TÔÔ ase wer u ngu zenden sha godobi tugh ngôgh ngôgh. Ica i gbe ga yô, ka u er or ngu van we ken ijime nahan. Ka wea tile yô, or la kpa nan tile. Wea zende fele fele, nan kpa nan zende fele fele. Maa u tsembe ayem; u yevese u za ta hen ya u ijende you u a lu ikyua yô. Ijende you bughun hunda, u nyer ken iyou yô, ishima gba u shimi.

Alaghga imba kwagh ne ngi a er u ga, kpa adooga ishimanyian i sha akaa a uma ia na u hingir tenge tenge. Ikyav i tesen yô, ieren igen ngi i u lu nôngon wer u de i, kpa i lu taver we yôô? U ngu a tom ga ica i gba hegen shi u nôngo sha afatyô wou cii wer u zua a mi, kpa u ngu fantyô gaa? Ishima ngi zan we iyol wer u va bee iyol, nahan iangev mbia gema zan we iyolo? Shin ma kwagh ugen ngu u a lu nan we ishimanyiana?

A lu zayol u nyi je u lu nôngon a mi kpa, aluer u zua a or u u fatyô u pasen nan akaa a a lu nan we ishimanyian la, shi nana na u iwasen sha shighe u u soo la nahan, a doo u ga he? U ngu a imba ijende la kpa? Een, u ngu a mi yum! Ka Yehova a lu ijende you la ye, er tertamen Aberaham kpa lu ijende na nahan. Bibilo pase kwagh ne ken Yesaia 41:8-13. Ken ivur i sha 10 man 13 la, Yehova kaa a mbacivir un ér: “De cie ga, gadia M ngu a we; de enger kenger sha mcie ga, gadia Mo M ngu Aôndo wou, M taver we, shi M wasen we, man M tuur we sha uwegh Agh ku yanegh ku yiman a yima la. Gadia Mo, TER, Aôndo wou, M kôr uwegh ough ku yanegh; M kaa a we Mer: De cie ga, M wasen we.”

Mkaanem man taver se ishima ga he? Nenge ase kwagh u Yehova a tende zwa u eren sha ci wase ne. Mkaanem mara tese ér u ngu zenden vea Yehova ikyooso ikyooso ga, kpa luun er ka u u zende vea na ikyooso ikyooso je kpa, ma i vihi u ga. Luun er u ngu zenden vea na ikyooso ikyooso yô, uwegh nagh ku yanegh ma ku ker uwegh ou ku imesegh. Kpa Yehova er nahan ga. A dugh ‘uwegh nagh ku yanegh ku yiman a yima’ la, a gema a kôr ‘uwegh ough ku yanegh,’ ngu tuur we sha u una kar a we hen ape zayol a lu la kera yô. Yehova ka una kôron we sha uwe yô, a taver we ishima sha mkaanem man, ér: ‘De cie ga, me wase u.’

U nenge Yehova wer ka Ter u man Ijende you i lun a dooshima i ia wase u shighe u u nyer ken zayol la je kpa? Kwagh wou gba un ishima, shi a soo ér i kpe u iyol shi a kange ishima u wasen we. Ka wea tagher a ican yô, Yehova a soo ér we u fa wer una kende u ga, sha ci u kwagh wou doo un ishima tsung. Sha mimi yô, Yehova “ka iwasen i i lu ikyua ikyua ken ican je” yô.—Ps. 46:1.

Mbagenev ka ve shi yan ican ken ishima sha akaabo a ngise ve er la, ve henen ér Aôndo de ve a mi  ga. Aluer kape ka i lu u la yô, hen ase sha kwagh u Yobu, u yange lumun ér un er ‘afer a iyev nav’ la. (Yobu 13:26) Orpasalmi Davidi kpa, kape yange i lu un je la, nahan a zamber a Yehova ér: “De umbur asorabo am a m lu iyev la ga, man atindi a m lu peren la kpaa ga.” (Ps. 25:7) Er se yen yô, se cii se “er isholibo nahan [se] kera mba a iengem i Aôndo ga.”—Rom. 3:23.

