Aôndo Ongo Mbamsen Asev Je Kpa?
Ka wea eren msen kpa i lu u er Aôndo ngu ungwan ga yôô? Aluer ka i lu u nahan yô, fa wer ka we tseegh ga. Ior mbagenev kpishi kpa mba eren msen hen Aôndo sha akaa a a ze ve iyol yô, kpa mbamzeyol vev mbara mba di her tsô. Nahan kwagh ne tese ér Aôndo ongo mbamsen asev ga shinii? Ei, ka nahan ga cii! Bibilo pase se wang ér ka sea er msen hen Aôndo sha gbenda u vough yô, a ungwa. De se time sha akaa a Bibilo i ôr yô.
AÔNDO NGU UNGWAN.
“We, u U ongo msen, ka hen a We man uuma cii vea va ye.”—Pasalmi 65:2.
Ior mbagenev kaa ér ityôkyaa i ve eren msen yô, ka sha ci u ka vea er msen yô, ishima i pever ve, shin er ve ne jighjigh ér ma or ongo msen ga nahan kpaa. Kpa msen ka kwagh u se eren di tsô ser i pever se iyol sha er se za hemen u nôngon a mbamzeyol asev ga. Bibilo pase se wang ér ‘Yehova * ngu ikyua ikyua a mba ve yer Un cii, mba ve yer Un sha mimi la cii. . . . Una ungwa mliam vem, Una yima ve kpaa.’—Pasalmi 145:18, 19.
Sha nahan yô, se fa dedoo ser Yehova Aôndo ongo mbamsen mba mbacivir un ve eren la. A ôr kwagh u doon kpishi, a kaa ér: “Né vaa a Mo, man né za, né za sônom man Mo kpaa Me ver ato her a ven.”—Yeremia 29:12.
AÔNDO SOO ÉR U EREN MSEN HEN A NA.
“Taver nen ishima sha msen u eren.”—Mbaroma 12:12.
I taver se ishima ken Bibilo ér se ‘eren msen hanma shighe.’ Nahan kwagh ne tese wang ér Yehova Aôndo soo ér se eren msen hen a na.—Mateu 26:41; Mbaefese 6:18.
Er nan ve Aôndo a soo ér se eren msen hen a naa? Hen sha kwagh ne: Hanma ter cii ka nan fa akaa a a gbe wan u nan yô, nahan wan ka nana kaa a ter ér “Baba ma u wasem” yô, i saan ter la iyol kpishi, sha ci u nan fa je ér wan la na nan jighjigh shi ngu kôôsôô a nan. Kape se kpa ka sea er msen hen Yehova Aôndo ve a nenge ér se na un jighjigh shi se soo u lun a na kôôsôô je la.—Anzaakaa 15:8; Yakobu 4:8.
KWAGH WOU GBA AÔNDO ISHIMA SHA MIMI.
“Gema nen ishimanyian yen cii, haa nen sha a na, sha ci u kwagh wen gba un ishima.”—1 Peteru 5:7.
Aôndo soo ér se eren msen hen a na sha ci u se doo un ishima shi kwagh wase gba un ishima. A fa mbamzeyol asev man akaa a a nan se ishimanyian la, nahan a soo u wasen se.
Ken uma u Tor Davidi cii, yange a er msen hen Yehova Aôndo ér a wase un, shi a ôr Aôndo mbaawashima nav man er ishima i lu un ker yô. (Pasalmi 23:1-6) Aôndo yange nenge Davidi nena? Davidi yange doo Aôndo ishima shi Aôndo ungwan mbamsen nav. (Aerenakaa 13:22) Se kpa, kape Aôndo a ongo mbamsen asev sha ci u kwagh wase gba un ishima je la.
‘TER DOOM ISHIMA SHA CI U ONGO IMO YAM’
Mkaanem ma ken Bibilo man ka ma orgen u un kpa yange nger pasalmi yô. Yange na jighjigh ér Aôndo ongo mbamsen nav, nahan kwagh la wase un kpishi. A nenge ér un hemba ngun kôôsôô a Aôndo shi kwagh la ka a na un agee a wan ishima a ican kua ijungwen.—Pasalmi 116:1-9.
Aluer se fa ser Aôndo ongo mbamsen asev yô, se za hemen u eren msen hen a na. Nenge ase kwagh u yange er orgen ken tar u Ishpania yô, iti na ér Pedro. Yange mato wua wan na u nomso u lun anyom 19. Pedro vaa a Aôndo pase un er lu un ken ishima yô, shi er msen acin imôngo hen Aôndo ér a sur un ishima shi a wase un. Nahan lu nyi i ere? Pedro kaa ér, “Yehova yange ungwa msen wam sha ishimasurun man iwasen i mo vea kwase wam se zua a mi hen anmgbianev mba ken tiônnongo la.”
Ashighe kpishi Aôndo ka a ungwa mbamsen asev sha ishimasurun man iwasen i ka se zua a mi hen azende ase a kwagh wase a gbe a ishima la
Er Pedro er msen acin imôngo kpa wan na la nder ga nahan kpa, mbamsen mbara wase un kua tsombor na kpishi. Kwase na María Carmen kaa ér: “Msen yange wasem u wan ishima a ijungwen. Yange mea er msen hen Yehova yô, ishima i gbam shimi shi i pever mo iyol, nahan m fa je mer Yehova fa er i lum ken ishima yô.”
Bibilo kua akaa a a er ior mba se ter kwagh ve ne tese wang ér Aôndo ongo mbamsen. Nahan kpa, ikyav tese ér Aôndo ongo mbamsen mbagenev ga. Nahan er nan ve a ongo mbamsen mbagenev ga?
^ Ikyum. 5 Yehova ka iti i Aôndo kpôô kpôô.—Ekesodu 6:3.
Kwagh Ugen u Alaghga Shi Una Doo U Yô
Se Er Msen Nahan Aôndo Una Ungwa shi Una Er Kwagh sha Mi Je Kpa?
Bibilo tese ér Aôndo ongo mbamsen asev nyian kpaa. Ka se se na ve Aôndo una ungwa msen wase shin una ungwa ga ye.
MBAMPIN MBA BIBILO I NE MLUMUN SHA MI LA
Aluer M Er Msen Nahan Aôndo Una Wasem Je He?
Kwagh gba Aôndo sha mbamzeyol av mimii?
