho ty maregne, le mitovy amy ty fotoagne lany agnamboara ty fanoantikagne pirinty a Wallkill, New York agne Baiboly eo amy ty 50 000, ty fotoagne lany amy ty amalihagne ty Baiboly braille roe. Misy boke 25 eo ohatse ty Baiboly amy ty endre’e braille amy ty firehake angilé. In-123 ty vola lany amy ty famokaragne Baiboly raike, ty vily i fitaovagne amokaragne i boke 25 mahafeno Baiboly raike amy ty endre’e braille. a Ty fogno ty vily ty raike amy i boke 25 rey zao eo amy ty 150 dolara (Ar 600 000 latsake)!

 Ino ty tsapa i ndaty miasa amy ty famokaragne boke naho gazete amy ty soratse braille rey mahakasike ty asa’e? Hoe ty Nadia, miasa amy ty sampa i Afrika Atimo agne: “Tsy mora ty fiaigna o rahalahy naho o rahavave goa ndra tsy le mahatrea soa reo. Rambeseko ho tombotsoa areke ty manao raha mba hagnampeagne iareo. Trea tie tena tea iareo vata’e ty Jehovah.”

 Faie akore naho misy ndaty raike goa faie tsy mahay mamaky soratse braille? Taogne tsiampeampe lasa zay, le namoake fitaovagne tihoe Mianatse Mamaky Soratse Braille tikagne. Misy amy ty endreke braille naho soratse vita pirinty io. Natao hoahy ty ndaty raike mahatrea o fitaovagne iohoe, mba hahafaha’e mampianatse mamaky soratse braille ty ndaty raike goa. Misy fitaovagne miarake ama’e afake ampiasae ty ndaty raike goa hanoratse braille o boke iohoe. Afake mampiasa i fitaovagne rey ty ndaty mianatse braille mba hahafaha’e hanoratse ty abody braille tsikiraidraike. Ty fanoagne izay mateteke ro magnampe ze mianatse braille hahatadidy ty abody tsikiraidraike amy ty soratse braille. Hagnampe aze hahay i abody braille rey ka io naho fa mitsapa aze reke.

 Ino ty soa rambese i rahalahy naho i rahavave goa ndra tsy mahatrea soa rey boake amy i fitaovagne amy ty endreke braille rey? Magnatreke fivoriagne tsy tapake ty Ernst, mipetrake a Haity agne faie tsy managne fitaovagne amy ty endre’e braille. Mampiasa ty fitadidia’e avao reke naho fa manao ty anjara mpianatse meagne aze sady naho fa magnomey toin-drehake. Faie hoe reke tie amy izao: “Afake mananga-tagnagne naho magnomey toin-drehake mateteke raho. Tsapako hinane zao fa tena miharo amo o rahalahy naho o rahavaveko reo raho. Mitovy iaby avao ty hanegne ara-pagnahy azontikagne.”

 Androanavi-pagnahy sady mitarike Fianaragne Fitalakesan-davitse naho Fianaragne Baiboly Anoe ty Fiangonagne ty Jan, mipetrake a Ostralia agne faie tsy mahatrea soa. Hoe reke: “Ty boke naho ty gazetentikagne amy ty endre’e braille ro mazava naho oharegne amy ty aboa ty ndaty hafa. Ohatse zao, misy peje, naho fagnamarehagne ambane peje mora trea vaho fagnazavagne sare ty ama’e.”

 Goa sady karegnegne ka ty Seon-ok, mpisava lalagne a Korea Atimo agne. Taloha reke le fa niantehetse avao amy ty fandikagne baiko moagne am-pivoriagne agne. Faie amy izao reke afake mamaky amy ty soratse braille i fitaovagne fianaragne Baiboly rey manokagne. Hoe reke: “Tena sarotse ty mamaky ty fitaovagne amy ty soratse braille aboa o ndatio satria misy fotoagne i teboke rey manke, le i tsipikey miolakolake. Ndra i taratasỳ iaby aza manify. Faie tena soa ty taratasy ampiasae o Vavolombelo i Jehovah-o, le tena mora trea iaby ka i teboke rey. Mora amako areke ty mamaky i raha rey.” Hoe indraike reke: “Lava nipay ndaty hagnampe ahy avao raho naho fa nianatse Baiboly tie taloha. Faie amy izao raho afake mianatse irerike. Manjare afake magnomagne soa i fivoriagne isan-keregnandro rey raho sady afake mandrambe anjara feno amy irey. Fa nivakieko iaby ze fitaovagne amy ty soratse braille naboantikagne. ‘Tena mamaky i raha rey tsy tapake raho.’”

 Ahatreavagne ty fehezanteny toy avao ka o fitaovagne amy ty endre’e braille aboantikagneo, manahake i fitaovagne ila’e aboantikagne rey: “Tsy avarotse ty fitaovagne toy. Natao hampianaragne Baiboly magneran-tane ty anto’e nanoagne aze, le tohanagne amy ty alala ty fagnomezagne an-tsitrapo.” Misaotse azo nagnorike i fanoroagne trea amy donate.dan124.com aoy naho fa nanao fagnomezagne. Magnampe amy ty famoahagne hanegne ara-pagnahy hoahy ze kila ndaty iaby, agnisa izay i ndaty goa naho tsy mahatrea soa rey ty fatariha’o.