Sha shighe ugen la, sha iyange i Lahadi atetan Kenneth vea kwase na Filomena za u za sôron kwase ugen vea nom na u ve henen Bibilo a ve yô.

Kenneth kaa ér, “yange se mba za nyer hen ya shon yô, se nenge i wuhe ihinda, shi mato kpa lu her ga. Kpa ishima gema kaa a mo ér m yila kwase la sha fon.”

Kwase la tôôn fon yô, kaa a na ér nom na yar tom. Kpa va fe ér Kenneth man Filomena mba sha hunda yô, mough bugh hunda kaa a ve ér ve nyôr ker.

Mba nyer yô, fese je ve kav er kwase la a lu vanden vaan yô. Kenneth eren msen u hiin Bibilo i henen yô, kwase la shi hii mliam. Tsô kenneth vea Filomena gba kumbur un pinen un kwagh u a ze un iyol yô.

Kwase la pase ve ér un soo ér una wua iyol na hen atetan la je, nahan shighe u shen kenneth a yer un sha fon la un lu ngeren nom na washika u pasen un er i hii ve un soo u wuan iyol na yô. A kaa a ve ér ka ishimavihin i ne ve un soo u wuan iyol na ye. Kenneth maa ôr un avur a Bibilo a surun un ishima. Kwaghwan ne hingir u waren uma u kwase la.

Kenneth kaa ér: “Se sugh Yehova kpishi er a ne se ian i wasen kwase u ishima i gbe un awambe ne yô. Hemban je yô, er a ne ortyom na, shin icighan jijingi na, ér a mgbegha se u yilan kwase la yô!” *

Er Kenneth man Filomena ve ne jighjigh ér ka Aôndo yange hemen ve sha ikyev i ortyom shin icighan jijingi Na nahan, ka shami gaa? Shin fon u yange Kenneth yila sha shighe vough la ka di kwagh u doon tsung u yange gba eren abu tsôô?

Se fatyô u kaan jighilii ga. Kpa kwagh u se fe yô, Aôndo tindin mbatyomov nav sha u ve wase ior ve civir un. Ikyav i tesen yô, Aôndo yange tindi ortyom na ér a ôr Filibu orpasen ivangeli, a za wase Oretiopia ugen u eren tom ken ya u tor, u lu keren or u nana pase un Ruamabera yô.—Aerenakaa 8:26-31.

Ukwaghaôndo kpishi mba tesen ér ior mbagenev mba ken jijingi mba i nengen a ve ga, mba ve hembe uumace tahav yô. Ve na jighjigh ér mba eren Aôndo tom shi mba kuran uumace, shi hanmaor yô, nan ngu a ortyom u a kuran nan yô. Ior kpishi na jighjigh ér mbatyomov mba, shi mba wasen ve kpaa. Nahan kpa, ior kpishi mbagenev fa kwagh u mbatyomov kuma ve ga.

Sha nahan yô, ka han ve dughu? Ka nyi Bibilo i ôr sha kwagh ve? Man vea fatyô u wasen we nena? De se tôv se nenge.