Yange i marem hen geri u Ciudad Mante, anijiir u doonashe tsung ken kpentar u Tamaulipas, ken tar u Mexico. Jighilii yô, ior mba hen geri ne fa kwagh shi eren a ior kundu kundu. Kpa kwagh u vihin yô, gema lu bo ijiir u numben a mi ga, sha ci u ikwe i mbaaferev de ishar her.

Yange i mar se ônov mba nomso se lu unyiin, mo m lu u sha uhar. Mbamaren av yesem ken kwaghaôndo u fada, nahan m er batisema ker. Shighe kar yô, m lu môm ken mbaatsamev mba hen parish wase la. Yange m soo u eren ishima i Aôndo sha ci u m lu cian mer una va ôrom ijir shi me hia ken gyamusu gbem sha won.

Shighe u m lu anyom ataan la, terem kende se yem kwagh na. Kwagh ne yange na m ure kpishi, shi gba lun mo ken ishima dang tsô. Taver mo er yange hii ve undu se yô, gadia yange se soo kwagh na dedoo. Yange i gba u ngôm una er tom kpoughloo ve una koso se ônov nav unyiin ye.

Kwagh ne nam ian i bunden makeranta za lun vea mbayev mbagenev mba ve lu vesen a mo yô. Yange ve tesem u ôron kwagh bumun, man taav u man, man iv kua iju i keren. Er m soon u lun ityough sha mbagenev yô, m hen num u keren iju, man num u sôôn uwav man num u gbidyen dembe, kua num u nôngon a ikyagh ki tswamegh. M hingir gumor u eren ipila. Ashighe kpishi m nôngo num a gbuuka, man acin imongo i za tôôm a tôô sha godobi hen inya, m nôngon ku, a awamber iyol. Ngôm yange una za nenge a mo hen inya, una sase tôôn mo una yemen a mo sha iyouci nahan, a zungwe kpishi!

Shighe u m lu anyom 16 la, boki wam ugen va hen mo, iti na ér Jorge. Yange kaa a mo ér un ngu Orshiada u Yehova shi un soo u ôron se loho u hange hange ugen. Maa hii u pasen se atesen a na ken Bibilo. Lu kwagh u m lu a vande ôron ken Bibilo ga yô. Nahan er m fa iti i Aôndo kua mbaawashima nav yô, saan mo iyol je zua ga. Jorge maa kaa ér una hen Bibilo a vese. Se kpa se lumun.

Yange m va fe mer ityesen i igyamusu la due ken Bibilo ga yô, ishima gbam shimi. (Pasalmi 146:4; Orpasenkwagh 9:5) M fe kwagh la je maa m de u  cian Aôndo gighir gighir. Kpa m hii u nengen un er Ter u nan lu a dooshima shi nan keren kwagh u injaa sha ci u ônov mba nan nahan.

Er m lu henen Bibilo seer la, m nenge mer gba u me sôr akaa ken uma wam. Yange gba u me hen u hiden a iyol ijime shi me de ipila i eren. Kwaghwan u i nger ken 1 Mbakorinte 15:33 la yange wasem. A kaa ér: “Ujende mba bov mba vihin mbamlu mba dedoo.” M mase kaven mer aluer m soo u geman uma wam yô, a gba u me de u lun vea udangmbaiorov mba ve vihim la. Nahan m pav a azenda am a tse la, m gema m kôr azende vea Mbakristu mba mimi, mba ve kuren mbamzeyol vev sha num shin ipila ga, kpa ve dondon akaawan a Bibilo sha u kuren mbamzeyol vev la.

Shi kwaghwan u ken Mbaromanu 12:17-19 la kpa yange wasem kpishi. A kaa ér: “Aluer a fatyô yô, lu nen bem a ior cii ape kwagh wen a lu sha mi la. . . . De oron nen iyev sha kwagh wen ga, . . . gadia i nger er: Ka Mo Me or iyev ye, ka Mo Me kimbi ye, kape Ter A kaa la.” Kwagh ne wasem u fan mer Yehova una ôr mbaaferev ijir sha mnenge na man sha shighe u a soo la. Tegh tegh tsô m va de ieren yam i ipilagh la.

