Or Môm Nana Fatyô u Waren Ku Ga
TÔÔ wer u ngu nengen fiim i or u i fe nan wuee, man alaghga je yô, ka or u gbidyen bor u nan ze iti, u u soo kwagh u nan yô. I hii sha u tesen shighe u yange nan lu wanye la, man shighe u nan hii u henen bor u gbidyen la, man er nan lu karen iyol a u memen shio la. Man u nenge er nan lu gbidyen bor vea kwe borough u i fe u tsembelee yô, shi u nenge er nan lu gbidyen bor ken ityar i ken won la kpaa. Ica i gbe ga yô, u nenge ufoto mba uiyua mba yange nan tôô ken anyom a karen la, man u masen yô, nan beeyol nan kpe man fiim la kure.
Fiim ne ka kwaghhir ga, ka kwagh u or kpôô kpôô u yange nan lu uma, kpa hegen nan kpe yô. Or u i er kwagh u nan la, yange nana lu or u gbidyen bor shin orsainsi shin or u eren anumbe shin orgen u i fe nan wuee kpa, kwagh kaha ga, ka kwagh shon môm. Alaghga or shon yange nan er akaa kpishi, kpa u gbidye kwar u nenge er yange ma nan er akaa a hemban a ngera, luun er nan beeyol shi nan kpe ga kpa?
Er kwagh ne a vihi tsung nahan kpa, ka kwagh u a lu keghen se cii je la. (Orpasenkwagh 9:5) Er uumace ve nôngo kwagh tsung nahan kpa, se mba a fatyô u waren iyolbeen man ku ga. Kpa ka cii la ga, se fatyô u kpen kpoo, sha ci u aikyôr shin angev. Er i pase ken Bibilo nahan, se mba er ka iikpii i pepe i ka i gba ‘i nenge a mi sha ashe kpeghee maa i shi i sambe kera’ la nahan.—Yakobu 4:14.
Mbagenev yô, ka inja er ve fa kwagh u uma ga shi uma ngu ve a inja ga yô, nahan mba eren uma u “se gbaa yan nen akaa man akaa tsô, gadia kper se mba kpen” la. (1 Mbakorinte 15:32) Ior mba eren uma nahan sha ci u ve fa je ér vea fatyô u kpen hanma shighe cii shi mba a ishimaverenkeghen ga. Nahan ashighe agen, hemban je yô, shighe u or lu yan ican yô, alaghga nana pine ér, ‘Uma yô ka un cii je ne shinii?’ U fatyô u zuan a mlumun hana?
Ior kpishi nyian ver ishima ér mbasainsi vea zua a mlumun sha mpin ne. Mbasainsi man mbatwerev zua a akaa a aa fatyô u nan uma una za hemen u lun gbem yô. Shi mbasainsi mbagenev mba nôngon ér vea na uma a za hemen u lun gbem, i hemba er se tse nyian la. Aluer ka nyi je i due ken iniôngon ve la kpa, mbampin mban mba her: Ka se va beeyol shi se kpe sha ci u nyi? Ishimaverenkeghen ngi ér a va hemba orihyom wase ku je kpa? Ngeren mba ve dondo ne vea nenge sha atineakaa ne shi vea na mlumun sha mpin ne, Uma yô ka un cii je ne shinii?
Kwagh Ugen u Alaghga Shi Una Doo U Yô
IYOUKURA
Ior Ker u Lun Uma Gbem
Mbatimen sha kwagh u akaa a uma man mbatimen fan er ka i hii ve wanye nan bee ormaren sha aeren man inja la, mba nôngon ér vea fa er ka i hii ve orumace nan beeyol la. Kpa ka nyi i dugh ken kwaghtôvon u ior mbana?