Yange i nger loho u ken Yesaia ityough 41 la jighilii sha ci u Mbaiserael. Yange ve er asorabo kpishi je yô, Yehova tsaha ve sha u den ér i yem a ve uikyangen ken Babilon. (Yes. 39:6, 7) Nahan cii kpa, Aôndo wa ishima u va yiman mba vea gema ishima shi vea hide hen a na la! (Yes. 41:8, 9; 49:8) Nyian kpa, Yehova ka a er imbakwagh ne sha u tesen mba ve gem ishima shi ve soo u eren ishima na la dooshima man mhôônom ma zungwen.—Ps. 51:1.

Nenge ase kwagh u yange er anmgbian ugen u i yer un ér Takuya * la. Yange lu nôngon a ieren i ndôhôrishima i nengen ufoto mba jimbagh shi ngirigh ilyeegh nagh ki yaven a kwase la. A nôngo ashighe kpishi ér una de ieren ne, kpa lu fantyô ga. Nahan lu un ken ishima nena? A kaa ér: “Yange m nenge mer m kera gba kwagh cuku kpaa ga, kpa mea er msen, mea zamber Yehova mer a dem kwaghbo wam yô, a kendem ga.” Yehova yange er kwagh ne nena? Mbatamen mba ken tiônnongo u Takuya kaa a na ér hanma kwa u a hidi a lu nengen ufoto mba jimbagh shi ngirigh ilyeegh nagh ki yaven a kwase la yô, a ôr ve. A ôr sha mimi nahan ér: “Er lu ican kpishi u ôron ve nahan kpa, hanma kwa u mea er nahan yô, m zua a ishimataver.” Maa mbatamen kaa a ortamen u sôron atôônanongo ér a za Takuya inya, a za taver un ishima. Ortamen u sôron atôônanongo la ze yô, a kaa a na ér: “M gba karen a ishima yam tsô van heen ga. Ka mbatamen ve kaa a mo ér m va ye. Ve kaa ér m va taver we ishima.” Takuya kaa ér: “Lu mo m lu eren isholibo ye, kpa Yehova gema lu wasen mo sha ikyev i mbatamen.” Shighe kar yô, Takuya de ieren na ne, shi gema eren pania u keke la, shi hegen ngu eren tom shin afishi a branci ugen. We kpa Yehova una wase u, vough er yange wase anmgbian ne nahan.

Ior kpishi ka vea lu a tom ga yô, ishima i nyian ve. I de mbagenev tom, nahan mba nôngon sha afatyô ve cii ér vea zua a tom ugen, kpa mba fantyô ga. Aluer hanma ijiir i u ze wer i tôô u tom cii i venda yô, nenge er a lu u ken ishima yô. Mbagenev ka vea tagher a imbakwagh ne yô, ve nenge ér ve gba kwagh ga. Yehova una wase u nena? Alaghga una zua u a tom u injaa fese er u hen la ga, kpa adooga una wase u, u umbur mkaanem ma Tor Davidi man, ér: “Ngise m lu iyev, hegen m bee iyol, nahan kpaa, mayange m ngu a nenge i ta orperapera kera ga, shin tsombor u nan kpaa u sônon kwaghyan ga.” (Ps. 37:25) Mimi yô, a nenge u ér u gba kwagh, shi a kôr u ‘uwegh nagh ku yanegh ku yiman a yima’ la, sha er una wase u u zua a kwagh u kwagh a gbe u a mi la, nahan u za hemen u civir un yô.