Iyange igen la m lu hiden hen ya wam aikighe, nahan kwagh va erem sha gbenda je ka kwagh u hungur mo ga. Agumaior agen ken kwe u mbaeren ipila mba yange ve eren ayôôso a kwe wase yô, za va va tserem gbenda, orvesen ve la maa tam sambe ken ijime, maa ôr a mo sha nomor ér, “Er ase kwagh u u lu a mi la!” Yange m hide m er msen hen Yehova kpase mer a nam ishimawan. Shin er vanger varem ker u eren ayôôso a ve nahan kpa, m kar ving m yem. Kpenan maa m za tagher a orvesen ve la iyol na. Ishima vihim, lum er m or iyev nahan. Kwa ne kpa shi m er msen ken ishima, m zamber a Yehova mer a wasem me kighir ishimavihin yam la. Gumor la gema er kwagh u kpiligh mo iyol yô, a va jighilii a va kaa a mo ér: “Yam anyi sha kwagh u nyen se er a we aikighe la. Jighilii yô, m soo u lun er we nahan. M soo u henen Bibilo.” Yange saan mo iyol kpishi er m kighir ishimavihin yam la yô! Kwagh ne na yô, se hii u henen Bibilo imôngo.

Kwagh gema er vihi yô, tsombor wam kera za hemen u henen Bibilo hen shighe la ga. Nahan kpa m kange ishima mer me za hemen u henen Bibilo, me de mer ma kwagh shin ma or môm nana yangem ga. Shi yange m fa dedoo mer aluer m ngu lun vea ior mba Aôndo hanma shighe yô, a saan mo iyol shi me lu a tsombor u injaa u m lu keren la. Nahan m za hemen u henen Bibilo zan zan i va erem batisema ken inyom i 1991, m hingir Orshiada u Yehova.

Yange m nyoon ishima, m keren u lun ityough sha mbagenev, shi m wa tswam kpishi. Kpa Mkaanem ma Aôndo gema uma wam vindi vindi. Hegen ne, ka m pasen hanmaor u nan kegh ato a mo cii loho u bem ken Bibilo. M er tom u civirigh u pasen kwagh hanma shighe la ka anyom 23 je ne.

Hen shighe ugen la m za wase tom hen afishi a Mbashiada mba Yehova a ken tar u Mexico la. Lu her kpa m zua a gum Kwasekristu ugen u tseen ishima ye, iti na ér Claudia. M vôso un ken inyom i 1999 la. M wuese Yehova kpishi er a nem kwase u injaa nahan yô!

Yange se lu civir Yehova vea nongo u mbaakondoato, mba ve lamen iliam i sha ave i ken tar u Mexico yô, se lu wasen ve u henen kwagh u Yehova. Shighe kar yô, i tindi se ér se za er tom u tesen ior Bibilo ken tar u Belize. Se mba a akaa kpishi heen ga, kpa se ban a akaa a se lu a mi ve a saan se iyol la ga. Se fatyô u undun tom ne sha ci u ma kwagh ugen ga.

Shighe kar yô, ngôm hide hii u henen Bibilo shi er batisema. Shi anngôm u vesen la vea kwase na kua mbayev vev cii ve hingir Mbashiada mba Yehova hegen. Azende am a tse a yange m pase ve loho u Tartor la kpa nga civir Yehova hegen.

Kwagh gema er vihi yô, mbagenev hen tsombor wam kpe hegen sha ci u yange ve de ipila i eren ga. Yange mea ze hemen u eren ipila er ve nahan yô, mo kpa alaghga ma m lu uma hegen ga. M wuese kpishi er Yehova a urugh mo a ve a mo her a na kua hen mbacivir un mba ve we ishima a mo ve tesem u dondon akaawan a Bibilo ken uma wam, sha ishima i legh legh la yô.