Aôndo Soo u Yan Ijende a We
“Ma or nana fatyô u gban van her a mo ga, saa Ter u A tindim la, Una urugh nan.”—YOHANE 6:44.
ER I HII VE I TAVER MBAGENEV U NAN JIGHJIGH A KWAGH NE YÔ: Ior kpishi mba ve ne Aôndo jighjigh yô ka ve nenge ér a gba ica a ve. Kwase ugen ken tar u Ireland u yange zaan adua ken hanma kasua yô, kaa ér “Yange m nengen Aôndo mer ka di orgbanakaa tsô, m fa un ga. Ma shighe môm kpa m nenge mer ngu ikyua a mo ga.”
KWAGH U MKAANEM MA AÔNDO MA TESE YÔ: Shighe u se nenge ser kwagh hemba se kpa, Yehova gbe uwer u wasen se ga. Yesu tese ikyav er Aôndo a wasen se yô, ér: “Aluer or nana lu a iyôngo akunduataan man u môm ken i ia tsume yô, nana kera undu i akunduanyiingber kar itiankarinyiin la sha iwo, nana yem nana za ker i i tsum la gaa?” Kwagh ne tese se nyi? “Kape i lu ishima i Ter wen u A lu Sha la, u mbakiriki mban, mô ve nana̱ saa ga la.”—Mateu 18:12-14.
Hanmô ken “mbakiriki mban” cii yô, nan gba Aôndo kwagh tsung. Aôndo ngu a “ker i i tsum la” nena? Ivur Bibilo i i ter sha mhii u ngeren ne la tese ér, Yehova urugh ior ve a ve hen a na.
Ka unô nyian ve ze hen uya mba iorov kua sha ajiir a ken igbar ve za pasen ior kwagh u Aôndo ken Bibiloo?
Nenge er Aôndo yange urugh ior mba ve lu a ishima i mimi yô. Sha ayange a mbaapostoli la, Aôndo tindi orhenen Filibu ér a za kohol orgen u eren tom hen ya u tor u tar u Etiopia sha gbenda, a pase un inja i kwaghôron u profeti, u lu ôron yemen sha ikyekye na i kpelan sha anyinya la. (Aerenakaa 8:26-39) Shighe kar yô, Aôndo kaa a apostoli Peteru ér a za hen tor shoja u nengen sha kwe shojaa u Mbaroma ugen, u i yilan un ér Korneliu, u lu vanden eren msen kera shi nôngon sha afatyô na cii ér una civir Aôndo yô. (Aerenakaa 10:1-48) Shi Aôndo hemen apostoli Paulu vea mbasuen un, za a ve hen kpeifi ken won u gar u Filipi. Nahan ve za zua a kwase ugen u “civir Aôndo,” i yilan un ér Lidia. Maa ‘Yehova bugh un ishima sha u a ver ishima’ yô.—Aerenakaa 16:9-15.
Hanmô ken ior mba se ter kwagh ve sha heen ne cii yô, Yehova nenge ér nan lu keren Aôndo, nahan nana fa un. Ka unô nyian ve ze hen uya mba iorov kua sha ajiir a ken igbar ve za pasen ior kwagh u Aôndo ken Bibiloo? Ior kpishi vea kaa ér, ka “Mbashiada mba Yehova.” Pine ase iyol you wer, ‘Adooga Aôndo ngu eren tom a ve sha u yan ijende a mo?’ Se mba taver we ishima ser sôn Aôndo a wase u sha iniôngon you i kporom hen a na la. *
^ par. 7 Wea soo u fan kwagh ne seer yô, za sha Intanet hen ijiir yase i www.dan124.com/tiv la, za nenge tser u vidio u u lu a itinekwagh ér Doo u Ú Hen Bibilo sha ci u Nyi? la.
Kwagh Ugen u Alaghga Shi Una Doo U Yô
KWAGH WASE
Doo u Ú Hen Bibilo sha ci u Nyi?
Bibilo ngi tan ior umiliôn umiliôn sha tar cii iwanger sha akaa a hange hange a a tsum ve la. We kpa u soo u zuan a iwanger shonoo?