Anmgbian u kwase Sara, u a lu ken tar u Colombia la, yange fa er Yehova lu wasen un yô. Yange lu eren tom hen zege kômpeni ugen u i kimbin un inyaregh kpishi yô, kpa tom shon gema lu hemban yan un shighe cii. Kpa gema sar un u seer eren  Yehova tom, nahan a de tom u uke la, a za hii pania u eren. Nahan kpa, ngur keren tom u una eren sha ashighe ashighe yô, lu un zange u zuan a mi ga. Maa za bugh shôôpu i teen kwaghman u ndôhôr u i yer ér ice-cream la, kpa shighe ngur karen yô, kera lu a inyaregh ki una za hemen a kpenga ne ga, nahan wuhe shôôpu shon. Sara kaa ér: “M wuese Yehova kpishi er anyom atar kar kpa, wasem m za hemen u wan ishima yô.” Yange fa akaa a kwagh gba un a mi sha mimi la, shi hen er una er ve ishima ia kera nyian un sha kwagh u kper ga yô. (Mat. 6:33, 34) Shighe kar yô, or u ngise tôô un tom la hide yila un shi ver un sha iantom i yange vande lun sha mi la. Kpa anmgbian u kwase ne kaa ér una lumun u eren tom shon, aluer ka u una eren u sha ashighe ashighe tseegh, shi una zuan a ian i eren akaa a ken jijingi yô. Or u tôô un tom la kpa lumun nahan. Er Sara a kera zough a inyaregh er ngise nahan ga kpa, a fatyô u zan hemen u eren pania. Er Sara lu ken mtaver nahan kpa, a kaa ér: “Yange m nenge er m doo Yehova ishima yô.”

Zayol u vesen ugen yô, ka iyolbeen. Ior kpishi ka kuman u vea de tom, nahan ishima i ngi nyian ve ér vea va kera zuan a inyaregh kpishi ki nengen sha ayol a ve tsembelee ga. Shi ishima ngi nyian ve ér vea va bee iyol yô, alaghga iangev mbia gema zan ve iyol. Alaghga tsô lu Davidi zamber a Yehova ér: “De tem kera sha shighe u iyolibeen la ga, de undun mo shighe u agee am a bee la ga” ye.—Ps. 71:9, 18.

Mbacivir Yehova vea er nan ve vea va bee iyol kpa, a za ve iyol ga? Gba u vea za hemen u nan Aôndo jighjigh ér una nenge sha mbamgbe vev mba hange hange mbara. Nahan kpa, aluer ngise ve lu yôughyôugh yô, alaghga a gba u vea pande akaa ken uma ve, shi akaa a ve lu a mi kpuaa la a kuma ve. Alaghga vea kav ér, aluer mba yan “ikyaiue,” ka “icôngonbua” ga yô, a hemba kpen ve iyol! (Anz. 15:17) Aluer u hemba veren ishima u civir Yehova yô, una nenge sha a we shighe u u bee iyol la je kpaa.

Nenge ase kwagh u anmgbian José vea kwase na Rose, mba ve er Yehova tom hanma shighe, i kom anyom 65 ne. Anyom a karen ken ijime ne, ve nenge sha ter u Rose, u gba u a nengen sha a na fele fele hanma iyange la. Shi José iyolna kpa yange va gba kyansa, nahan i er un twer. Yehova yange tuur José man Rose, mba ve civir un sha mimi ne, sha uwegh nagh ku yanegh nena? Yange er kwagh ne sha ikyev i anmgbian ugen ken tiônnongo u i yer un ér Tony la vea kwase na Wendy. Tony vea Wendy yange ve na José vea Rose, iyou i tsan hen ya ve. Tony vea kwase na Wendy yange ve soo u nan upania mba pasen kwagh hanma shighe yô, ijiir i tsan hen ya ve gbilin. Anyom a karen ken ijime la, Tony a ta ashe sha windou, ken makeranta na, a nenge José vea Rose ve duen kwaghpasen hanma shighe. Ishimatseen ve la na yô, kwagh ve doo un ishima, nahan kwagh ne mgbegha un er zegekwagh sha ci ve. Er Tony vea Wendy kav er José vea Rose ve civir Yehova zan zan ve kar been iyol yô, kwagh ne mgbegha ve u nan ve ijiir i tsan. Ve wase José vea Rose, mba ve hembe anyom 80 hegen la, kuma anyom 15. José vea Rose ve nenge Tony vea Wendy ér ka iyua i Yehova a ne ve yô.

We kpa, Aôndo soo ér una tuur we sha ‘uwegh nagh ku yanegh ku yiman a yima’ la. Nahan u lumun u nan un u a tende zwa a we ér ‘de cie ga, me wase u’ la, uwegh ou kpa?