Itetemitai ipapero kwape itunganan “yenidicanaros kayenice kotoma amin arai angosibib.” Kwape aanyunet, akaulo Daudi aiyar Goliat, abu Yonatan oduk keda Daudi epaperone loegogong. (1Sam 18:1) Abu nginidiopet kakesi itodu iponesio luaminakinitos yenice. Kanuangun, alibunet naka epaperone loegogong nges aijen nakabeit. Ajenun itunganan eyangaikini apak ka agogong. Konye kotoma olago, epedorete itunga araun “ipapero” kopone loka aicikakin irwan atipet bon itutubet yenika ipapero kolago. Naarai epedori itunganan olago aitemokin akiro nuelimuni ngesi arai bo nat ayait epone loseseniata luce nges, etapatan do ngin itunga luarokok aituputooro bala ejokuka. Kanuangun, ejok jo ajaut keda ‘nuitutubit jo kanuikamunitos ipapero.’ Mam ikuriana agwetar ngul luilipitos araun ipaperokon arai mam jo ijeni kes naarai ebe ekadakini itunganan ngin. Kanu acoit atiokisio nuetakanunete, etojokasi ice amamut aitosom cut iponesio ice luka elago arai bo social network. Konye arai iseu jo aitosom elago, anyoika bo nuibusakinit jo aiitunit?

KOSESENATA EBIDIO KITOSOM ELAGO EJOK, KOSODETE ABONGONOKIN AINGISETA NUTA:

• Anyoika bo nuibusakinit jo aijen eringa iwadikakina akiro arai aipikakin aputosia olago?

• Kanukinyo ibusakinitor jo acoit naiseunia ipapero kolago?

• Kanukinyo ibusakinitor jo aitutub apak naidauni itosomai elago?​—Pes 5:15, 16