U soo u fan mimi sha kwagh u Aôndo? U soo u fan or u a lu, man kwagh u a soo man kwagh u a soo ga la, kua kwagh u a lu ishima na yôô? Yehova Aôndo pase mimi sha kwagh na ken Bibilo, i i lu mkaanem nam la vindi vindi. Kpa ka hanma or nana ôr Bibilo tsô maa nana fa mimi ne a kôr inya ga. Sha ci u nyi? Sha ci u, ka ior kpuaa tseegh vea fatyô u ôron Bibilo shi kaven mimi u sha kwagh u Aôndo ye, ka hanma or ga. De ase se time sha kwagh u Yesu yange ôr sha ikyaa ne la se nenge.—Ôr Mateu 11:25.

I hii ivur la sha mkaanem man, ér: “Hen shighe la Yesu gema kaa er.” Mkaanem man tese ér, kwagh u Yesu soo u ôron la lu sha u nan imo sha kwagh ugen u sember eren yô. Yange sember zôhôn a ior mbagenev mba ve soo u hingir mbahenen nav ga la. Ior mban lu mba ken agar a ken Galilia atar, a Yesu er uivande ker kpur kpur yô. (Mateu 11:20-24) Alaghga u pine wer, ‘A hii nan ve or a nenge uivande mba Yesu er la sha ashe a nan, kpa nana venda u nan atesen a na a mimi la jighjigh shi dondon unu?’ Yange ve venda u ngohol loho u Yesu la, sha ci u ve cighir asema.—Mateu 13:10-15.

Yesu fa je ér, cii man se fa mimi u Bibilo i pase sha kwagh u Aôndo la yô, gba u se zua a iwasen hen Aôndo, shi se lu a ishima i dedoo. Yesu pase ér: “M ngu sughun We, Tere, Ter u Sha man tar, sha er U yer mbafankwagh man mbakavenkwagh akaa ne, kpa U gem U pase anikyundanev a yô.” U nenge er i hii ve i lu ior kpuaa tseegh vea fatyô u ôron Bibilo shi kaven mimi u sha kwagh u Aôndo, i lu hanma or ga ve ga? Er Yehova a lu “Ter u Sha man tar” yô, ngu a ian i pasen antior u a soo u pasen nan mimi cii. Kpa Aôndo sangen a sange mba una pase ve mimi la ga. Tsô hii nan ve ngu a pase mbagenev mimi ne, kpa a gema a yer mbageneve?

Yehova lumun mba ve hiden a iyol ijime la, ka mba ve kenden a iyol sha la ga. (Yakobu 4:6) Pasen “mbafankwagh man mbakavenkwagh” mba tar ne, mba ve fe takerada shi ve suur sha ayol a ve tseegh, i gbe ve u keren iwasen her a na ga la mimi u sha kwagh na ga. (1 Mbakorinte 1:19-21) Kpa a gema a pase un hen “anikyundanev,” ka mba ve ve her a na a ishima i mimi, shi ve hiden a iyol ijime er mbayev mba kiriki nahan la. (Mateu 18:1-4; 1 Mbakorinte 1:26-28) Yesu yange fa mbahiden a iyol ijime man mbagengese ayol a ve mbara cii. Mbahemenev mba kwaghaôndo kpishi mba sha ayange a Yesu, mba ve fa takerada kpishi la yange ve kav inja i loho u Yesu pasen la ga, kpa mbakoron ishu mba ve hiden a ayol a ve ijime mbara kav. (Mateu 4:18-22; 23:1-5; Aerenakaa 4:13) Shi mbanyarev man mbafantakerada mbagenev mba ve hide a ayol a ve ijime sha mimi la kpa va hingir mbahenen mba Yesu.—Luka 19:1, 2, 8; Aerenakaa 22:1-3.

Hegen se nenge ase sha mpin u se vande pine ken mhii u ngeren ne la: U soo u fan mimi sha kwagh u Aôndo? Aluer ka nahan yô, alaghga ishima ia gba u shimi er u fe wer Aôndo vende mba ve nengen ayol a ve ér ve mba mbafan kwagh mba tar ne la. Kpa gem lumun ior mba mbafankwagh mba ken tar ne ve nengen ér ve gba kwagh ga la. Aluer u ngu henen Mkaanem ma Aôndo a ishima i dedoo yô, alaghga we kpa u hingir môm ken ior mba Yehova a ne ve iyua i injaa la. Iyua shon yô, ka mfe u fan mimi sha kwagh na la. Aluer u fa mimi ne yô, a hemba saan we iyol hegen, shi u va zua a “uma u a lu uma jim” la, ka uma u tsôron ken tar u he u perapera u Aôndo a tende zwa u van a mi la je la. *—1 Timoteu 6:12, 19; 2 Peteru 3:13.