SHIGHE m lu anyom ataankaranyiin la, m de u vesen. Kwagh ne er hegen ka anyom 34 je ne. Shighe la m lu ken tar u Côte d’Ivoire, man zan zan hegen kpa ityaven yam ka angahar 3 tseegh. Yange mbamaren av mba kaven wang ér ka u me kera fatyô u vesen seer ga yô, ve taver mo ishima ér m eren tom kpoghuloo sha er me tôô ishima sha mlu wam la kera yô. Yange m bugh ijiir i teen atamaikyon sha ishigh ki ya wase, shi m nenge mer ngi sha ashe tsembelee. Kwagh ne na yô, kasua a yarem kpen kpen.

Er m lu eren tom kpoghuloo nahan kpa, kwagh ne gema mlu wam ga. Ityaven yam seer ga, shi u eren ankaam mba kiriki, er u tôôn akaa a m teen la sha ajiir a m pendan a ken shôôpu la nahan je kpa, i taver mo. Lum er hanma kwagh cii i er sha ci u ior mba me za ken ityaven ve kwa har la nahan. Kunya u kôrom a iyol yam, kpa kwagh ne cii gema shighe u m iv anyom 14 la.

Iyange igen yô, kasev uhar mba ve lu Mbashiada mba Yehova yô, va yam atamaikyon hen a mo, shi shighe kar yô, ve hii u henen Bibilo a mo. Ica i gbe ga yô, m kav er mfe u fan Yehova kua awashima na la a hembe lun a inja a mluyol wam yô. Kwagh ne nam mpeveryol. Maa Pasalmi 73:28 hingir ivur Bibilo yam i ishima ishima. Vegher u hiihii u ivur Bibilo la kaa ér: “Doom u mgbôghom a Aôndo.”

Kera ngôôr ga je maa tsombor wase mough yem ken tar u Burkina Faso, nahan akaa gema ken uma wam kpishi. Ken tar u Côte d’Ivoire ape se vande lun la, ior kpishi fam sha ci u atamaikyon a m teen la. Nahan kpa, hen ijiir yam i he ne yô, m lu orvannya shi ior kpishi vea nenge a mo yô, i kpiligh ve iyol a mluyol wam la. Ior ve shi kenger mo. Kwagh ne na yô, ukasua imôngo cii m due ken won ga. Kpa m umbur er yange m mgbôghom a Yehova ve doom yô. Yange m nger afishi a branci u Mbashiada mba Yehova, maa i tindi or ér nana va wasem. Lu anmgbian u kwase ugen u eren tom u mishen, u i yilan un ér Nani la i tindi un ye. Yange va sha agugu.

Waarawa yange u lu sha igbenda i hen ningir wase la kpishi, shi i lyemen, shi a lu fam yô, i lu angbiôr angbiôr. Nani yange gba a agugu acin imôngo zum u una vaan u va henen Bibilo a mo yô, kpa mayange yina ishima ga. Iyange igen yô, a kaa ér una va tôôm mo se zaan mbamkombo. Nahan m kav mer gba u me gema duen ken iyou shi ior vea gba kenger mo. Kpa m wa ishima. Kwagh ugen yô, lu u Nani una tôôm mo yô, agugu shon una seer yuhwan man kera kpa agugu la lu ican  u kôôm. Nahan kpa, m lumun. Yange m umbur vegher u sha uhar u ivur Bibilo yam i ishima ishima la, ér: “M gema Ter AÔNDO hingir mo ijiir yam i yeren ker.”

Ashighe agen mo man Nani yange sea zaan mbamkombo yô, se za kura se cir shin amgbiôr, kpa iniôngon ne i saa se ishe ga. Kpa yange mea za nyôr ken Iyou i Tartor yô, anmgbianev ve se a mo shi ve tesem dooshima; ve kenger mo er mba ken tar nahan ga! Iwer itiankarinyiin ngi kar yô, i erem batisema.

Vegher u sha utar u ivur i Bibilo yam i ishima ishima la kaa ér: “Me ôr kwagh u aeren a Ou cii.” Yange m fa je mer tom u pasen kwagh la ua lum ican kpishi u eren. M umbur er yange m hii duen kwaghpasen u sha uya uya la ve lum yô. Mbayev man mbaganden cii yange ve due ve lu kenger mo, mea kar han je ve lu a mo, shi ve lu kaven zende wam. Ishima yange vihim ker kpishi, kpa m za hemen u umbur mer mo man ve cii, se nyôr ken Paradiso yô, a doo se. Nahan m gba uwer ga.

Yange m za yam ikyekye i lun a akaver atar sha er a lum ican kpishi u pasen kwagh ga yô. Mea due kwaghpasen vea orgen yô, nan tuur mo m unde igyungu, a geman u senen gangela yô, nan tsuwe nan tema sha mi, maa se gba senen. Er tom u pasen kwagh yange u nam ican sha hiihii la nahan kpa, lu kwagh u vesen u naan mo msaanyol yô, je yô, ken inyom i 1998 la, m hii u eren pania u keke.

Yange m hen Bibilo a ior kpishi, nahan iorov unyiin ken ve er batisema. Heela tseegh ga, anngôm u kwase kpa ngohol mimi! Mea ungwa er mbagenev ve ze ikyura ken mimi nahan, kwagh ne a taver mo ishima shighe u iyol i kpem yô. Iyange igen yô, angev mbu iyolhian kendem inya, maa m va zua a washika u wanyemakeranta ugen tindim a mi ken tar u Côte d’Ivoire yô. Yange m hii Bibilo i henen a na shighe u zaan yunivasiti ken tar u Burkina Faso yô. Maa m va gema kwaghhenen la m wa sha ikyev i anmgbian ugen. Shighe kar yô, wanyemakeranta ne mough yem ken tar u Côte d’Ivoire. Yange doom kpishi er za hingir orpasenkwagh u nan lu a er batisema ga yô!

Kpa me nengen sha ugbayol av nena? Mzough ugen u nan mbaawanev iwasen yange hii u tesen mo ikyekye i koron. Kpa môm ken mbatesen mbara nenge gbenda u m lu eren tom la, nahan a kaa ér: “Doo u se tese u icahur i eren.” Shi lu kwagh u ve er je la. Nahan m fa u eren icahur i kiren akondo man i ôôn iyol. Ior yange ve soo icahur yam la, shi ve kaa a mbagenev ér ve za yam i. M zenden a mi sha agugu m teen ior.

Kwagh er vihi yô, ken inyom i 2004 la, m de pania u eren sha ci u ijime lu nyoon mo seer a seer. Nahan cii kpa, m de u pasen kwagh kpoghuloo ga.

Ior ka ve kaa ér hanma shighe cii ka m lu zwa ahan ahan. Gba u a saan mo iyol sha ci u doom u mgbôghom a Aôndo.—Kwaghôron u Sarah Maiga.